༢༠༡༡ ཟླ་ ༣ ཚེས་ ༢༡ རེས་གཟའ་ཟླ་བ།
༅༅། །ཕྱི་ལོ་ ༢༠༡༡ ཟླ་ ༣ ཚེས་ ༡༦ ཉིན་ཨ་རིའི་གྲོས་ཚོགས་འོག་མའི་འཐུས་མི་ལྕམ་སྐུ་ཊེམ་མི་བྷལཌ་ཝིན་(Tammy Baldwin) གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུམ་བཅུའི་དུས་དྲན་ཉིན་སྩལ་བའི་གསུང་འཕྲིན་ཨ་རིའི་གྲོས་ཚོགས་ནང་འབུལ་སྐབས་གསུང་དོན། ཚོགས་གཙོ་མཆོག་གསུམ་པའི་བཅུ་ཉིན་ནི་བོད་མིས་རང་དབང་སྒེར་ལངས་བྱས་ཏེ་མི་ལོ་ ༥༢ འཁོར་བའི་དུས་དྲན་གྱི་ཉིན་ཞིག་ཡིན་པ་དང་། སྐབས་དེར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཀྱང་བཙན་བྱོལ་དུ་ཆིབས་སྒྱུར་བསྐྱངས་དགོས་བྱུང་ཡོད། དེ་ཉིན་ཨ་རིའི་གྲོང་ཁྱེར་མེ་ཌི་སོན་(Madison)ནང་ཡོད་པའི་དཔེ་མཛོད་ཁང་(Library Mall) ཞིག་གི་ནང་ཝི་སི་ཀོན་སིན་(Wisconsin) གྱི་བོད་པ་དང་ཨ་རིའི་ཚོགས་སྐྱིད་མི་མང་རྣམས་མཉམ་འཛོམས་ཐོག་གསུམ་བཅུའི་དུས་དྲན་སྲུང་བརྩི་ཞུས་སྐབས་ངའི་ལས་བྱེད་པ་ཞིག་མཛད་སྒོའི་ཐོག་མཉམ་ཞུགས་བྱེད་རྒྱུའི་གོ་སྐབས་བྱུང་ཡོད། དྲན་རྟེན་གྱི་ཉིན་མོ་འདིར་ངས་བཙན་བྱོལ་དུ་ཡོད་པའི་བོད་མི་དང་གཞིས་ལུས་རྒྱ་ཆེའི་མི་མང་རྣམས་ལ་རང་དབང་ཐོབ་པའི་ཡིད་ཆེས་དང་རྒྱབ་སྐྱོར་ཡོད། ངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་བོད་རྒྱའི་དཀའ་རྙོག་སེལ་ཐབས་གཉིས་སྨན་དབུ་མའི་ལམ་ལ་རྒྱབ་སྐྱོར་ཤུགས་ཆེ་ཡོད། ཨ་རིའི་གཞུང་ལ་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་ལ་རྒྱབ་སྐྱོར་བྱེད་དགོས་པའི་འགན་འཁྲི་ཡོད་པ་བཞིན་ཨ་རི་གཞུང་གིས་དེ་དག་ཐོག་རྒྱབ་སྐྱོར་གནང་བའི་ཡིད་ཆེས་བརྟན་པོ་ཡོད། ཅེས་གསུངས། ཡང་ཁོང་གིས་༸གོང་ས་མཆོག་གིས་ཆབ་སྲིད་ཀྱི་སྐུ་དབང་འོས་འདེམས་བྱས་པའི་འགོ་ཁྲིད་དེར་རྩིས་སྤྲོད་གནང་རྒྱུའི་ཐག་གཅོད་མཛད་པའི་ཐོག་གསུང་དོན། འཛམ་གླིང་ས་ཕྱོགས་གང་སར་གཅིག་སྡུད་དབང་འཛིན་པ་ཚོས་སོ་སོའི་མི་མང་གིས་མང་གཙོ་དོན་དུ་གཉེར་གྱི་་ཡོད་ཀྱང་ལྟ་བ་མཁྲེགས་འཛིན་ཐོག་དབང་ཆ་བཟུང་ནས་སྡོད་སྐབས། ༸གོང་ས་ཏཱ་ལའི་བླ་མ་མཆོག་གིས་གང་ཉིད་ཀྱི་ཆབ་སྲིད་ཀྱི་སྐུ་དབང་དོར་རྒྱུའི་དགོངས་བཞེས་མཛད་པ་དེར་འཛམ་གླིང་ཕྱོགས་ཡོངས་ལ་སེམས་འགུལ་ཐེབས་འོས་པ་ཞིག་རེད་ཅེས་གསུངས་ཡོད།།