༢༠༡༡ ཟླ་ ༤ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༤ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་སྐྱེ་རྒུ་མདོར་ས་ཡོམ་གདུང་སེམས་མཉམ་སྐྱེ་ཚོགས་ཆུང་ནས་གོ་སྒྲིག་ཐོག་བོད་མདོ་སྨད་སྐྱེ་རྒུ་མདོར་ས་ཡོམ་གྱི་གོད་ཆག་ཚབས་ཆེན་ཕོག་སྟེ་ལོ་གཅིག་འཁོར་བའི་མྱ་ངན་ལོ་མཆོད་དང་སྟབས་བསྟུན་སྨོན་ལམ་མཆོད་འབུལ་རྒྱ་ཆེ་ཞིག་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༨ པའི་ཐོག་སྟག་ལུང་ཞབས་དྲུང་རིན་པོ་ཆེ་མཆོག་དང། རྣམ་རྒྱལ་གྲྭ་ཚང་གི་མཁན་ཟུར། དགེ་འདུན་འདུས་མང་། དེ་བཞིན་བཞུགས་སྒར་དུ་གནས་འཁོད་ཆོས་ལུགས་རིས་མེད་ཀྱི་གྲྭ་བཙུན་སྔགས་གསུམ་དང་། སེར་སྐྱ་མི་མང་བརྒྱ་ཕྲག་བརྒལ་བ་ལྷན་འཛོམས་ཀྱིས་མདོ་ཁམས་སྐྱེ་རྒུ་མདོར་ལོ་རྒྱུས་སྟེང་བྱུང་མྱོང་མེད་པའི་འབྱུང་བའི་གནོད་འཚེས་རང་རིགས་གཞིས་ལུས་སྤུན་ཟླའི་ཚེ་སྲོག་བརླག་པའི་གོད་ཆག་ཚབས་ཆེན་ཕོག་སྟེ། དེ་རིང་ལོ་གཅིག་ཧྲིལ་པོ་འཁོར་བའི་མྱ་ངན་འདས་མཆོད་དང་སྟབས་བསྟུན་འབྱུང་བའི་གོད་ཆག་འོག་རྐྱེན་འདས་སུ་གྱུར་པ་རྣམས་ཀྱི་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་སྟེ། དལ་རྟེན་རིམ་བརྒྱུད་སྐུ་བཞིའི་ཡེ་ཤེས་ལྔ་ལྡན་གྱི་གོ་འཕང་རིན་པོ་ཆེ་མྱུར་དུ་ཐོབ་ཆེད་དང་། ཕྱོགས་མཚུངས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་འབྱུང་གཞིའི་འཇིག་པ་མི་འབྱུང་བར་བདེ་སྐྱིད་རྫོགས་ལྡན་དཔལ་ལ་ལོངས་སྤྱོད་ཐུབ་སླད། རྟེན་མཆོག་སྤྱན་སྔར་མཆོད་སྤྲིན་སྟོང་ཚར་དང་འཕགས་མཆོག་འདུས་པ་རྒྱ་མཚོར་བསྙེན་བཀུར་མང་ཇ། དགེ་བཙུན་སྔགས་གསུམ་ལ་སྐུ་འགྱེད་བཅས་འབུལ་ལམ་ཞུས་ཏེ་ལོ་མཆོད་སྨོན་ལམ་ཚོགས་ཡོད་པ་བཅས། །