༢༠༡༡ ཟླ་ ༤ ཚེས་ ༡༨ རེས་་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༧ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་སུ་ཝི་ཌན་ཁུལ་གྱི་མཛད་འཕྲིན་གྱི་ཉིན་མཐའ་མའི་སྔ་དྲོ་ཐོག་མར་ལུཎྜ་གྲོང་ཁྱེར་གྱི་ཚོགས་ཁང་ཆེན་མོའི་ནང་སློབ་ཕྲུག་ ༢༥༠ ཙམ་འདུ་འཛོམས་ཐོག་བཀའ་སློབ་དང་སློབ་ཕྲུག་ཚོའི་དྲི་བར་བཀའ་ལན་ཡང་སྩལ་ཡོད། སློབ་ཕྲུག་དེ་རྣམས་སུ་ཝི་ཌན་གྲོང་ཁྱེར་འདྲ་མིན་ཁག་ ༥༠ ཙམ་ནས་སློབ་གྲྭ་འདྲ་མིན་ཁག་ ༦༠ ཙམ་ནས་ཕེབས་པ་དང་། སློབ་ཕྲུག་ཚོས་སྔ་ལོའི་ནང་སུ་ཝི་ཌན་ངལ་སེལ་ཚོགས་པ་(IM/SOIR) དང་ལྷན་ལས་འགུལ་འདྲ་མིན་བརྩམས་ཏེ་ཧི་མཱ་ལ་ཡི་རི་རྒྱུད་ཀྱི་སློབ་གྲྭ་ཁག་ལ་ཞལ་འདེབས་རོགས་རམ་བྱེད་རྒྱུའི་ལས་གཞི་དེར་མཉམ་ཞུགས་བྱས་ཡོད། དེ་ཡང་སྐབས་དེར་སློབ་ཕྲུག་རང་ལོ་ ༡༣ ནས་ ༡༩ བར་གྱི་དྲི་བ་ཁག་གཅིག་ལ་མགོན་པོ་གང་ཉིད་མཆོག་གིས་བཀའ་ལན་མཛད་ཡོད།

དེ་རྗེས་༸གོང་ས་མཆོག་ལུཎྜ་ཡེ་ཤུའི་ཚོགས་ཁང་དུ་རེས་གཟའ་ཉི་མའི་ཡེ་ཤུའི་སྨོན་ལམ་གསོལ་འདེབས་ཀྱི་ཚོགས་ཆེན་དུ་ཆིབས་སྒྱུར་སྐྱོང་སྐབས་ཡེ་ཤུའི་བླ་ཆེན་བྷི་ཤོབ་མཆོག་གིས་༸གོང་ས་མཆོག་ལ་ཕེབས་བསུ་ཞུས། སྐབས་དེར་ཡེ་ཤུའི་ལྷ་ཁང་དུ་སྨོན་ལམ་གསོལ་འདེབས་སུ་ཕེབས་མཁན་མི་གྲངས་ ༡༠༠༠ ཙམ་བྱུང་བ་དང་། སྨོན་ལམ་གསུང་འདོན་གྲུབ་མཚམས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཆོས་གྲོགས་ཕོ་མོ་ཚོ། ངོས་རང་དམིགས་བསལ་སྨོན་ལམ་གསུང་འདོན་གྱི་ཚོགས་ཆེན་འདིར་བཅར་ཐུབ་པར་ཆེ་མཐོང་ཧ་ཅང་ཆེན་པོ་ཐོབ་བྱུང་། ཚོགས་ཆེན་འདི་ལྟ་བུས་ཆོས་ལུགས་མཐུན་སྒྲིལ་ཡོང་རྒྱུར་ཕན་ཐོགས་ཡོང་གི་ཡོད། ཆོས་དད་བྱེད་རྒྱུ་དེ་ལྷ་ཁང་ནང་ཙམ་མིན་པར་ཕྱི་ལའང་ཁྱབ་ཐུབ་པ་ཞིག་དགོས། ཆོས་དད་བྱེད་རྒྱུ་དེ་ལྷ་ཁང་ཙམ་གྱི་ནང་ལུས་པ་ཡིན་ན་ཆོས་དེར་ནུས་པ་དེ་ཙམ་ཐོན་མི་ཐུབ་ཅེས་བཀའ་སློབ་སྩལ།
དེ་རྗེས་༸གོང་ས་མཆོག་ལ་སུ་ཝི་ཌན་ངལ་སེལ་ཚོགས་པས་གསོལ་སྟོན་འབུལ་ལམ་ཞུས་པ་དང་སྐབས་དེར་ཚོགས་པའི་(IM/SOIR) སྤྱི་ཁྱབ་དྲུང་ཆེས་༸གོང་ས་མཆོག་སུ་ཝི་ཌན་དུ་ཆིབས་སྒྱུར་བསྐྱངས་པར་བཀའ་དྲིན་ཆེ་ཞུས་ཡོད་པ་མ་ཟད།

མགོན་པོ་གང་ཉིད་མཆོག་གིས་ཀྱང་གསོལ་སྟོན་དགྱེས་བཞེས་མཛད་དེ་ཚོགས་པ་དེས་ད་བར་བཙན་བྱོལ་བོད་མིའི་སྒྲིག་འཛུགས་དང་བོད་མི་རྣམས་ལ་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་མཛད། གསོལ་སྟོན་གྲུབ་མཚམས་ངལ་སེལ་ཚོགས་མི་རྣམས་༸གོང་ས་མཆོག་གི་ལྷན་དུ་སྐུ་པར་བསྒྲོན།  དེ་རྗེས་༸གོང་ས་མཆོག་གིས་སུ་ཝི་ཌན་ཁུལ་གྱི་མཛད་འཕྲིན་ཁག་ལེགས་པར་གྲུབ་སྟེ་ཌན་མཱཀ་རྒྱལ་ས་ཀོ་པན་ཧཱ་གན་ (Copenhagen) ལ་ཆིབས་ཞལ་བསྒྱུར་ཡོད་པ་བཅས།།