༢༠༡༡ ཟླ་ ༣ ཚེས་ ༡༥ རེས་གཟའ་མིག་དམར།

༄༅། །འདི་གར་ཡུ་རོབ་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་ཀྱིས་བཏང་གནས་ནང་འཁོད་དོན། སུད་སི་དང་ལེཀ་ཊེན་སི་ཊན་(Liechtenstien)བོད་རིགས་མཐུན་ཚོགས་ཀྱིས་གྲོས་མགོ་བཏོན་པ་བརྒྱུད།  ཡུ་རོབ་མངའ་ཁུལ་གྱི་བོད་གཞུང་སྐུ་ཚབ་དོན་གཅོད་རྒྱ་རིགས་འབྲེལ་མཐུད་པ་བློ་བཟང་ཉི་མ་འབྲེལ་བ་གནང་སྟེ། ཕྱོགས་མཐའ་ནས་ཕེབས་པའི་བོད་མི་དམངས་ལ་རྒྱབ་སྐྱོར་གནང་མཁན་གྱི་མི་རིགས་མི་འདྲ་བ་བདུན་གྱི་མི་སྣ་དང་། རྒྱ་མི་རིགས་མང་གཙོ་དོན་གཉེར་བ། དེ་བཞིན་རྒྱ་རིགས་ཕྱི་སྡོད་སློབ་གྲྭ་བ་བཅས་ནས་ཉིན་གཉིས་ཀྱི་ལས་འགུལ་ནང་མཉམ་ཞུགས་གནང་ཡོད། དེ་ཡང་ཕྱི་ལོ་ ༢༠༡༡ ཟླ་ ༣ ཚེས་ ༩ ཉིན་ཡུ་རོབ་ཁུལ་གྱི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་དང་། སུད་སི་པོ་འར་ཉིང་བོད་རིགས་མཐུན་ཚོགས་ཀྱི་འགན་འཛིན་པ་སངས་དོན་གྲུབ་གཉིས་ནས་ད་ཐེངས་ལས་འགུལ་དེའི་འགན་འཁུར་གནང་བ་མ་ཟད། རྒྱ་རིགས་དང་། མན་ཇུའི་རིགས། སོག་རིགས། ཡའོ་རིགས་སོགས་དང་བགྲོ་གླེང་ཞིབ་ཚགས་གནང་ཡོད། ལས་འགུལ་དེར་མཉམ་ཞུགས་གནང་མཁན་གྱི་རྒྱ་མི་རིགས་སོགས་ནས་༸གོང་ས་མཆོག་གི་དགོངས་གཞིར་ཆེ་བསྟོད་ཞུས་པ་མ་ཟད། རྒྱབ་སྐྱོར་དང་གཞོགས་འདེགས་ཞུ་རྒྱུ་ཡིན་ཞེས་ཡོད་གསུངས།  ཕྱོགས་མཚུངས་ཕྱི་ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༡༡ ཐོག་བོད་རིགས་མཐུན་ཚོགས་ཀྱིས་གོ་སྒྲིག་འོག་རྒྱ་རིགས་སྐུ་ཚབ་ཚོ་དང་དེ་བཞིན་མི་རིགས་གཞན་པའི་སྐུ་ཚབ་རྣམས་དང་ལྷན་སུད་སི་དང་། ལེཀ་ཊེན་སི་ཊན་བཅས་སུ་གསུམ་བཅུའི་དུས་དྲན་གྱི་ལས་འགུལ་ནང་མཉམ་ཞུགས་གནང་ཡོད། ཚོགས་ཐོག་ཏུ་རྒྱ་རིགས་མང་གཙོ་དོན་གཉེར་བ་ཕེང་ཞོ་མེང་གིས་༼རྒྱ་བོད་བརྩེ་བ་ཟབ། མང་གཙོ་མཉམ་དུ་སྤེལ ༽ཞེས་པའི་བརྗོདགཞིའི་ཐོག་གཏམ་བཤད་གནང་ཡོད་པ་མ་ཟད།  ཁོང་ནས་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་ལ་རྒྱབ་སྐྱོར་དང་། རོགས་འདེགས། དེ་བཞིན་རྒྱ་བོད་མི་རིགས་གཉིས་ཀྱི་འབྲེལ་ལམ་དང་མཐུན་སྒྲིལ་ཐད་རང་ནུས་གང་ཡོད་ཐོག་འབད་འབུངས་བྱེད་ཀྱི་ཡིན་ཞེས་གསུངས། སྐབས་དེར་སོག་རིགས་སྐུ་ཚབ་ནས་ཀྱང་གཏམ་བཤད་གནང་ཡོད། ད་ཐེངས་ཀྱི་ལས་འགུལ་དེས་ས་གནས་མི་དམངས་གང་མང་ཞིག་ལ་རང་དབང་གི་ཆེད་དུ་འཐབ་རྩོད་བྱེད་ནུས་པའི་འདུན་པ་དང་སེམས་ཤུགས་འཕར་མ་བསྐྱེད་ཡོད་པ་བཅས། །