༢༠༡༡ ཟླ་ ༣ ཚེས་ ༢༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༢༣ ཉིན་བཀའ་ཁྲི་མཆོག་གིས་བོད་གཞུང་སྨན་རྩིས་ཁང་དབུ་བརྙེས་ནས་མི་ལོ་ལྔ་བཅུ་འཁོར་བའི་དུས་དྲན་གྱི་མཛད་སྒོར་གསུང་བཤད་གནང་དོན། དེ་རིང་རྡ་ས་སྨན་རྩིས་ཁང་དབུ་བརྙེས་ནས་མི་ལོ་ལྔ་བཅུ་འཁོར་བའི་དུས་དྲན་མཛད་སྒོ་འདིའི་ཐོག་མཆོག་ཏུ་བཀུར་འོས་སྐུ་མགྲོན་རྣམ་པ་དང་། སྨན་རྩིས་ཁང་གི་ལས་བྱེད་དབུ་ལས་རྣམ་པ། ཕྱོགས་མཐའི་ས་གནས་ཁག་ལ་ཡོད་པའི་སྨན་པ་དང་ལས་བྱེད་རྣམ་པ། སྨན་རྩིས་ཁང་དང་འབྲེལ་ཡོད་སྐྱེ་འགྲོ་ཡོངས་ལ་བཙན་བྱོལ་བོད་གཞུང་བཀའ་ཤག་དང་རང་སྒེར་ངོས་ནས་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། ལོ་ལྔ་བཅུའི་རིང་སྤྱིར་འཇིག་རྟེན་ནང་འགྱུར་བ་མང་པོ་ཕྱིན་པ་རེད། ལྷག་པར་དུ་བཙན་བྱོལ་བོད་མིའི་གནས་བབས་ལ་འགྱུར་བ་མང་པོ་ཕྱིན་ཡོད། དེའི་ནང་རྒྱུན་གནས་ཐུབ་པའི་སྒྲིག་འཛུགས་ཁག་གི་ནང་ནས་རྡ་སའི་སྨན་རྩིས་ཁང་འདི་གཅིག་ཆགས་ཀྱི་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་བླ་སྨན་རྣམ་པས་མཚོན་བོད་མི་དང་འཇིག་རྟེན་སྐྱེ་འགྲོ་ཡོངས་ལ་གསོ་བ་རིག་པའི་སྲོལ་རྒྱུན་གྱི་ཐོག་ནས་ཞབས་འདེགས་རླབས་ཆེན་བསྒྲུབས་ཡོད་པར་ང་ཚོས་རྗེས་སུ་ཡི་རང་ཡོད། དེ་དང་ཆབས་ཅིག་ཏུ་རྩ་བའི་བོད་ཀྱི་གསོ་བ་རིག་པའི་གཞུང་ལུགས་དང་ལག་ལེན་ཧ་ཅང་གི་རྒྱ་ཆེན་པོ་རེད། དེ་ཙམ་དུ་མ་ཟད་པའི་བོད་ཀྱི་གསོ་བ་རིག་པ་དང་རྒྱ་གར་གྱི་རིག་བྱེད། བོད་ཀྱི་གསོ་བ་རིག་པ་དང་དེང་རབས་ཀྱི་སྨན་གཞུང་བར་མཚུངས་བསྡུར་དང་ཉམས་ཞིབ་ཐོག་ནས་ད་དུང་གསར་གཏོད་ཀྱི་ལས་དོན་ཧ་ཅང་རྒྱ་ཆེན་པོ་བྱེད་རྒྱུའི་གོ་སྐབས་ཡོད། དེ་འདྲའི་གོ་སྐབས་ཆ་ཚང་ལེན་རྒྱུ་དེ་བཙན་བྱོལ་སྤྱི་ཚོགས་ནང་རྡ་སའི་སྨན་རྩིས་ཁང་དེ་སྒྲིག་འཛུགས་གལ་གནད་ཆེ་ཤོས་ཤིག་ཆགས་ཡོད། ལྷག་པར་ཉེ་ཆར་རྒྱ་གར་གཞུང་གི་སྨན་གྱི་རིག་གནས་གྲས་སུ་བོད་ཀྱི་གསོ་བ་རིག་པ་ཁྲིམས་མཐུན་གྱིས་ངོས་ལེན་བྱུང་བ་དེ་ནས་ད་དུང་མ་འོངས་པར་བྱེད་རྒྱུའི་རྣམ་གྲངས་དེ་བས་མང་དུ་ཕྱིན་པ་དང་བྱེད་ཕྱོགས་བདེ་རུ་ཕྱིན་ཡོད། དེར་བརྟེན་བཙན་བྱོལ་བོད་གཞུང་དང་སྤྱི་ཚོགས་ངོས་ནས་རྡ་སའི་སྨན་རྩིས་ཁང་ལ་ཧ་ཅང་གི་རེ་བ་ཆེན་པོ་བྱེད་བཞིན་ཡོད་པ་རེད་བསམ་གྱི་འདུག་རེ་བ་དེ་དག་བསྐོང་ཐུབ་རྒྱུའི་ཆེད་དུ་ད་ལྟ་འདིར་ངེས་སྟོན་པས་ལས་བསྡོམས་ཐོག་ལ་གསུང་པ་ལྟར་ཟླ་བ་ཁ་ཤས་སྔོན་ལ་བཀའ་ཤག་ནས་བསྐྱར་ཞིབ་ཚོགས་ཆུང་ཆེད་བཙུགས་བྱས་ཏེ། ཤེས་ཡོན་དང་འཛིན་སྐྱོང་གཉིས་ཀའི་ལས་དོན་ཡོངས་སུ་རྫོགས་པར་ལེགས་ཆ་དང་ཞན་ཆ་གང་འདུག མ་འོངས་པར་བྱེད་ཐུབ་རྒྱུའི་རེ་བ་ག་རེ་འདུག ཚང་མ་ཞིབ་ཚགས་སྟོན་ཡོད། དེ་ཚོ་ལག་ལེན་བསྟར་རྒྱུའི་ཆེད་དུ་མཛད་གཙོ་རྣམ་པ་ཚང་མས་ཐུགས་འཁུར་བཞེས་ཏེ་ཕྱར་གྲུ་མཉམ་འདེགས་གནང་རྒྱུའི་རེ་བ་བྱེད་ཀྱི་ཡོད། དེ་རིང་འདིར་མངའ་སྡེའི་གཞུང་གི་འཕྲོད་བསྟེན་བློན་ཆེན་མཆོག་ཕེབས་པར་ཞེ་དྲག་དགའ་པོ་བྱུང་ཚང་མར་བློ་སྤོབས་སྐྱེས་རྒྱུའི་གཞི་རྟེན་ཞིག་རེད། ཧི་མ་ཅལ་ཁུལ་ལ་ཡོད་པའི་རྒྱ་གར་མངའ་སྡེ་བདུན་དང་བཅུ་གཅིག་དེ་འདྲ་བརྩི་རྒྱུ་ཞིག་ཡོད། དེ་ཚོ་ཚང་མ་ཧི་མ་ལའི་རི་རྒྱུད་དང་འབྲེལ་བ་ཆགས་པ་ཡིན་དུས། སྔོ་སྨན་གྱི་འབྱུང་ཁུངས་ཤིག་དང་གསོ་བ་རིག་པ་དང་འབྲེལ་བ་ཞིག་ཆགས་ཡོད། མ་འོངས་པར་ཧི་མ་ཅལ་གཞུང་དང་སྨན་རྩིས་ཁང་མཉམ་དུ་ལས་དོན་མང་པོ་མཉམ་རུབ་བྱེད་ཐུབ་རྒྱུ་དང་། ལྷག་པར་དུ་སྟོང་ལ་ཉེ་བའི་སྔོ་སྨན་དེ་ཚོ་མ་འོངས་པར་སྲུང་སྐྱོབ་དང་བདག་སྐྱོང་གང་འདྲ་བྱེད་ཐུབ་ཀྱི་ཡོད་མེད་དེ་ཚོའི་ཐོག་ལ་ཧི་མ་ཅཱལ་མངའ་སྡེའི་གཞུང་དང་མངའ་སྡེའི་ཤིང་ནགས་ལས་ཁུངས་དེ་ཚོའི་ནང་ནས་ཐུགས་འགན་ཆེན་པོ་བཞེས་དགོས་རྒྱུའི་གནས་སྟངས་ཤིག་ཆགས་ཀྱི་ཡོད་བསམ་གྱི་འདུག དེ་ཚོའི་ཐོག་ལ་ཧི་མ་ཅལ་མངའ་སྡེའི་གཞུང་དང་སྨན་རྩིས་ཁང་དབར་འབྲེལ་ལམ་མང་པོ་གནང་ཐུབ་པ་ཡིན་ན་ཡག་པོ་ཡོང་བའི་རེ་བ་བྱེད་ཀྱི་ཡོད། དེ་རིང་འདིར་གཟེངས་རྟགས་བཞེས་མཁན་གྱི་ལས་བྱེད་རྙིང་པ་ཚོ་དང་དེ་བཞིན་བྱས་རྗེས་ཡོད་པ་ཚང་མར་བཙན་བྱོལ་བོད་གཞུང་བཀའ་ཤག་ངོས་ནས་དགའ་བསུ་དང་འཚམས་འདྲི་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་གསུང་བཤད་གནང་ཡོད།