༢༠༡༡ ཟླ་ ༣ ཚེས་ ༣༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༢༨ ཉིན་རྒྱ་རིགས་རྩོམ་པ་པོ་སྐུ་ཞབས་ཡོན་ཧུང་པིང་གིས་བརྩམས་པའི་༼ནམ་མཁའི་དབྱིངས་སུ་བསྲིངས་པའི་བགྲོད་ལམ་རི་བོ་ཧི་མ་ལ་ཡ་བརྒལ་བ༽ཞེས་པའི་བོད་དོན་དང་འབྲེལ་བའི་དཔེ་དེབ་གཅིག་ཐེ་ཝན་དུ་དབུ་འབྱེད་གནང་འདུག
དེ་ཡང་ཨོ་སི་ཊོ་ལི་ཡར་བཅའ་བཞུགས་སྐུ་ཞབས་ཡོན་ཧུང་པིང་གིས་དེ་སྔོན་བོད་དོན་དང་འབྲེལ་བའི་དཔེ་དེབ་ཁ་ཤས་ཤིག་བརྩམས་མྱོང་ཡོད་པ་མ་ཟད། ད་རེས་༼ནམ་མཁའི་དབྱིངས་སུ་བསྲིངས་པའི་བགྲོད་ལམ་རི་བོ་ཧི་མ་ལ་ཡ་བརྒལ་བ༽ཞེས་པའི་དཔེ་དེབ་དེ་གཙོ་བོ་བོད་མི་སྐྱབས་བཅོལ་ཁ་ཤས་ཤིག་བོད་ནས་བྲོས་བྱོལ་དུ་ཡོང་སྐབས་ཀྱི་གནས་སྟངས་ཕྱོགས་སྒྲིག་བྱས་པ་ཞིག་ཡིན་པ་མ་ཟད། དེ་བཞིན་དཔེ་དེབ་དེའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་སྤྱི་དང་ཡང་སྒོས་བོད་མི་ཡོངས་ཀྱི་རྣམ་པ་ངོ་སྤྲོད། ཕྱོགས་མཚུངས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། རྒྱ་གཞུང་གི་བཙན་གནོན་འོག་དཀའ་སྡུག་མྱངས་དང་མྱོང་བཞིན་ཡོད་པའི་བོད་མིའི་གནས་སྟངས་དང་ལྷག་པར་རྒྱ་ནག་གཞུང་ནས་བོད་མི་རིགས་རྣམས་རྩ་མེད་བཟོ་རྒྱུའི་སྲིད་བྱུས་ཁག་གི་སྐོར་བཀོད་ཡོད། རྒྱ་ཡིག་ཐོག་ཡོད་པའི་དཔེ་དེབ་དེ་དབུ་འབྱེད་སྐབས་ཐེ་ཝན་དུ་ཡོད་པའི་རྒྱ་རིགས་གཙོ་བོར་གྱུར་བའི་མཁས་པ་དང་ཤེས་ཡོན་ཅན་གྱི་མི་སྣ་མང་པོ་མཉམ་ཞུགས་གནང་ཡོད་པའི་དབུས་སུ་སྐུ་ཞབས་ཡོན་ཧུང་པིང་ལགས་ཀྱིས་མཛད་སྒོའི་ཐོག་གསུང་དོན། ང་རང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ཧ་ཅང་དད་གུས་ཆེན་པོ་ཡོད་པ་མ་ཟད། བོད་མིའི་རང་དབང་འཐབ་རྩོད་ཀྱི་སྙིང་སྟོབས་དང་སེམས་ཤུགས་ལ་བསྔགས་བརྗོད་བྱེད་མཁན་ཞིག་ཡིན། ཐེ་ཝན་མི་མང་ཚོས་འཚོ་བ་རྣོ་བའི་ཆབ་སྲིད་ཀྱི་རང་དབང་དང་འབྲེལ་བའི་གནད་དོན་ཐོག་ལག་པ་འཆང་མ་ཐུབ་པར་རྗེས་སུ་ལུས་ཡོད། ཐེ་ཝན་མི་མང་ནས་བོད་མིའི་རང་དབང་རྩོད་ལེན་གྱི་ལས་འགུལ་ལ་དམིགས་དཔེ་ལྟ་དགོས་པ་རེད་སྙམ་གྱི་ཡོད།  དེ་བཞིན་ངས་ལོ་མང་ཉམས་ཞིབ་བྱས་པ་ལྟར་ན་བཙན་བྱོལ་བོད་གཞུང་དང་མི་མང་ནས་གང་གནང་བ་དེ་བཞིན་ཐེ་ཝན་གཞུང་གི་ངོས་ནས་བྱེད་ཐུབ་ཀྱི་མི་འདུག་བསམ་བཞིན་ཡོད།
ཨོ་སི་ཊོ་ལི་ཡར་བཅའ་བཞུགས་རྒྱ་རིགས་རྩོམ་པ་པོ་སྐུ་ཞབས་ཡོན་ཧུང་པིང་ལགས་ནི་མང་གཙོ་དོན་གཉེར་བ་དང་རང་དབང་རྩོད་ལེན་པ་ཞིག་ཡིན་པ་མ་ཟད། བོད་དང་བོད་མིའི་གནས་སྟངས་ཐོག་དོ་སྣང་དང་ཞིབ་འཇུག་གནང་མཁན་ཞིག་ཡིན་འདུག་ལ་འཛམ་གླིང་གི་ཡུལ་གྲུ་གང་སར་རང་དབང་དང་འགྲོ་བ་མིའི་ཐོབ་ཐང་གལ་ཆེ་ཡིན་པ་ཡང་ཡང་གསུང་མཁན་ཞིག་ཀྱང་ཡིན་པ་བཅས། །