ཕྱི་ལོ་ ༢༠༡༡ ཟླ་ ༤ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༡ རེས་གཟའ་ཕུར་བུའི་ཉིན་འདི་གར་བདེ་སྲུང་ལས་ཁུངས་ནས་བཏང་གནས་ནང་འཁོད་དོན། ་་བོད་གཞུང་བདེ་སྲུང་ལས་ཁུངས་ཀྱི་ཟུང་དྲུང་དང་། བཙན་རྒོལ་རྒྱལ་སྐྱོབ་ཀྱི་ལས་འགུལ་ནང་ལྷག་བློ་ཆེ་བསྐྱེད་ཀྱི་ཞབས་ཞུ་གནང་མཁན་གཞུང་ཞབས་རྒན་གྲས་བཀྲིས་ཆོས་དར་ལགས་ནད་མནར་དབང་གི་སྨན་བཅོས་གང་ཡོང་ཞུས་ཀྱང་དྲག་སྐྱེད་མ་བྱུང་བར་ཕྱི་ལོ་ ༢༠༡༡ ཟླ་ ༤ ཚེས་ ༡༨ ཉིན་ཨ་རིར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག
དེ་ཡང་དམ་པ་ཁོང་ནི།
ཕྱི་ལོ་ ༡༩༣༧ ལོར་བོད་ལྷོ་ཁ་ཇོ་ར་རྫོང་དེང་སྐབས་མཚོ་སྣ་རྫོང་ཁོངས་སུ་ཡོད་པའི་བྲེ་ཉ་བྱང་དམར་ཁྱིམ་དུ་འཁྲུངས་པ་དང་། རང་ལོ་ ༨ ནས་བཅུ་གཅིག་བར་ཇ་ཡུལ་རྫོང་དུ་ཡབ་གཞིས་ནས་ཆེད་འཛུགས་གནང་བའི་སློབ་གྲྭར་བོད་ཡིག་འབྲི་ཀློག་སྦྱང་། ཕྱི་ལོ་ ༡༩༥༦ ལོར་༸སྐུའི་གཅེན་པོ་བཀའ་བློན་ཁྲི་ཟུར་རྒྱ་ལོ་དོན་གྲུབ་མཆོག་ནས་གསང་བའི་ཐོག་འདེམས་སྒྲུག་གིས་མོན་རྟ་དབང་བརྒྱུད་རྡོར་གླིང་དུ་ལོ་གསུམ་རིང་དབྱིན་སྐད་དང་རྩིས་སོགས་སྦྱང་། ཕྱི་ལོ་ ༡༩༥༩ ལོར་བོད་རིགས་ན་གཞོན་དུ་མ་ཞིག་དང་མཉམ་ཨ་རིའི་མངའ་སྡེ་ཀོ་ལོ་ར་ཊོར་དུ་ལོ་གསུམ་རིང་སྐད་བསྒྱུར་ལས་ཀ་ཞུས་ཏེ་མཐར་ཕྱི་ལོ་ ༡༩༦༡ ལོར་རྒྱ་གར་དུ་ཕྱིར་ལོག་གནང་། ཕྱི་ལོ་ ༡༩༦༢ ལོར་གསང་བའི་ལས་དོན་ཐོག་ (Washington DC Goerge Town University) དང་ (New York Cornell University)ནང་སྐད་ཡིག་འཕེལ་རྒྱས་དང་རྒྱལ་སྤྱིའི་ཆབ་སྲིད་འགྲོ་སྟངས་དང་འཛིན་སྐྱོང་གི་སློབ་སྦྱོང་གནང་།
ཕྱི་ལོ་ ༡༩༦༥ ལོར་བཀའ་བློན་ཁྲི་ཟུར་རྒྱ་ལོ་དོན་གྲུབ་མཆོག་གི་བཀོད་མངགས་ལྟར་རྒྱ་གར་དུ་ཕྱིར་ལོག་གནང་སྟེ་ལྡི་ལི་གསུམ་འབྲེལ་ལས་ཁུངས་ནང་ལས་བྱེད་དང་། ལྡི་ལི་བོད་གནས་ཉམས་ཞིབ་ཁང་གི་འགན་འཛིན་ཞུས་ཏེ། ལོ་མང་རིང་ལྷག་བློ་ཆེ་བསྐྱེད་ཀྱིས་ལས་དོན་གཟེངས་སུ་ཐོན་པ་བྱུང་སྟབས་ལེགས་སྐྱེས་སུ་ཕྱི་ལོ་ ༡༩༧༨ ལོར་བོད་གཞུང་སྲི་ཞུ་བའི་གཞུང་ཞབས་དྲུང་གཞོན་གནས་རིམ་གནང་ཞིང་། ལྡི་ལིར་ལས་རྒྱུན་རིང་ཟུར་དུ་དུས་ཚོད་ནམ་བྱུང་ལ་ཐུགས་སྣང་གིས་དབྱིན་ཡིག་ཐོག་བོད་ནང་རྒྱ་མིའི་དམག་དོན་གྱི་གནས་སྟངས་སྐོར་གྱི་ནང་ཁུལ་དེབ་གཅིག་རྩོམ་སྒྲིག་གནང་ཡོད། མཐར་ཕྱི་ལོ་ ༡༩༩༩ ལོར་ཟུང་དྲུང་གནས་རིམ་ཐོག་རྒས་ཡོལ་ཞུས་རྗེས་ཨ་རིར་ནང་མི་ཟླ་བསྒྲིལ་ཁོངས་བསྐྱོད་དེ་ཚེ་མཇུག་ནང་མི་བུ་ཕྲུག་མཉམ་རྒས་ཡོལ་ཚུལ་དུ་བཞུགས།
དུས་ཡུན་དེའི་རིང་ཁོང་ནས་ལྷོད་ཞུགས་མི་གནང་བར་བོད་ཀྱི་གཏམ་དཔེ་ཕྱོགས་བསྒྲིགས་དང་དཔར་བསྐྲུན་གནང་བ་སོགས་རྒྱུན་དུ་བོད་དོན་ལ་ཐུགས་སྣང་ཅན་ཞིག་ཡིན་ཅིང་། ཁོང་ནི་རྒྱུན་དུ་མི་གཤིས་བཟང་ལ། ལས་རོགས་ཚོའི་མཉམ་ཐུགས་གཤིབས་བདེ་བ་བཅས་བཟང་སྤྱོད་ཀྱི་མི་གཤིས་ལྡན་ཞིང་། རྒྱལ་གཅེས་ཀྱི་དགོངས་པ་རྨ་མེད་ཅན་ཞིག་ཀྱང་ཡིན། ཁྱོན་མི་ལོ་ ༤༠ ཙམ་རིང་བོད་བསྟན་སྲིད་དོན་དུ་ཞབས་ཞུ་རྣམ་དག་གྲུབ་པའི་རྒྱལ་གཅེས་པ་རྒན་གྲས་ཤིག་ཀྱང་ཡིན། འོན་ཀྱང་ལྡོག་ཏུ་མེད་པའི་སྐྱེ་རྒ་ན་འཆི་ནི་སྐྱེ་བོ་ཀུན་ལ་ལྷན་སྐྱེས་སུ་ཡོད་པ་བཞིན། ཕྱི་ལོ་ ༢༠༡༠ ལོ་མཇུག་ནས་བཟུང་ཁོང་ཉིད་སྐུ་ཁམས་མི་བདེ་བ་བྱུང་འཕྲལ། བཞུགས་སྒར་དུ་ངོ་བཅར་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་སྩལ་གྱི་སྐལ་བཟང་གོ་སྐབས་ཐོབ་ཡོད། མཐར་ཕྱི་ལོ་ ༢༠༡༡ ཟླ་ ༤ ཚེས་ ༡༨ ཉིན་ཨ་རིར་སྐུ་ཚེའི་འཕེན་པ་རྫོགས་པར་བདེ་སྲུང་ལས་ཁུངས་ཀྱི་ལས་བྱེད་འགོ་ལས་ཡོངས་ནས་མྱ་ངན་གྱི་གུས་འདུད་ཞུ་རྒྱུ་དང་ཤུལ་ལུས་བཟའ་མི་བུ་ཕྲུག་ཡོངས་ལ་ཐུགས་གསོ་ཞུ་རྒྱུ་མ་ཟད།
དམ་པ་དེ་སྐུ་འཚོ་བཞུགས་རིང་བོད་བསྟན་སྲིད་དོན་ལས་དོན་ཞུ་སྒོའི་ཐད་ལྷག་བསམ་རྣམ་དག་གི་དམ་བཅའ་བརྟན་པོས་མི་ལོ་ཧྲིལ་པོ་ ༤༠ ལྷག་ཙམ་རིང་ཞབས་ཞུ་རྣམ་དག་གྲུབ་སྟེ་མི་ཚེའི་བཟང་མཐའ་འཁྱོལ་བའི་གཞུང་ཞབས་རྒན་གྲས་ཤིག་ཡིན་པར་བརྟེན་བོད་གཞུང་བདེ་སྲུང་ལས་ཁུངས་ནས་ཁོང་གི་བྱས་རྗེས་ལ་ཡི་རང་བསྔགས་བརྗོད་དང་འབྲེལ་ཚེ་རབས་ཕྲེང་བར་འཕགས་མཆོག་ཕྱག་ན་པདྨོས་རྗེས་སུ་བཟུང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག་པ་བཅས།།
