༢༠༡༡ ཟླ་ ༤ ཚེས་ ༡༤ རེས་གཟའ་ཕུར་བུ།
༄༅། །སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༡ པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་རིན་པོ་ཆེ་སྤྱི་སྩལ་དགོངས་དོན་ཉམས་ལེན་ཞུ་ཕྱོགས་སྐོར་ད་ལམ་གྲོས་ཚོགས་དེ་གའི་ཐོག་གྲོས་ཆོད་ཨང་ ༢༠༡༡།༡༤།༡༡།༧ འཁོད་པ་གཏན་འབེབས་གནང་བའི་དོན་ཚན་ ༣  པ་ནང་གསལ་ལྟར་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ ༢༠༡༡ རྡ་སྟེང་བོད་ཕྲུག་ཁྱིམ་སྡེའི་ཚོགས་ཁང་གསར་པའི་ནང་ཕྱི་ལོ་ ༢༠༡༡ ཟླ་ ༥ ཚེས་ ༢༡ ནས་ ༢༣ བར་ཉིན་གསུམ་རིང་འཚོགས་གཏན་འཁེལ་བ་ལྟར་བཀའ་ཟུར་རྣམ་པ་དང་། བོད་མི་མང་སྤྱི་འཐུས་ཟུར་པ་རྣམ་པ་ཚོགས་ཆེན་དུ་བཅར་དགོས་ལ་ཚོགས་བཅར་བརྡ་ཐོའི་ཐད་བཀའ་དྲུང་ཡིག་ཚང་དང་། སྐུ་ཚབ་དོན་གཅོད་ཁག ས་གནས་འགོ་འཛིན་ཁག་སོགས་བརྒྱུད་ཕུལ་ཡོད་ཀྱང་། གལ་ཏེ་དུས་ཐོག་འཕྲོད་འབྱོར་ཐུབ་མིན་བྱུང་ཚེ་གསལ་བསྒྲགས་འདི་ཐོག་རྩ་འཛིན་གྱིས་ཕྱི་ལོ་ ༢༠༡༡ ཟླ་ ༤ ཚེས་ ༣༠ ནང་ཚུད་ཚོགས་དྲུང་ལས་ཁུངས་སུ་མཚན་ཐོ་ངེས་འབུལ་དགོས་རྒྱུ། གལ་ཏེ་གོང་ཚེས་ནང་ཚུད་བརྡ་ལན་གང་ཡང་མ་འབྱོར་ཚེ་ཚོགས་ཞུགས་གནང་རྒྱུ་མིན་པར་ངོས་འཛིན་བྱ་རྒྱུ། ཚོགས་ཞུགས་གནང་མཁན་རྣམས་ནས་ཕྱི་ལོ་ ༢༠༡༡ ཟླ་ ༥ ཚེས་ ༢༠ སྔ་དྲོ་ཆུ་ཚོད་ ༩ པ་ནས་དགོང་དྲོ་ཆུ་ཚོད་ ༥ ནང་ཚུད་སྤྱི་ལྷན་ཚོགས་དྲུང་ལས་ཁུངས་སུ་འབྱོར་ཐོ་གནང་རྒྱུ། ཚོགས་བཅར་ལམ་གྲོན་སོགས་དོ་དག་སོ་སོ་ནས་གཏོང་གནང་ཡོང་ཐབས་དང་། གལ་ཏེ་གཏོང་དམིགས་མེད་ཚེ་བཀའ་ཟུར་དང་སྤྱི་ཟུར་ཚོགས་བཅར་བ་རྣམ་པར་ཚོགས་བཅར་ལས་རྒྱུན་ ༼༢༠༡༡ ཟླ་ ༥ ཚེས་ ༢༠ ནས་ཚེས་ ༢༤ ༽བར་བཞུགས་མཚེར་མགྲོན་ཁང་ཁུངས་སོ་སོས་ཐབས་འཚོལ་གནང་རྒྱུ་དང་། ཉིན་རེ་ཁང་དོད་དང་། ཉེ་འཁོར་ལམ་གྲོན་དོད་བཅས་འབུལ་རྒྱུ། ཚོགས་བཅར་ཚུར་ཕྱིར་ལམ་གྲོན་དང་། ཉིན་དོད་ཐོབ་ཐང་བཅས་བཀའ་བློན་དང་། སྤྱི་འཐུས་རྣམ་པའི་གོ་བབ་ལྟར་གཅིག་མཚུངས་འབུལ་རྒྱུ། གོང་གསལ་ཚོགས་བཅར་དུས་ཡུན་རིང་ལའང་ཉིན་དོད་ཐོབ་རྒྱུ། འགྲིམས་འགྲུལ་སྐབས་ཀྱི་གནུམ་གླ་དང་། འཁོར་གླ། མགྲོན་ཁང་གླ་སོགས་གཞུང་རྩིས་ནས་གནང་དགོས་རིགས་ལ་བྱུང་འཛིན་ངོ་མ་མ་གནང་ཚེ་རྩིས་ཞིབ་ལས་ཁང་ནས་རྩིས་འགྲོ་གཏོང་རྒྱུ་མིན་པ་མ་ཟད། ལྷག་པར་གནམ་ཐོག་ཕེབས་འཐུས་ཆོག་པ་རྣམས་ནས་ (Boarding Pass)བྱུང་འཛིན་མཉམ་ངེས་འབུལ་དགོས་རྒྱུ བཅས་དམ་དོན་ངེས་གནང་ཡོང་བ་ཕེབས་འདུག་པ་དེ་དོན་དགོངས་འཇགས་ཞུ།
ཚོགས་དྲུང་ལས་ཁུངས་ནས་ཕྱི་ལོ་ ༢༠༡༡ ཟླ་ ༤ ཚེས་ ༡༢ ལ་
ཕུལ།།