༢༠༡༡ ཟླ་ ༣ ཚེས་ ༨ རེས་གཟའ་མིག་དམར།
༄༅། །ཡུ་རོབ་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༢ ཚེས་ ༢༦ ཉིན་ནས་ཉིན་གྲངས་གཉིས་རིང་ཨ་རིའི་གྲོང་ཁྱེར་སན་ཕྷི་རན་སི་སི་ཀོ་ནང་ལྕགས་ཕག་ལོའི་གསར་བརྗེ་ལངས་ནས་ལོ་བརྒྱ་འཁོར་བའི་དྲན་གསོའི་ཚོགས་ཆེན་ཞིག་སྐོང་ཚོགས་གནང་བར་གོ་སྒྲིག་ཚོགས་ཆུང་ནས་ཡུ་རོབ་བོད་གཞུང་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་གདན་ཞུ་གནང་བ་ལྟར་ཁོང་ནས་ཨ་རི་སྐུ་ཚབ་དོན་གཅོད་ཀྱིས་ངོ་སྤྲོད་མཚམས་སྦྱོར་འོག་ཚོགས་འདུར་རྒྱ་རིགས་ཤེས་ཡོན་ཅན་དང་། རྩོམ་པ་པོ། སློབ་ཕྲུག གསར་འགོད་པ་སོགས་མི་གྲངས་ ༡༠༠ སྐོར་ཞིག་ཁྲོད་རྒྱ་ནག་སྐམ་ས་ཆེན་པོ་ནས་ཡིན་པ་མི་གྲངས་ ༥༦ བསླེབས་ཡོད་པའི་ཚོགས་འདུར་ལྷན་ཞུགས་གནང་ཡོད།
དེ་བཞིན་ཚོགས་འདུའི་ཐོག་གཏམ་བཤད་བྱེད་མཁན་མི་གྲངས་ ༢༧ ཡོད་པའི་ཁོངས་བློ་བཟང་ཉི་མ་ལགས་ཀྱང་ཡོད་པ་ལྟར། ཁོང་གིས་སྐུ་ཞབས་སུན་ཀྲུང་ཧྲན་དང་མི་རིགས་འཆམ་མཐུན་ཞེས་པའི་བརྗོད་གཞིའི་ཐོག་བོད་དོན་དང་སྦྱར་ནས་གཏམ་བཤད་གནང་ཡོད་པ་མ་ཟད།  གཙོ་བོ་མན་ཇུའི་དུས་མཇུག་གི་མི་རིགས་ཀྱི་གནད་དོན་དང་། སུང་ཀྲུན་ཧྲན་གྱི་མི་རིགས་འཆམ་མཐུན་གྱི་བསམ་བློ། ཆོས་ལུགས། དེ་བཞིན་སྲོལ་རྒྱུན་རིག་གཞུང་ལ་བརྩི་མཐོང་ཇི་གནང། ཕྱོགས་མཚུངས་སུང་ཀྲུན་ཧྲན་གྱི་མི་རིགས་འཆམ་མཐུན་གྱི་བསམ་བློས་རྒྱ་ནག་གི་མ་འོངས་པའི་མང་གཙོ་ཆབ་སྲིད་ལ་ཤུགས་རྐྱེན་དང་། དོན་སྙིང་ཇི་ལྡན་བཅས་ཀྱི་སྐོར་ལ་གཏམ་བཤད་གནང་བར་ཚོགས་བཅར་བ་རྒྱ་རིགས་ཚོས་གཏམ་བཤད་ཀྱི་ནང་དོན་ལ་གདེང་འཇོག་བྱས་ཡོད།
