༢༠༡༡ ཟླ་ ༤ ཚེས་ ༤ རེས་གཟའ་ཟླ་བ།
༅༅། །འདི་གར་ཕྱི་དྲིལ་འགྲེམས་སྟོན་ཚན་པས་འབུམ་ལ་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༣ ཚེས་ ༣༡ ནས་ཟླ་ ༤ ཚེས་ ༡ བར་ཉིན་གྲངས་གཉིས་རིང་འབུམ་ལ་བོད་མིའི་གཞིས་ཆགས་སུ་བོད་གཞུང་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པས་བཙན་བྱོལ་ནང་གི་འགྲུལ་བཞུད། ཕ་ཡུལ་ཕྱོགས་ལ་རྒྱང་ལྟ། ཞེས་པའི་པར་རིགས་འགྲེམས་སྟོན་གོ་སྒྲིག་གནང་ཡོད། དེ་ཉིན་སྔ་དྲོ་ཆུ་ཚོད་ ༡༠།༠༠ ཐོག་འབུམ་ལ་དང་བསྟན་སྒང་ས་གནས་འགོ་འཛིན་རྡོ་རྗེ་རིག་འཛིན་ལགས་ཀྱིས་སྐུ་མགྲོན་རྣམ་པར་འཚམས་འདྲི་ཞུས་པ་དང་ཆབས་ཅིག་འགྲེམས་སྟོན་གྱི་ལས་རིམ་སྐོར་ངོ་སྤྲོད་སྙིང་བསྡུས་ཤིག་གནང་། དེ་ནས་ཕྱི་དྲིལ་འགྲེམས་སྟོན་ཚན་པའི་ལས་བྱེད་བཀྲ་ཤིས་ཕུན་ཚོགས་ལགས་ཀྱིས་པར་རིགས་འགྲེམས་སྟོན་སྐོར་དང། བོད་མིའི་གཞིས་ཆགས་ཁག་གི་ནང་པར་རིགས་འགྲེམས་སྟོན་གནང་དགོས་པའི་དམིགས་ཡུལ་སོགས་ཀྱི་སྐོར་གསལ་བཤད་གནང་རྗེས་སྐུ་མགྲོན་གཙོ་བོ་དགོན་རྩེ་དགའ་ལྡན་རབ་རྒྱས་གླིང་མ་དགོན་གྱི་མཁན་རིན་པོ་ཆེས་འགྲེམས་སྟོན་དབུ་འབྱེད་གནང་། ཉིན་གཉིས་རིང་གི་པར་རིགས་འགྲེམས་སྟོན་དེར་གཞིས་མི་རྣམས་དང་། དགེ་འདུན་པ། དེ་བཞིན་རྒྱ་གར་གསང་བའི་ལས་ཁུངས་ཀྱི་ལས་བྱེད་བཅས་ཁྱོན་མི་གྲངས་ ༡༠༠༠ བརྒལ་བས་འགྲེམས་སྟོན་ལྟ་བར་ཡོང་བ་མ་ཟད། སྐབས་དེར་མང་ཚོགས་ཀྱིས་པར་རིགས་འགྲེམས་སྟོན་ལ་བསྔགས་བརྗོད་གནང་བ་དང་ལྷན། དེ་ལྟ་བུའི་འགྲེམས་སྟོན་མུ་མཐུད་གནང་དགོས་པའི་འབོད་སྐུལ་ཡང་ཞུས་འདུག དེ་བཞིན་ཉིན་གྲངས་གཉིས་རིང་ཕྱི་དྲོའི་སྐབས་དགོན་རྩེ་དགའ་ལྡན་རབ་རྒྱས་གླིང་མ་དགོན་གྱི་དགེ་འདུན་པ་དང། ཐུབ་མཆོག་དགའ་ཚལ་གླིང་དགོན་པའི་དགེ་འདུན་པ། གཞན་ཡང་གཞིས་མི་བཅས་ལ་བོད་དོན་དང་འབྲེལ་བའི་དངོས་བྱུང་གློག་བརྙན་ཁག་གཅིག་ཀྱང་མང་ཚོགས་ལ་བསྟན་ཡོད་པ་བཅས།།
