༢༠༡༡ ཟླ་ ༣ ཚེས་ ༡ རེས་གཟའ་མིག་དམར།
༄༅། །རྒྱལ་སྤྱིའི་འགྲོ་བ་མིའི་ཐོོབ་ཐང་གི་ཚོགས་ཆེན་ཐེངས་བཅུ་དྲུག་པ་དེ་སུད་སིའི་གྲོང་ཁྱེར་འཇི་ནི་ཝར་ཕྱི་ལོ་ ༢༠༡༡ ཟླ་ ༢ ཚེས ༢༨ ཉིན་དངོས་སུ་དབུ་འཛུགས་གནང་ཡོད། ཐེངས་འདིའི་ལྷན་ཚོགས་ཀྱི་དཔྱད་གཞིར་རྒྱ་ནག་གཞུང་ནས་མུ་མཐུད་བོད་ནང་གི་འགྲོ་བ་མིའི་ཐོབ་ཐང་རྡོག་རྡོལ་བཏང་དང་གཏོང་མུས་ཡིན་པ་དང་ཆབས་ཅིག་བོད་མི་རིགས་ཀྱི་ངོ་བོ་མཚོན་པའི་བོད་པའི་ཆོས་དང་རིག་གཞུང་ཤུལ་མ་ཐུབ་ཀྱི་མེད་པ་བཟོ་གི་འདུག་ཅེས་ཡིག་ཆ་ཁག་གཉིས་འབྲེལ་ཡོད་ལས་ཁུངས་ཁག་ལ་ཕུལ་བ་དང་སྦྲགས་ཚོགས་ཆེན་སྐོང་ཚོགས་གནང་སྐབས་སུ་ཡང་ངག་ཐོག་ནས་གནས་ཚུལ་སྙན་སེང་ཞུ་ཐུབ་རྒྱུའི་འབད་བརྩོན་གནང་བཞིན་ཡོད་སྐོར། སུད་སིའི་གྲོང་ཁྱེར་འཇི་ནི་ཝར་བཅའ་བཞུགས་བཙན་བྱོལ་བོད་གཞུང་གི་སྐུ་ཚབ་དོན་ཁང་གི་ལས་བྱེད་བསྟན་འཛིན་བསམ་འཕེལ་ལགས་ཀྱིས་འགྲེལ་བརྗོད་གནང་བའི་ནང་། ད་རེས་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་བཅུ་དྲུག་པའི་སྐབས་ལ་སུད་སིའི་དོན་གཅོད་དང་གཞུང་འབྲེལ་མ་ཡིན་པའི་ཚོགས་པའི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐབས་སྡུག་པོ་ཆགས་ཡོད་པ་ཚོགས་ཆེན་དེའི་ཐོག་ནས་སྙན་སེང་ཞུ་རྒྱུ་དང་། དེ་བཞིན་རྒྱ་ནག་གཞུང་གི་བྱ་སྤྱོད་དེ་དག་ང་ཚོས་ར་སྤྲོད་བྱེད་ཐུབ་རྒྱུའི་གཏམ་བཤད་བྱེད་རྒྱུའི་གོ་སྐབས་འཚོལ་བཞིན་ཡོད། གང་ལྟར་རྒྱ་ནག་གཞུང་ནས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་བཞིན་གནས་ཚུལ་དེ་དག་ཕྱོགས་བསྒྲིགས་བྱས་ཏེ་ང་ཚོ་དོན་གཅོད་ལས་ཁུངས་ཀྱི་ངོས་ནས་མཉམ་འབྲེལ་རྒྱལ་ཚོགས་ནང་དེབ་སྐྱེལ་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཞིག་བརྒྱུད་ནས་སྙན་ཐོ་གཉིས་ཙམ་ཞིག་ཕུལ་ཡོད།
སྤྱིར་རྒྱ་ནག་གཞུང་གི་རྩ་ཁྲིམས་ནང་ཆོས་དད་རང་མོས་ཞེས་བཀོད་ཡོད་ཀྱང་བོད་ཀྱི་དགོན་སྡེ་ཁག་ནང་གཞུང་གི་མངགས་གཏོང་བྱས་པའི་མང་གཙོ་དོ་དམ་ཨུ་ཡོན་ལྷན་ཁང་ཟེར་བའིལས་ཁུངས་བཙུགས་ཏེ། ལས་ཁུངས་དེའི་སྟངས་འཛིན་འོག་བོད་ནང་གི་དགོན་སྡེ་ཁག་ལ་རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་སྤེལ་བ་མ་ཟད། དགེ་འདུན་པ་ཚོར་བཙན་བཀའ་བཏང་སྟེ་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་དགོས་པའི་ནང་པའི་ལྟ་སྤྱོད་དང་རྒྱབ་འགལ་བྱེད་བཅུག་དང་འཇུག་བཞིན་ཡོད། ཕྱོགས་མཚུངས་ཆོས་ཁས་མི་ལེན་མཁན་རྒྱ་ནག་གཞུང་ནས་བོད་ཀྱི་བླ་སྤྲུལ་ཡང་སྲིད་སྐོར་ལ་སྟངས་འཛིན་བྱས་པ་དེ་དག་དོན་དངོས་ཐོག་བོད་ནང་ཆོས་དད་རང་མོས་མིང་ཙམ་ལས་མེད་པ་སོགས་ཡིག་ཐོག་ནས་འགྲོ་བ་མིའི་ཐོབ་ཐང་ལྷན་ཁང་ལ་ཕུལ་ཡོད།
རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་ཆེན་ཐེངས་བཅུ་དྲུག་པ་དེ་ཕྱི་ཟླ་ ༢ ཚེས་ ༢༨ ཉིན་ནས་དབུ་འཛུགས་ཀྱིས་ཕྱི་ཟླ་ ༣ ཚེས་ ༢༥ བར་སྐོང་ཚོགས་གནང་རྒྱུ་ཡིན་པ་དང་། དུས་ཡུན་དེའི་རིང་རྒྱལ་ཁབ་སོ་སོའི་ནང་གི་འགྲོ་བ་མིའི་ཐོབ་ཐང་གི་གནས་བབས་ངོ་སྤྲོད་དང་། དེ་བཞིན་འགྲོ་བ་མིའི་ཐོབ་ཐང་གི་རྟོག་ཞིབ་གནང་མཁན་གྱི་ཁོངས་སྡུག་གཅོང་མནར་གཅོད་དང་བཙན་ཤེད་ཀྱིས་མི་སྣ་གང་བྱུང་འཛིན་བཟུན་བྱས་མི་ཆོག་པའི་བཀག་འགོག་སྡེ་ཚན་ནས་ཚོགས་ཆེན་ཐོག་ལས་བསྡོམས་ཤིག་ཀྱང་སྒྲོགས་སྦྱང་གནང་རྒྱུ་ཡིན་འདུག་པ་བཅས། །