༢༠༡༡ ཟླ་ ༤ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༧ ཉིན་རྡ་སའི་ཉེ་འགྲམ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་རིགས་ལམ་སློབ་གཉེར་ཁང་གི་རིས་མེད་དགེ་བཤེས་ཐེངས་དང་པོ་དང་གཉིས་པ། དེ་བཞིན་ས་རཱ་མཐོ་སློབ་ཀྱི་མཐོ་རིམ་རིག་གནས་རབ་འབྱམས་པ་སྐབས་བཅུ་པའི་བསླབ་པ་མཐར་སོན་གྱི་མཛད་སྒོ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བཙན་བྱོལ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་། ཤེས་རིག་བཀའ་བློན་ཐུབ་བསྟན་ལུང་རིགས་མཆོག བོད་མི་དམངས་སྤྱི་འཐུས་ཚོགས་གཙོ་ཚོགས་གཙོ་སྤེན་པ་ཚེ་རིང་མཆོག ཆོས་རིག་དྲུང་ཆེ་ངག་དབང་ཆོས་གྲགས་ལགས། ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས། རྣམ་རྒྱལ་ཕན་བདེ་ལེགས་བཤད་གླིང་གི་མཁན་རིན་པོ་ཆེས་དབུས་ཆོས་བརྒྱུད་ཁག་དང་དགོན་སྡེ་གྲྭ་ཚང་ཚོགས་སྐྱིད་ཁག་གི་སྐུ་ཚབ། རིགས་སློབ་མ་ལག་གཉིས་ཀྱི་དབུ་འཛིན་དང་དགེ་ལས། སློབ་ཕྲུག དེ་བཞིན་འབྲེལ་ཡོད་སྐུ་མགྲོན་བཅས་ཁྱོན་མི་གྲངས་ ༥༠༠ བརྒལ་བ་ལྷན་ཚོགས་ཀྱིས་ཐོག་མར་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་སྣང་གསལ་ཞལ་ཕྱེ་དང་འབྲེལ་ཞལ་འདོན་དབུ་འཛུགས་གནང་གྲུབ་བསྟུན་སྔ་འགྱུར་རྙིང་མའི་རང་གཞུང་རིས་མེད་སློབ་ཚན་དུ་ཕྱོགས་སྒྲིག་ཞུས་པ་སྔ་འགྱུར་རྙིང་མའི་ལྟ་གྲུབ་ཀུན་གསལ་མེ་ལོང་ཞེས་པའི་དཔེ་དེབ་དབུ་འབྱེད་གནང་། དེ་ནས་ཤེས་རིག་བཀའ་བློན་མཆོག་གིས་རིག་གནས་སྐབས་བཅུ་པའི་མཐར་ཕྱིན་ཆེད་དེབ་དང་རིག་གནས་སློབ་ཐོན་པ་བསྟན་འཛིན་དགའ་བ་ནས་བརྩམས་པའི་འབྱུང་འགྱུར་གྱི་མི་ལོ་ལྔ་བཅུ་ཞེས་པའི་དཔེ་དེབ་དབུ་འབྱེད་གནང་གྲུབ་བསྟུན་རིགས་སློབ་མ་ལག་གཉིས་ཀྱི་སྤྱི་ཁྱབ་འགན་འཛིན་གཞོན་པ་དགེ་བཤེས་སྐལ་བཟང་དགྲ་འདུལ་ལགས་ཀྱིས་ངོ་སྤྲོད་གསུང་བཤད་གནང་། དེ་རྗེས་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་ཕྱི་ལོ་ ༢༠༠༦ དང་ ༢༠༠༩ ལོའི་རིས་མེད་དགེ་བཤེས་ཐོན་མཁན་རྣམས་ལ་རིས་མེད་དགེ་བཤེས་ཀྱི་ཕྱག་ཁྱེར་གནང་རྗེས་ཤེས་རིག་བཀའ་བློན་མཆོག་གིས་ཕྱི་ལོ་ ༢༠༠༤ དང་ ༢༠༠༧ ལོའི་རིས་མེད་སློབ་དཔོན་ཆེན་པོ་ཐོན་མཁན་རྣམས་ལ་རིས་མེད་སློན་དཔོན་ཆེན་པོའི་ཕྱག་ཁྱེར་གནང་། དེ་ནས་བོད་ཀྱི་བཙུན་མའི་ལས་འཆར་འགན་འཛིན་བཀའ་ཟུར་རིན་ཆེན་མཁའ་འགྲོ་མཆོག་གིས་ཕྱི་ལོ་ ༢༠༠༦ དང་ ༢༠༠༩ ལོའི་དབུ་མ་རབ་འབྱམས་པ་ཐོན་མཁན་རྣམས་ལ་དབུ་མ་རབ་འབྱམས་པའི་ཕྱག་ཁྱེར་གནང་མཚམས་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ཀྱིས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་མཐོ་རིམ་རིག་གནས་རབ་འབྱམས་པ་སྐབས་བཅུ་པ་ཐོན་མཁན་རྣམས་ལ་ཕྱག་ཁྱེར་གནང་གྲུབ་བསྟུན་བོད་མི་མང་སྤྱི་འཐུས་ཚོགས་གཙོ་མཆོག་གིས་རིས་མེད་དགེ་བཤེས་ཐེངས་དང་པོ་དང་རིས་མེད་སློབ་དཔོན་ཆེན་པོའི་ཡིག་རྒྱུགས་ཨང་དང་པོ། གཉིས་པ་གསུམ་པའི་སློབ་མ་རྣམས་ལ་བྱ་དགའ་གནང་། དེ་རྗེས་ཆོས་རིག་དྲུང་ཆེས་དབུ་མ་རབ་འབྱམས་པའི་ཡིག་རྒྱུགས་ཨང་དང་པོ་ནས་གསུམ་པ་བར་ཐོབ་ཁན་གྱི་སློབ་མ་རྣམས་ལ་བྱ་དགའ་གནང་རྗེས་བོད་ཀྱི་ནང་ཆོས་ལོ་རྒྱུས་འཕེལ་རིམ་ནང་བཙུན་མ་ཞིག་ནས་རིས་མེད་དགེ་བཤེས་ཀྱི་ཕྱག་འཁྱེར་ཐོབ་མཁན་ཇར་མན་མི་རིགས་ཡིན་པའི་བཙུན་མ་སྐལ་བཟང་དབང་མོ་ལགས་ཀྱིས་ངོ་ལོ་བཅུ་དྲུག་རིང་ནང་ཆོས་སློབ་གཉེར་ཐོག་རང་གི་མྱོང་ཚོར་གསུང་བཤད་གནང་གྲུབ་བསྟུན་ཤེས་རིག་བཀའ་བློན་མཆོག་གིས་གསུང་བཤད་གནང་།
དེ་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་འདིར་རིགས་ལམ་སློབ་གྲྭ་ཆེན་མོའི་བསླབ་པ་མཐར་སོན་པ་དང་དེ་བཞིན་སྡེ་ཚན་སོ་སོའི་བསླབ་པ་མཐར་སོན་པའི་མཛད་སྒོར་ཕེབས་པའི་རྣམ་པ་ཚང་མར་ངས་བཙན་བྱོལ་བོད་གཞུང་དང་ཆོས་རིག་ལས་ཁུངས་ཀྱི་ཚབ་ཞུས་ཏེ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་གི་མཛད་སྒོའི་ཐོག་བསླབ་པ་སློབ་གཉེར་བསྡུ་གྲྭ་ནས་བཟུང་སྟེ་རིས་མེད་དགེ་བའི་བཤེས་གཉེན་ཆེན་མོའི་ཕྱག་ཁྱེར་གནང་རྒྱུའི་བར་དུ་གང་ལྟར་ལོ་བཅུ་ཙམ་ཞིག་སློབ་སྦྱོང་གནང་ནས། དེ་རིང་འདིར་བསླབ་པ་མཐར་སོན་པའི་མཛད་སྒོ་འཚོགས་རྒྱུ་བྱུང་བ་རེད། དེ་བཞིན་རྒན་དམ་པ་མཆོག་གིས་རིགས་ལམ་སློབ་གྲྭ་འདི་དང་པོ་འཛུགས་སྐབས་དགོས་པ་དང་དམིགས་ཡུལ་ཆེན་པོ་ཞིག་གི་ཐོག་བཙུགས་གནང་བ་ཞིག་ཡིན་པ་གསལ་པོ་རེད། རྒན་པ་དམ་པ་ཁོང་གིས་དམིགས་ཡུལ་གཞིར་བཟུང་རིགས་ལམ་སློབ་གྲྭར་སྐྱ་སེར་དང་ཕོ་མོ་དབྱེར་མེད་སྒོ་ནས་སློབ་སྦྱོང་གནང་སྟེ་ཕེབས་མཁན་དང་ད་ལྟར་སློབ་སྦྱོང་གནང་བཞིན་ཡོད་པ་རྣམས་ལ་བཙན་བྱོལ་བོད་གཞུང་ཆོས་རིག་ལས་ཁུངས་དང་ང་རང་སྒེར་ངོས་ནས་ཡི་རང་བསྔགས་བརྗོད་ཞུ་རྒྱུ་ཡིན། སྤྱིར་ནང་པ་སངས་རྒྱས་པའི་ཆོས་དེ་གང་ཟག་སུ་འདྲ་ཞིག་ཉམས་ལེན་བྱས་ཀྱང་བྱེད་ཆོག་པ་ཞིག་ཡིན། དེ་བཞིན་འགྲོ་བ་མིའི་རིན་ཐང་གོང་འཕེལ་གཏོང་རྒྱུ་དེ་ཡང་ནང་པ་སངས་རྒྱས་པའི་ཆོས་ཀྱི་དགོངས་དོན་ལས་ལྷག་མེད་པ་ཞིག་དེང་སང་ཆགས་ཀྱི་ཡོད། དེར་བརྟེན་འདི་གར་སློབ་སྦྱོང་གནང་བཞིན་པ་དང་གནང་ཟིན་པ་ཚང་མས་དེའི་ཐོག་དགོངས་པ་མང་ཙམ་བཞེས་དགོས་ཀྱི་འདུག  སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ནས་ལོ་ ༢༥༠༠ ཙམ་ཕྱིན་ཡོད། འོན་ཀྱང་དེ་ནས་ད་ལྟ་བར་དུ་ནང་པའི་ཆོས་འདུལ་བའི་ནང་ཀུན་སྤྱོད་འཁྱེར་སྟངས་སོགས་གསལ་པོ་གསུངས་ཡོད་པ་ལྟར་བྱེད་དགོས་རྒྱུ་ནི་གལ་ཆེན་པོ་རེད། དེ་ང་ཚོའི་མི་རབས་འདི་དང་ང་ཚོས་མ་བྱས་ན་གཞན་དག་གིས་བྱེད་ཀྱི་མ་རེད། ཅེས་སོགས་ཀྱི་གསུང་བཤད་གནང་ཡོད། དེ་ནས་ས་རཱ་མཐོ་རིམ་སློབ་གཉེར་ཁང་གི་སློབ་སྤྱི་དགེ་བཤེས་འཇམ་དཔལ་གྲགས་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་བ་བཅས། །