ཡང་ཁོང་གིས་ཚོགས་འདུའི་བར་སེང་དང་གོ་སྐབས་ནམ་བྱུང་ལ་དེ་སྔོན་འཇི་ནི་ཝར་རྒྱལ་སྤྱིའི་རྒྱ་བོད་ཚོགས་ཆེན་ལ་ངོ་ཐུག་བྱུང་བའི་རྒྱ་རིགས་རྩོམ་པ་པོ་དང་། ཤེས་ཡོན་ཅན་ཚོར་འབྲེལ་བ་བྱས་ཏེ་བོད་དོན་སྐོར་གླེང་སློང་སྤྱི་དང་། བྱེ་བྲག་རྒྱ་ནག་སྐམ་ས་ཆེན་པོ་ནས་ཡིན་པའི་ཚོགས་བཅར་བ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་དགོངས་གཞི་དང་། རང་གཞུང་གི་མཛད་ཕྱོགས་སྲིད་བྱུས་རྣམས་གང་ཐུབ་ཀྱིས་འགྲེལ་བརྗོད་གནང་ཡོད།
ཚོགས་འདུ་གྲུབ་རྗེས་ཕྱི་ཟླ་ ༢ ཚེས་ ༢༨ ཉིན་བློ་བཟང་ཉི་མ་ལགས་ཀྱིས་བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་དང་སྔོན་ཚུད་ནས་བཀའ་མོལ་བྱུང་བ་བཞིན་ནིའུ་ཡོཀ་གྲོང་ཁྱེར་དུ་ཆེད་བསྐྱོད་ཀྱིས་ཀུན་དགའ་ལགས་དང་ཁོང་གིས་རྒྱ་རིགས་རྩོམ་པ་པོ་དང་ཆབ་སྲིད་ཉམས་ཞིབ་པ་གྲན་ཕོ་ཁུང་དང་། ཤིན་ཏའོ་རྒྱ་ཡིག་ཚགས་ཤོག་གི་རྩོམ་སྒྲིག་པ་ཉིང་ཝང། རྒྱ་ནག་སྐམ་ས་ཆེན་པོ་ནས་ཡིན་པའི་ཀྲང་ཀྲེ་ཀུའི་དང་། ལིན་ཡུང་ཧྭ། གྲགས་ཅན་རྩོམ་པ་པོ་སྐུ་ཞབས་སུའུ་ཞའོ་ཁང་བཅས་ངོ་ཐུག་གིས་བོད་དོན་སྐོར་བསམ་ཚུལ་བརྗེ་ལེན་གནང་བ་མ་ཟད། བོད་རྒྱ་མི་མང་དབར་འབྲེལ་ལམ་བྱེད་ཕྱོགས། རྒྱ་ནག་ནང་དེང་སྐབས་ཀྱི་གནས་སྟངས་སྐོར་ལ་ཕན་ཚུན་བསམ་ཚུལ་བརྗེ་ལེན་བྱས་ཡོད་པའི་སྐབས་དེར་རྒྱ་རིགས་རྣམས་ནས་བོད་དོན་ཐོག་དོ་སྣང་ཆེན་པོ་བྱས་ཡོད།
གཞན་ཡང་ཁོང་ནིའུ་ཡོཀ་ཏུ་སྡོད་རིང་སྐུ་ཚབ་དོན་གཅོད་ལས་ཁུངས་སུ་བཅར་ནས་དོན་གཅོད་བློ་བཟང་སྙན་གྲགས་ལགས་ཀྱིས་དབུས་ལས་བྱེད་རྣམས་དང་། བོད་ཀྱི་ཐེབས་རྩའི་འགན་འཛིན་རིན་ཆེན་དར་ལོ་ལགས་སུ་འཚམས་འདྲི་ཞུས་པ་དང་ཆབས་ཅིག་ཁ་སྔོན་སྙན་སེང་ཞུས་པ་བཞིན་རྒྱ་ཡིག་གི་དྲ་རྒྱ་གསར་བཟོ་བྱེད་ཕྱོགས་ཀྱི་ནང་དོན་དང་། བཟོ་དབྱིབས་བཅས་སྐོར་ལ་བློ་བཟང་ཉི་མ་ལགས་དང་ཀུན་དགའ་ལགས་དབར་ཞིབ་ཕྲའི་གོ་བསྡུར་བྱུང་ཞིང་། དེང་དུས་དྲ་རྒྱའི་ལམ་ནས་བོད་དོན་གནས་ཚུལ་ཁྱབ་སྤེལ་བྱེད་རྒྱུ་ཤིན་ཏུ་གལ་ཆེན་ཡིན་པ་བཅས་ཀྱི་སྐོར་ལ་གྲོས་བསྡུར་བྱུང་ཡོད་པ་བཅས། །