༢༠༡༡ ཟླ་ ༣ ཚེས་ ༢ རེས་གཟའ་ལྷག་པ།
༄༅། །བོད་གཞུང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་བཏང་གནས། ཕྱི་ལོ་ ༢༠༡༡ ཟླ་ ༢ ཚེས་ ༢༦ དང་ ༢༧ ཉིན་གྲངས་གཉིས་རིང་ཨ་རིའི་གྲོང་ཁྱེར་ནིའུ་ཡོཀ་གི་རྒྱ་རིགས་འདུ་སྡོད་ས་ཁུལ་ཕྷེ་ཤ་ཤིང་དུ་བོད་གཞུང་ཨ་རི་སྐུ་ཚབ་དོན་གཅོད་ཁང་ནས་གྲ་སྒྲིག་གཙོ་སྐྱོང་འོག་ས་གནས་ཊོ་རོན་ཊོ་དང་། མི་ནི་སུད་ཊར། སྦོ་སི་ཊོན། ནིའུ་ཡོཀ ནིའུ་འཇར་སི་སོགས་བོད་རིགས་སྤྱི་མཐུན་ཚོགས་པ་ ༢༥ ནས་ཚོགས་བཅར་བ་ ༤༠ ལྷག་ཙམ་མཉམ་ཞུགས་ཐོག་བྱང་ཨ་རིའི་ས་གནས་བོད་རིགས་སྤྱི་མཐུན་ཚོགས་པ་ཁག་གི་ཚོགས་ཆེན་ཐེངས་ ༡༡ པ་དེ་སྐོང་ཚོགས་གནང་ཡོད། དེ་བཞིན་ཚོགས་ཆེན་ཐོག་རྒྱ་ནག་འཐབ་ཕྱོགས་གཅིག་གྱུར་ཁང་གིས་བོད་མིའི་ཆིག་སྒྲིལ་གཏོར་བཤིག་གཏོང་ཐབས་བྱེད་བཞིན་ཡོད་པར་གདོང་ལེན་བྱེད་ཐབས་དང་། རྒྱ་རིགས་མི་མང་དང་འབྲེལ་ལམ་ཡར་རྒྱས་གཏོང་ཕྱོགས། བོད་དང་ཆོས་རིག་གཅིག་གྱུར་ཡིན་པའི་ཧི་མ་ཡའི་རི་རྒྱུད་ཀྱི་མི་མང་དང་འབྲེལ་ལམ་ཟབ་ཏུ་གཏོང་ཕྱོགས། རང་རིགས་གཞོན་སྐྱེས་རྣམས་ནས་བོད་ཀྱི་སྐད་ཡིག་གི་ཆུ་ཚད་མཐོ་རུ་གཏོང་ཐབས་དང་། ཕྱི་ཟླ་ ༧ པའི་དུས་འཁོར་དབང་ཆེན་སྐབས་རང་རིགས་གཞོན་སྐྱེས་དབར་བོད་ཀྱི་རིག་གཞུང་འགྲན་བསྡུར་བྱེད་ཕྱོགས་སོགས་གནད་དོན་མང་པོའི་ཐོག་གོ་བསྡུར་ལྷུག་པོ་གནང་ཡོད། སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཚོགས་ཆེན་དབུ་འབྱེད་སྐབས། བོད་ཀྱི་ཆོས་དང་རིག་གཞུང་མི་ཉམས་སྲུང་སྐྱོབ་བྱེད་རྒྱུ་དང་། བོད་མིའི་ངོ་བོ་མི་བརླག་པ་བྱེད་རྒྱུ། སོ་སོའི་ཁྱབ་ཁོངས་ས་གནས་ཀྱི་བོད་མི་མང་ཚོགས་ཀྱི་བདེ་དོན་ལ་ལྟ་རྟོག་བྱེད་རྒྱུ། བོད་ཀྱི་གནད་དོན་ཐོག་རང་རིགས་དང་། གཞན་གྱིས་དོ་སྣང་སྔར་ལས་ལྷག་པ་སླེབ་ཐབས་བྱེད་རྒྱུ་བཅས་ནི་བོད་རིགས་སྤྱི་མཐུན་ཚོགས་པའི་ལས་འགན་གཙོ་བོ་ཡིན་པའི་གསུང་བཤད་གནང་། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་ཆེད་མངགས་ཝ་ཤིང་ཊོན་ནས་ཕེབས་ཏེ་ཚོགས་བཅར་བ་རྣམས་ལ་བོད་རྒྱའི་འབྲེལ་ལམ་སྐོར་གསུང་བཤད་སྙིང་བསྡུས་ཤིག་གནང་རྗེས་ཚོགས་བཅར་བའི་དྲི་བར་ལན་འདེབས་གནང་། ཕྱོགས་མཚུངས་ཚོགས་ཆེན་གྱིས་ས་གནས་སོ་སོའི་ཁྱབ་ཁོངས་གྲོས་ཚོགས་ནང་ཆབ་སྲིད་ཀྱི་འགུལ་ཤུགས་ཆེ་རུ་གཏོང་རྒྱུ་དང་། སྤྱི་མཐུན་ཚོགས་པའི་རྒྱུན་ལས་རྣམས་ལ་དབུ་མའི་ལམ་གྱི་ཟབ་སྦྱོང་གོ་སྒྲིག་ཞུ་རྒྱུ། རྒྱ་བོད་དབར་ལ་འབྲེལ་ལ་ཤུགས་ཆེ་རུ་གཏོང་ཆེད་རྒྱ་བོད་སློབ་ཕྲུག་ཕན་ཚུན་འབྲེལ་ལམ་བཟོ་ཐབས་ཀྱི་ལས་འགུལ་སྣེ་མང་སྤེལ་རྒྱུ། ས་གནས་ཁག་གི་ད་ཡོད་བོད་ཡིག་སློབ་གྲྭ་དང་། སློབ་གྲྭའི་སློབ་དེབ་ཡར་རྒྱས་གཏོང་ཆེད་ཚོགས་ཆུང་ཟུར་འཛུགས་བྱེད་རྒྱུ་སོགས་ཀྱི་གྲོས་ཆོད་བཞག་ཡོད་པ་མ་ཟད། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གི་འདས་པའི་ལོ་བཅུའི་བྱས་རྗེས་ལ་བཀའ་དྲིན་རྗེས་དྲན་ཆེད་ལེགས་གསོའི་གཟེངས་བསྟོད་འབུལ་རྒྱུའི་གྲོས་ཆོད་ཅིག་ཀྱང་བཞག་པ་གནང་ཡོད། དེ་བཞིན་ནིའུ་ཡོཀ་དང་ནིའུ་འཇར་སི་ས་གནས་བོད་རིགས་སྤྱི་མཐུན་ཚོགས་པས་ཚོགས་བཅར་བ་ཡོངས་ལ་དགའ་བསུའི་གསོལ་སྟོན་ཡང་བཤམས། ཕྱི་ཚེས་ ༢༨ ཉིན་གྱི་སྔ་དྲོ་ཚོགས་བཅར་བ་རྣམས་ནིའུ་ཡོཀ་ནས་ཕེབས་ཐོན་གྱིས་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་གནང་བའི་བོད་དོན་རྒྱབ་སྐྱོར་འཚོལ་བའི་ལས་འགུལ་ཉིན་མོར་མཉམ་ཞུགས་གནང་ཡོད་པ་བཅས།