༢༠༡༡ ཟླ་ ༤ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༢༠ ཉིན་རྡ་ས་བཞུགས་སྒར་གངས་སྐྱིད་དཔེ་མཛོད་ཚོགས་ཁང་དུ་བོད་གཞུང་འཕྲོད་བསྟེན་ལས་ཁུངས་ཀྱིས་གོ་སྒྲིག་ཐོག་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ལྔ་པ་དང་བོད་མིའི་སྨན་བཅོས་ལྟ་སྐྱོང་ལས་གཞིའི་ཚོགས་འདུ་ཚོགས་པ།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་དང་། དྲུང་ཆེ་དབང་ཕྱུག་ཕ་ཟུར་ལགས། བོད་མི་མང་སྤྱི་འཐུས་དང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། དྲུང་འཕར་སྟོབས་རྒྱལ་ཚེ་རིང་ལགས། ཕྱོགས་མཐའི་སྨན་ཁང་ཁག་གི་འགན་འཛིན་དང་སྨན་པ། འཕྲོད་བསྟེན་འབྲེལ་ཡོད་ལས་བྱེད་བཅས་མི་གྲངས་ ༤༠ བརྒལ་བ་ལྷན་འཛོམས་ཀྱིས་ཐོག་མར་འཕྲོད་བསྟེན་དྲུང་ཆེས་ཚོགས་བཅར་བ་རྣམས་ལ་འཚམས་འདྲི་དང་ངོ་སྤྲོད་གསུང་བཤད་གནང་གྲུབ་མཚམས་འཕྲོད་བསྟེན་བཀའ་བློན་མཆོག་གིས་ཚོགས་བཅར་བ་ཡོངས་ལ་འཚམས་འདྲི་ཞུས་པ་དང་ཆབས་ཅིག་གསུང་བཤད་གནང་དོན། ང་རང་ཆ་བཞག་ན་ཕྱི་ལོ་ ༡༩༨༢ ཙམ་ནས་རྡ་སར་ལས་ཀ་བྱས་ནས་བསྡད་མྱོང་། ཕྱི་ལོ་ ༡༩༩༢ ཙམ་ནས་ཕྱི་རྒྱལ་དུ་ཕྱིན་པ་ཡིན།
སྐབས་དེ་དུས་རྒྱ་གར་ནང་འཕྲོད་བསྟེན་ལས་ཁུངས་ཙམ་མིན་པར་བོད་གཞུང་སྤྱིའི་སྒྲིག་འཛུགས་དེ་ཚགས་ཚུད་དང་ཡག་པོ་ཡོད་པ་རེད་དྲན་ཏེ་གདེང་སྤོབས་ཡོད། དེ་ནས་འདིར་དངོས་སུ་ལས་ཁུར་ཞུས་ཏེ་གཞིས་ཆགས་ཁག་ནང་སྐོར་བསྐྱོད་དང་རྟོག་ཞིབ་བྱེད་སྐབས་དངོས་གནས་སྒྲིག་འཛུགས་ཚུལ་དང་ལྡན་པ་དང། འགན་ཁུར་མཁན་ཚོ་ཡིན་ནའང་ཧུར་ཐག་འབད་ཐག་གནང་གི་ཡོད་པ་དངོས་སུ་མཐོང་སྐབས་དགའ་སྤོབས་དེ་བས་ཆེ་བ་སྐྱེས་བྱུང། ང་ཚོའི་ལས་ཀ་ཚགས་ཚུད་ཡོང་རྒྱུར་འབྲེལ་ཡོད་ལས་བྱེད་ཚོས་སོ་སོའི་གནས་བབ་ཤེས་པའི་ཐོག་ནས་ཕྱག་ལས་གནང་ན་ནུས་པ་ལྡན་པ་ཞིག་ཡོང་གི་རེད། ཕྱག་ལས་གང་གནང་ཡང་སྤྲོ་སྣང་ལྡན་པའི་ཐོག་གནང་ན་སྙིང་སྟོབས་སྐྱེས་ཀྱི་རེད། སྤྲོ་བ་དང་སྙིང་སྟོབས་ཟུང་དུ་འབྲེལ་ནས་ཕྱག་ལས་གནང་ན་ལམ་ལྷོང་ཡོང་རྒྱུ་དང་འབྲས་བུ་སྨིན་རྒྱུ་ཉག་གཅིག་རེད། ད་བར་ང་ཚོས་ཕྱག་ལས་གང་གནང་ཡོད་པ་དེར་བསྐྱར་ཞིབ་ཚོགས་འདུ་འདིའི་ཐོག་བསྐྱར་ཞིབ་གནང་གི་རེད། ས་གནས་སུ་ཡོད་པའི་འཕྲོད་བསྟེན་ལས་བྱེད་ཡོངས་ནས་ཕྱག་ལས་ལ་སྤྲོ་བ་དང་ལྷག་བསམ་ཡོད་པའི་ཐོག་ནས་དུས་རྣམ་པ་ཀུན་ཏུ་ལྷོད་གཡེང་མ་འགྲོ་བ་ཞིག་ངེས་པར་དུ་གནང་དགོས་ཀྱི་རེད་ཅེས་འབོད་སྐུལ་ཞུ་གི་ཡིན