༢༠༡༡ ཟླ་ ༤ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༧ རེས་གཟའ་ཕུར་བུའི་ཉིན་ཡུ་རོབ་གྲོས་ཚོགས་འཐུས་མི་རྣམས་ཀྱིས་བལ་ཡུལ་སྲིད་གཞུང་གིས་བལ་ཡུལ་ནང་གནས་སྡོད་བོད་མི་བཙན་བྱོལ་བ་ ༢༠༠༠༠ ཙམ་ཡོད་པ་རྣམས་ཀྱི་མང་གཙོ་དང་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་གྲོས་ཆོད་བཞག་ཡོད། དེ་ཡང་ཡུ་རོབ་གྲོས་ཚོགས་ཀྱིས་བལ་ཡུལ་ནང་རྟེན་གཞི་བྱས་པའི་ཡུ་རོབ་གྲོས་ཚོགས་ཀྱི་ཆེས་མཐོའི་སྐུ་ཚབ་ལྕམ་སྐུ་ཀེ་ཐེ་རིན་ (Catherine Ashton) མཆོག་ལ་བཀོད་མངགས་གནང་དོན། བལ་ཡུལ་སྲིད་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་ནང་གསལ་ལྟར་བལ་ཡུལ་ནང་བོད་མི་སྐྱབས་བཅོལ་བ་རྣམས་ལ་འགྲོ་བ་མིའི་ཐོབ་ཐང་སྤྲོད་ཀྱི་ཡོད་མེད་རྟོག་ཞིབ་ནན་པོ་བྱེད་རྒྱུ་དང་།
བལ་ཡུལ་ཉེན་རྟོག་པས་བོད་མི་གང་བྱུང་འཛིན་བཟུང་དང་བོད་མིའི་སྐད་འབོད་སོགས་ལ་དམ་བསྒྲགས་བྱེད་རྒྱུ།
དེ་བཞིན་དུས་ཆེན་ཁག་ལ་བོད་མི་ཚང་འཛོམས་བྱེད་རྒྱུར་དམ་བསྒྲགས་བྱས་པ་སོགས་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གཞི་རྩའི་ཁྲིམས་ལུགས་དང་འགལ་བ་ཡིན་སྐོར་འཁོད་ཡོད་པ་མ་ཟད། གྲོས་ཆོད་ནང་ཉེ་ལམ་ཟླ་ ༣ ཚེས་ ༢༠ ཉིན་བཙན་བྱོལ་བོད་མི་ཚོས་བཀའ་བློན་ཁྲི་པ་དང་གྲོས་ཚོགས་ཀྱི་འཐུས་མི་འོས་བསྡུ་བྱེད་སྐབས་བལ་ཡུལ་སྲིད་གཞུང་གིས་དམ་བསྒྲགས་བྱས་ཏེ་བོད་མི་རྣམས་འོས་བསྡུ་བྱེད་མ་བཅུག་པའི་གནས་སྟངས་རྣམས་གསལ་སྟོན་བྱས་ཡོད།
ཕྱོགས་མཚུངས་བལ་ཡུལ་ནང་སྲིད་ལ་རྒྱ་ནག་གཞུང་གིས་ཐེ་བྱུས་བྱས་པར་ཡུ་རོབ་གྲོས་ཚོགས་ལ་སེམས་འཚབ་ཡོད་པའི་རྣམ་པ་ཤུགས་ཆེ་བསྟན་པ་མ་ཟད། ཡུ་རོབ་གྲོས་ཚོགས་ཀྱིས་རྒྱ་ནག་དབུས་གཞུང་དང་བལ་ཡུལ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ལ་བལ་ཡུལ་ནང་སྲིད་ལ་ཐེ་བྱུས་བྱས་པར་སྐྱོན་བརྗོད་ཐོག་རྒྱ་ནག་གཞུང་གིས་བལ་ཡུལ་ནང་སྲིད་ལ་ཐེ་བྱུས་དང་གནོན་ཤུགས་སྤྲོད་རྒྱུ་མཚམས་འཇོག་བྱེད་དགོས་པའི་རེ་འདུན་ཤུགས་ཆེ་བཏོན་ཡོད།
དེ་བཞིན་བལ་ཡུལ་སྲིད་གཞུང་གིས་ཕྱི་ལོ ༢༠༡༡ ཟླ་ ༥ ཚེས་ ༢༨ ཉིན་གཏན་ལ་འབེབས་རྒྱུའི་བལ་ཡུལ་གཞུང་གི་རྩ་ཁྲིམས་གསར་པ་དེའི་ནང་སྨྲ་བརྗོད་རང་དབང་དང་འགྲོ་བསྐྱོད་རང་དབང་། འོས་ཤོག་འཕེན་རྒྱུའི་ཐོབ་ཐང་། ཆོས་དད་རང་དབང་སོགས་ངེས་པར་དུ་བཀོད་དགོས་པའི་རེ་འདུན་ཡང་བཏོན་ཡོད་པ་བཅས།།
