༢༠༡༡ ཟླ་ ༤ ཚེས་ ༡༡ རེས་གཟའ་ཟླ་བ།
༅༅། །ཕྱི་ལོ་ ༢༠༡༡ ཟླ་ ༤ ཚེས་ ༣ དང་ ༤ བཅས་ཉིན་གྲངས་གཉིས་རིང་ཕྱི་དྲིལ་འགྲེམས་སྟོན་ཚན་པས་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པར་བོད་དོན་དང་འབྲེལ་བའི་པར་རིགས་འགྲེམས་སྟོན་གནང་སྟེ། རྒྱ་གར་བྱང་ཤར་ཁུལ་དུ་འགྲེམས་སྟོན་གྱི་ལས་རིམ་མཇུག་སྒྲིལ་གནང་ཡོད། དེ་ཡང་གོང་ཚེས་ཉིན་རྟ་དབང་མི་མང་ ༡༥༠༠ ཙམ་འདུ་འཛོམས་ཐོག་ཕ་ཡུལ་ཕྱོགས་ལ་རྒྱང་ལྟ་དང་། བཙན་བྱོལ་ནང་གི་འགྲུལ་བཞུད། དེ་བཞིན་འདས་པ་དང་ད་ལྟའི་བོད་ནང་གི་གནས་སྟངས་སོགས་ཀྱི་སྐོར་གྱི་པར་རིགས་ཀྱི་ལམ་ནས་འགྲེམས་སྟོན་གནང་ཡོད་པ་མ་ཟད། ཕྱི་ཚེས་ ༤ ཉིན་གྱི་ཕྱི་དྲོར་རྟ་དབང་དགོན་པའི་ཚོགས་ཁང་དུ་བོད་དོན་དང་འབྲེལ་བའི་དངོས་བྱུང་གློག་བརྙན་ཡང་བསྟན་ཡོད། སྐབས་དེར་མང་ཚོགས་ཀྱིས་པར་རིགས་འགྲེམས་སྟོན་ལ་བསྔགས་བརྗོད་གནང་བ་དང་ལྷན། དེ་ལྟ་བུའི་འགྲེམས་སྟོན་མུ་མཐུད་གནང་དགོས་པའི་འབོད་སྐུལ་ཡང་ཞུས་འདུག སྤྱིར་རྟ་དབང་ཁུལ་དུ་པར་རིགས་འགྲེམས་སྟོན་དེ་རྟ་དབང་དགོན་པའི་མགྲོན་འབོད་གནང་བ་དང། མངའ་སྡེ་གྲོས་ཚོགས་ཀྱི་འཐུས་མི་སྐུ་ཞབས་ཚེ་དབང་དོན་གྲུབ་ལགས་ཀྱིས་རྒྱབ་སྐྱོར་གནང་བར་བརྟེན་ནས་བྱུང་བ་ཞིག་ཡིན།
འདི་ལོའི་ཕྱི་ཟླ་ ༣ ཚེས་ ༡༨ ནས་བཟུང་ཕྱི་དྲིལ་འགྲེམས་སྟོན་ཚན་པས་རྒྱ་གར་བྱང་ཤར་ཁུལ་གྱི་བོད་མིའི་གཞིས་ཆགས་མེའོ་ཆོས་འཕེལ་གླིང་དང། ཏི་ཛུ་དར་རྒྱས་གླིང། བསྟན་འཛིན་སྒང། འབུམ་ལ། རྟ་དབང་བཅས་སུ་བོད་དོན་དང་འབྲེལ་བའི་པར་རིགས་འགྲེམས་སྟོན་དང་དངོས་བྱུང་གློག་བརྙན་ཁག་བསྟན་ཡོད་པ་བཅས།།