། ཞེས་དང། ཡང་ཁོང་གིས་གསུང་དོན། བོད་གཞུང་བདེ་ལེགས་སྨན་ཁང་དང་སྨན་རྩིས་ཁང་ལྟ་བུར་ཆ་བཞག་ན་གང་འཚམ་གྱི་ཟུང་འབྲེལ་ཐོག་ཕྱག་ལས་གནང་བཞིན་ཡོད་པ་ལྟར་དེའི་ཐོག་ཤུགས་སྐྱོན་རྒྱུ་ཧ་ཅང་གལ་ཆེན་པོ་ཡིན། མ་འོངས་པར་སྨན་ཁང་ཆེ་ཁག་གི་ནང་བོད་ལུགས་དང་ཕྱི་ལུགས་ཟུང་འབྲེལ་གྱི་སྡེ་ཚན་ཐ་དད་ཅིག་འཛུགས་ཐུབ་ཀྱི་ཡོད་མེད་སྐོར་གོ་བསྡུར་གནང་རྒྱུ་གནད་འགག་ཆགས་ཀྱི་འདུག དེ་ནས་ང་ཚོའི་འདས་པའི་གྲོས་ཆོད་ཁག་ལ་ཕྱི་མིག་བལྟས་ན་ནད་གཞི་བྱེ་བྲག་པ་དེ་དག་འགོག་ཐབས་དང་བཅོས་ཐབས་སོགས་ཀྱི་ཐོག་བཀའ་བསྡུར་ཡག་པོ་བྱུང་འདུག དེ་བཞིན་འཕྲོད་བསྟེན་ལས་ཁུངས་ཀྱི་ངོས་ནས་ཀྱང་དེའི་ཐོག་མཇུག་སྣོན་ཞུ་རྒྱུའི་འབད་བརྩོ༞ན་ཞུ་བཞིན་ཡོད། འོན་ཀྱང་ཁྱོན་ཡོངས་ཀྱི་སྔོན་འགོག་གི་ཐོག་གོ་བསྡུར་དེ་ཙམ་ཕྱིན་མེད་པར་བརྟེན། དེ་རིང་འདིར་ཕེབས་པའི་ཕྱི་བོད་ཟུང་འབྲེལ་གྱི་སྨན་པ་དང་འཕྲོད་བསྟེན་སྨན་ཁང་གི་འགན་འཛིན་རྣམ་པས་ཁྱོན་ཡོངས་ཀྱི་སྔོན་འགོག་བྱེད་ཕྱོགས་ཐོག་འབད་བརྩོན་གནང་རྒྱུ་ཡོད་མེད་དགོངས་པ་བཞེས་རྒྱུ་གལ་ཆེན་པོ་མཐོང་བྱུང་། ཉིན་གཉིས་རིང་འདས་པའི་ཕྱག་ལས་གནང་བའི་ཐོག་བསྐྱར་ཞིབ་བྱས་ཏེ་འཐུས་ཤོར་ཕྱིན་པ་དེ་དག་ཡར་རྒྱས་ཇི་ལྟར་གཏོང་དགོས་མིན་དང། ད་ལྟ་འགྲོ་བཞིན་པའི་ལས་རིམ་ཐོག་ཇི་ལྟར་བསྐྱོད་དགོས་མིན་བཅས་ཀྱི་ཐོག་དགོངས་པ་བཞེས་རྒྱུ་གལ་ཆེན་པོ་རེད་ཅེས་གསུང་བཤད་གནང་སྟེ་ཚོགས་འདུ་མུ་མཐུད་ཚོགས་ཡོད།
ད་ཐེངས་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ལྔ་པ་དེར་སྔོན་གྱི་ཚོགས་ཐེངས་བཞི་པའི་གྲོས་ཆོད་ཁག་ལ་བསྐྱར་ཞིབ་དང་གསོ་རིག་བོད་སྨན་དང་ཕྱི་ལུགས་སྨན་བཅོས་དབར་ཟུང་འབྲེལ་གྱི་ཡར་རྒྱས་གཏོང་ཕྱོགས་ཇི་དགེའི་སྐོར། དེ་བཞིན་ཀྲི་སྦི་དང་མཆིན་པའི་གཉན་ཚད། སྨྱོ་རྫས་ཆང་རག་ལང་ཤོར་དང་གཉན་ནད་རེག་དུག ཚ་བ་འདར་ཚད། ཕོ་སྐྲན། ཁྲག་ཤེད། མ་དང་བྱིས་པའི་འཕྲོད་བསྟེན། དབང་པོ་སྐྱོན་ཅན་ལ་ལྟ་སྐྱོང་། མང་ཚོགས་ལ་ནད་རིགས་སྔོན་འགོག་ཐབས་བྱུས་ཡར་རྒྱས་གཏོང་ཕྱོགས་ཇི་དགེའི་སྐོར་བཅས་ལ་བགྲོ་གླེང་དང་། ས་གནས་སོ་སོའི་གཞི་རིམ་མང་ཚོགས་ཀྱི་འཕྲོད་བསྟེན་ཡར་རྒྱས་གཏོང་ཕྱོགས། སྨན་བཅོས་ལྟ་སྐྱོང་ལས་གཞི་ལག་བསྟར་གནང་ཕྱོགས། དེ་བཞིན་མཇུག་ཏུ་ཕྱོགས་མཐའི་སྨན་ཁང་ཁག་གི་འཛིན་སྐྱོང་སྐོར་བཅས་ལ་དམིགས་བསལ་ཚོགས་འདུ་ཉིན་གཉིས་རིང་འཚོགས་རྒྱུ་ཡིན་འདུག་པ་བཅས། །
