༢༠༡༡ ཟླ་ ༣ ཚེས་ ༢༩ རེས་གཟའ་མིག་དམར།
༅༅། །ཕྱི་ལོ་ ༢༠༡༡ ཟླ་ ༣ ཚེས་ ༢༨ ཉིན་བོད་གཞུང་སྨན་རྩིས་ཁང་གི་ཚོགས་ཁང་དུ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་མ་འོངས་བྱེད་སྒོའི་ལམ་སྟོན་གསུང་བཤད་གནང་ཡོད། དེ་ཉིན་ཕྱི་དྲོ་ཆུ་ཚོད་ ༤།༡༥ ཐོག་དབུས་སྨན་རྩིས་ཁང་གི་འཛིན་སྐྱོང་དང་སྨན་པའི་ལྷན་ཚོགས་ཀྱིས་ཐོག་མར་བོད་དྲུང་བློ་བཟང་བཀྲིས་ལགས་ཀྱིས་བཀའ་ཁྲི་ཟམ་གདོང་རིན་པོ་ཆེ་མཆོག་གི་ལོ་རྒྱུས་སྙིང་བསྡུས་ངོ་སྤྲོད་ཞུས་རྗེས་བཀའ་ཁྲི་མཆོག་གིས་གསུང་བཤད་གནང་དོན། རྡ་སའི་དབུས་ཆེས་མཐོའི་སྨན་རྩིས་ཁང་གི་འདུས་སྡེ་ཡོངས་རྫོགས་དང་མཛད་གཙོ་རྣམ་པ། སྨན་པ་དང་རྩིས་པ། དེ་བཞིན་ས་གནས་སྨན་ཁང་ཁག་གི་འགན་འཛིན་འདི་གར་ཕེབས་པ་ཡོངས་ལ་བཙན་བྱོལ་བོད་གཞུང་བཀའ་ཤག་དང་ང་རང་སྒེར་ངོས་ནས་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན། དེ་རིང་ལྷན་རྒྱས་ཚོའི་ཚོགས་ཆེན་འདིའི་ཐོག་ལམ་སྟོན་བསླབ་བྱ་གནང་དགོས་རེད་ཅེས་སྔོན་མ་ནས་བཀའ་ཕེབས་པ་རེད། ངས་ཁྱེད་རྣམས་ལ་ལམ་སྟོན་གསལ་འདེབས་ཞུ་རྒྱུ་གང་ཡང་མི་འདུག སྤྱིར་བཏང་བར་ལམ་ལ་བྲེལ་འཚུབ་ཀྱི་རྐྱེན་པས་བསམ་བློ་གཏོང་རྒྱུ་དང་གྲ་སྒྲིག་བྱེད་རྒྱུའི་གོ་
སྐབས་གང་ཡང་མ་བྱུང། ང་ཚོ་ཕྱི་ལོག་ནས་བལྟས་སྡོད་མཁན་གྱི་མི་ཞིག་རེད། ཕྱི་ལོག་ནས་བལྟས་སྡོད་མཁན་གྱི་མིས་ནང་གི་འཛིན་སྐྱོང་དཀའ་ངལ་དང་འགྲོ་སྟངས་ཚང་མ་ཤེས་ཀྱི་མེད། དེར་བརྟེན་ཁྱེད་རང་ཚོས་འདི་བྱེད་རྒྱུ་འདུག་ཕ་གི་བྱེད་རྒྱུ་འདུག་བསམ་པ་མང་པོ་དྲན་གྱི་རེད་ལ་དེ་ཚོ་འཛིན་སྐྱོང་ནང་ཡོད་མཁན་ཚོས་མ་དྲན་པ་ཞིག་དང་མ་ཤེས་པ་ཞིག་ཧ་ལམ་མེད། འཛིན་སྐྱོང་ནང་དངོས་སུ་ཕྱག་ལས་གནང་མཁན་ཚོས་འབད་བརྩོན་བྱས་ནའང་མ་ཐུབ་པ་དང་མ་སྒྲུབ་པ་མང་པོ་ཞིག་ཕྱི་ནས་བལྟས་སྡོད་མཁན་ཚོས་བྱེད་རྒྱུ་ཡོད་མདོག་ཁ་པོ་དང་སྟབས་བདེ་མདོག་ཁ་པོ་ཞིག་དེ་འདྲ་ཡོད་། ང་ཚོ་དངོས་སུ་ནང་གི་ལས་དོན་ལ་ཉམས་མྱོང་མེད་མཁན་དེ་ཚོས་ཕྱི་ནས་བསམ་འཆར་ཞུ་རྒྱུར་ང་རང་དགའ་པོ་མེད། ངའི་མི་ཚེའི་ཉམས་མྱོང་ནས་བལྟས་པ་ཡིན་ན་སྔོན་མ་དགེ་རྒན་ཡིན་པའི་སྐབས་ནས་སློབ་སྤྱི་ཚོས་འདི་དང་ཕ་གི་བྱེད་ཀྱི་མི་འདུག་དེ་བྱས་ཆོག་གི་རེད་བསམ་དྲན་པ་དེ་ང་རང་དངོས་སུ་སློབ་སྤྱི་བྱེད་སྐབས་དེ་དག་བྱེད་ཐུབ་ཀྱི་མི་འདུག གྲོས་ཚོགས་ནང་ཡོད་སྐབས་བཀའ་ཤག་གིས་ཕ་གི་བྱེད་ཀྱི་མི་འདུག འདི་བྱེད་ཆོག་གི་རེད་བསམ་པ་རྣམས་རྗེས་སུ་བཀའ་ཤག་ནང་སླེབས་དུས་བྱེད་ཆོག་ཆོག་ཞིག་མི་འདུག དེར་བརྟེན་སྒྲིག་འཛུགས་སུ་དང་སུ་ཡིན་ནའང་སེམས་ལ་དྲན་ཚད་བཤད་ན་མང་པོ་ཤོད་རྒྱུ་ཡོད་ཀྱང་དེ་དག་དངོས་སུ་ཕྱག་ལས་གནང་མཁན་ཚོའི་ཐུགས་ལ་མི་ཤར་བ་དང་ཐབས་ཤེས་མི་གནང་བ་ཞིག་ཕལ་ཆེར་མེད་བསམ་གྱི་འདུག ཁྱེད་རྣམས་ནས་ང་ལ་གསུང་པར་བརྟེན་ས་བཅད་མ་སྟོང་ཙམ་དུ་ང་ཚོ་ཕྱི་ལོག་སྡོད་མཁན་ཞིག་གི་མཐོང་སྣང་ཐོག་ནས་ཞུ་གི་ཡོད་དུས་ཁ་ཤས་ཏག་ཏག་ཡིན་སྲིད་པ་དང་ཁ་ཤས་མིན་སྲིད་པའང་རེད། ཐུགས་ཕན་གསོས་པ་ཡོད་ན་བསྒྲུབ་རྒྱུ་དང་མེད་ན་དབྱུག་གནང་རྒྱུ་རེད། ཅེས་སོགས་ཀྱི་གསུང་བཤད་གནང་སྟེ་བོད་ཀྱི་གསོ་བ་རིག་པའི་རྒྱུད་བཞི་དེ་བོད་གཞུང་ཞིག་མ་གཏོགས་རྒྱ་གཞུང་ཞིག་མིན་པ་འབྱུང་བ་རིག་པ་དང་བརྡ་སྤྲོད་རིག་པའི་ཐོག་ནས་གསལ་པོ་ཡིན་པ་དང་གཞུང་ཁུངས་བཙན་སྟོན་ཆེད་སྨན་རྩིས་ཁང་ནས་ཉམས་ཞིབ་སྒྲུབ་དོན་དེ་འདྲ་བྱུང་ན་ཡག་པོ་ཡོད་སྐོར་དང་། དེ་བཞིན་སྨན་རྩིས་ཀྱི་རིག་པའི་གཞུང་ལུགས་ནང་ཉམས་ཞིབ་ཀྱི་དེང་རབས་རིག་གནས་དང་མཚུངས་བསྡུར་བྱས་ཏེ་བོད་ཀྱི་རིག་གནས་སྤྱི་དང་གསར་གཏོད་ཀྱི་གོ་སྐབས་གཞི་རྒྱ་ཆེན་པོའི་ཐོག་ཤུགས་རྒྱག་རྒྱུ་ཡོད་པ་ཞིག་དང། སྨན་རྩིས་རིག་གནས་འཛིན་སྐྱོང་སྤེལ་གསུམ་ཐད་སློབ་གཉེར་བའི་མི་འབོར་གང་ཙམ་གསོ་སྐྱོང་དགོས་པ་མ་ཟད། རྒྱལ་སྤྱིའི་ངོས་ལེན་ཡོད་པའི་ལག་འཁྱེར་ཚད་ལྡན་ཡོང་བར་གལ་ཆེ་སྐོར་དང་། སྨན་རྩིས་ཁང་དབུ་ཚུགས་པ་ནས་བཟུང་སྟེ་༸གོང་ས་མཆོག་གི་སྐུའི་འཕྲོད་བཞེས་ལ་བླ་སྨན་རྣམ་པའི་རླབས་ཆེན་གྱི་གྲུབ་འབྲས་ཐོན་ཡོད་ལ་ད་དུང་ནུས་པ་འདོན་དགོས་པ་དང་། བོད་མི་རིགས་དང་བསྟན་པ་ཆབ་སྲིད་ཙམ་མ་ཟད། འཇིག་རྟེན་སྤྱི་ཡོངས་ཀྱི་བླ་ན་མེད་པའི་སྐུའི་འཕྲོད་བཞེས་ལ་ཞབས་ཕྱི་ཞུ་རྒྱུ་བྱུང་བ་དེས་སྨན་རྩིས་ཁང་གི་སྒྲིག་འཛུགས་ལ་མཚན་མཐོང་ཡོང་རྒྱུ་དང་ཁྲིམས་མཐུན་གྱི་ཚོགས་པ་གཏན་འཇགས་འགྲོ་ལུགས་དུས་ཐོག་འགན་འཛིན་ལྷན་ཚོགས་ཚོགས་རྒྱུ་དང་རྩིས་ཁྲ་ཉར་འཇོག་བྱེད་སྟངས། ལས་བྱེད་རྣམས་ཀྱི་མཐུན་རྐྱེན་ཡུལ་དུས་དང་འཚམ་པ་འབད་བརྩོན་དང་། མི་རིགས་དང་རིག་གནས་སྲུང་སྐྱོབ་གནས་བབ་ལ་སྒྲིག་འཛུགས་འདིའི་ནང་ཕྱག་ལས་གནང་ཐུབ་རྒྱུ་ཞིག་དང་། བོད་པའི་སྨན་རྩིས་དེ་རྒྱ་མིས་རྩ་མེད་བཏང་རྒྱུ་དང་མ་ཐུབ་ནའང་བོད་པའི་རིག་གཞུང་ངོ་བོར་གནས་མ་ཐུབ་པར་རྒྱའི་རིག་གཞུང་ཞིག་ལ་ཐབས་ཤེས་བྱེད་ཀྱི་ཡོད་པར་བརྟེན་སྨན་རྩིས་ཀྱི་རིག་གནས་ངོ་བོ་གསལ་སྟོན་དང་འགྲོ་བ་སྤྱི་ཡོངས་ལ་ཕན་ཐོགས་ཡོད་པ་སོགས་ཀྱི་ལམ་སྟོན་གསུང་བཤད་ཟབ་རྒྱས་གནང་ཡོད། དེ་རྗེས་དབུས་སྨན་རྩིས་ཁང་གི་ངེས་སྟོན་པས་བཀའ་ཁྲི་མཆོག་ལ་ཐུགས་རྗེ་ཆེ་ཞུའི་སྨན་ལྷའི་ཞལ་ཐང་ཞིག་ཕྱག་རྟགས་སུ་ཕུལ་སྒྲུབ་བསྟུན་དྲུང་ཆེས་ཐུགས་རྗེ་ཆེ་ཞུས་ཏེ་ལྷན་ཚོགས་གྲོལ་ཡོད་པ་བཅས།།
