༢༠༡༡ ཟླ་ ༤ ཚེས་ ༡༩ རེས་གཟའ་མིག་དམར།
༄༅། །འདི་གར་བོད་གཞུང་ཐེ་ཝན་སྐུ་ཚབ་དོན་ཁང་ནས་ཕྱི་ལོ་ ༢༠༡༡ ཟླ་ ༤  ཚེས་ ༡༩ ཉིན་བཏང་གནས་ནང་འཁོད་དོན།  བོད་ནང་གནས་སྟངས་ཆེས་ཛ་དྲག་ཏུ་འགྲོ་བཞིན་པ་དང་། ལྷག་དོན་ཉེ་བའི་ཆར་བོད་མདོ་སྨད་རྔ་བ་ཁུལ་དུ་ཆེས་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། བོད་བསྟན་སྲིད་མི་རིགས་ཀྱི་ཆེད་དུ་རྔ་པ་ཀིརྟི་དགོན་པའི་དགེ་འདུན་པ་་ཕུན་ཚོགས་ལགས་སོགས་ཀྱིས་རང་གི་ཚེ་སྲོག་བློས་གཏོང་གནང་བ་དང་། ད་དུང་ས་གནས་བོད་མི་རྣམས་ནས་དཀའ་སྡུག་ཚད་མེད་མྱངས་དང་མྱོང་བཞིན་པའི་གནས་སྟངས་ཆེས་ཛ་དྲག་ཏུ་འགྲོ་བཞིན་ཡོད་པར་གདུང་སེམས་མཉམ་སྐྱེའི་ཆེད། ཕྱི་ཟླ་ ༤ ཚེས་ ༡༨ དགོང་དྲོར་བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་གོ་སྒྲིག་དང་། བལ་ཡུལ་ནས་ཐེ་ཝན་དུ་ཆོས་འབྲེལ་ལ་ཕེབས་པའི་གྲུབ་ཐོབ་རིན་པོ་ཆེ་གདན་ཞུས་ཐོག་དོན་གཅོད་ལས་ཁུངས་ཀྱི་མཆོད་ཁང་ནང་ཁྱོན་མི་གྲངས་བརྒྱ་སྐོར་ཙམ་མཉམ་འཛོམས་དང་། དོན་གཅོད་ལས་ཁུངས་ཀྱི་ཆོས་དགེ་དགེ་བཤེས་འཇམ་དཔལ་ཆོས་འཛིན་ལགས་ནས་སྨོན་ལམ་མཆོད་འབུལ་ཞུ་དགོས་པའི་ངོ་སྤྲོད་མདོར་བསྡུས་གནང་རྗེས། འདས་གསོན་དེ་དག་གི་ཆེད་དུ་མ་ཎི་ཡིག་དྲུག་གསོག་སྒྲུབ་ཀྱི་ཐོག་ནས་བསྔོ་སྨོན་དང་མཆོད་འབུལ་རྒྱ་ཆེ་གནང་ཡོད་འདུག