༢༠༡༡ ཟླ་ ༣ ཚེས་ ༢༤ རེས་གཟའ་ཕུར་བུ།
༅༅། །འདི་གར་ཕྱི་དྲིལ་འགྲེམས་སྟོན་ཚན་པས་མེའོ་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༣ ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་བོད་གཞུང་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པས་རྒྱ་གར་བྱང་ཤར་མེའོ་ཆོས་འཕེལ་གླིང་བོད་མིའི་གཞིས་ཆགས་སུ་བོད་དོན་དང་འབྲེལ་བའི་པར་རིགས་དང་དེ་མིན་དངོས་འབྱུང་གློག་བརྙན་ཁག་གཅིག་མང་ཚོགས་ལ་བསྟན་ཡོད། དེ་ཡང་སྔ་དྲོ་ཆུ་ཚོད་ ༩ པའི་ཐོག་གཞིས་ཆགས་ཀྱི་སྤྱི་ཁང་དུ་མེའོ་གཞིས་ཆགས་ཀྱི་བོད་མི་དང་སློབ་ཕྲུག་བཅས་ཁྱོན་མི་གྲངས་ ༨༠༠ ཙམ་འདུ་འཛོམས་བྱུང་བ་རྣམས་ལ་ས་གནས་འགོ་འཛིན་ཚེ་དབང་རྡོ་རྗེ་ལགས་ཀྱིས་འགྲེམས་སྟོན་གྱི་ལས་རིམ་སྐོར་ངོ་སྤྲོད་གསུང་བཤད་གནང་ཡོད། དེ་རྗེས་ཕྱི་དྲིལ་འགྲེམས་སྟོན་ཚན་པའི་ལས་བྱེད་བཀྲ་ཤིས་ཕུན་ཚོགས་ལགས་ཀྱིས་གཞིས་ཆགས་ཁག་གི་ནང་འགྲེམས་སྟོན་གནང་དགོས་དོན་གྱི་ངོ་སྤྲོད་གསུང་བཤད་སྙིང་བསྡུས་ཤིག་གནང་གྲུབ་བསྟུན། མེའོ་ས་གནས་འཐུས་ཚོགས་ཀྱི་ཚོགས་གཙོ་རྡོ་རྗེ་ལགས་ཀྱིས་འགྲེམས་སྟོན་དབུ་འབྱེད་གནང་། གོང་ཚེས་ཉིན་གཉིས་ཀྱི་ཕྱི་དྲོར་བོད་དོན་དང་འབྲེལ་བའི་དངོས་བྱུང་གི་གློག་བརྙན་ཁག་གཅིག་མང་ཚོགས་ལ་བསྟན་ཡོད། ཉིན་གཉིས་རིང་ཕྱི་དྲིལ་འགྲེམས་སྟོན་ཚན་པས་མེའོ་བོད་མིའི་གཞིས་ཆགས་ནང་བཙན་བྱོལ་བོད་གཞུང་དང། འདས་པ་དང་ད་ལྟའི་བོད་ནང་གི་གནས་སྟངས། བཙན་བྱོལ་བོད་མིའི་འཚོ་བའི་སྐོར་གྱི་པར་རིགས་དང་གློག་བརྙན་གྱི་ལམ་ནས་མང་ཚོགས་ལ་གོ་རྟོགས་སྤེལ་ཡོད། དེ་ནས་ཕྱི་ཚེས་ ༢༨ དང་ ༢༩ བཅས་ཉིན་གཉིས་རིང་འབུམ་ལ་བསྟན་སྒང་དུ་བོད་དོན་དང་འབྲེལ་བའི་འགྲེམས་སྟོན་གནང་རྒྱུ་ཡིན་འདུག་པ་བཅས།།