༢༠༡༡ ཟླ་ ༣ ཚེས་ ༨ རེས་གཟའ་མིག་དམར།

༄༅། །ཕྱི་ལོ་ ༡༩༨༩ ཟླ་ ༣ ཚེས་ ༨ འདི་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཞི་བདེ་དང་རང་དབང་དུ་གནས་པའི་བོད་ཀྱི་བདག་པོ་བོད་མིའི་ཐོག་མི་སྤྱོད་ལས་འདས་པའི་དྲག་གནོན་བཏང་བའི་ཉིན་མོ་ཞིག་འཁེལ་ཡོད་པར་བརྟེན། བཙན་བྱོལ་བོད་གཞུང་ཆོས་རིག་ལས་ཁུངས་ཀྱིས་གོ་སྒྲིག་ཞུས་ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ལོ་ལྟར་རྟེན་མཆོག་སྤྱན་སྔར་མཆོད་སྤྲིན་དང་། རིས་མེད་བླ་སྤྲུལ། དགེ་འདུན་སྔགས་གསུམ་འདུས་ཚོགས་སུ་བསྙེན་བཀུར་དང་འབྲེལ་མཆོད་འབུལ་གནང་བཞིན་ཡོད་པ་ལྟར་འདི་ལོ་ཡང་དུས་དྲན་ཐེངས་ ༢༡ པ་ཕྱི་ལོ་ ༢༠༡༡ ཟླ་ ༣ ཚེས་ ༨ ཉིན་འཁེལ་ཡོད་པ་བཞིན། གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྐུ་བཅར་རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་དབུ་བཞུགས་ཀྱིས་བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པས་གཙོས་ལས་བྱེད་རྣམ་པ། དེ་བཞིན་སེར་སྐྱ་མི་མང་བཅས་ཁྱོན་མི་གྲངས་ ༣༠༠ བརྒལ་བ་ལྷན་ཞུགས་ཀྱིས་བོད་མི་རིགས་ཀྱི་བདེན་དོན་ཆེད་རང་སྲོག་བློས་བཏང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་ཆེད་ཞལ་འདོན་གསུང་བསྐུལ་གནང་མུར་གསོལ་ཇ་ཕུལ། དེ་ནས་བོད་གཞུང་ཆོས་རིག་ལས་ཁུངས་ནས་སྤེལ་བའི་གསལ་བསྒྲགས་དེ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་སྒྲོག་སྦྱངས་གནང་བའི་ནང་འཁོད་དོན། ཕྱི་ལོ་ ༡༩༨༩ ཟླ་ ༣ ཚེས་ ༨ ཉིན་མོ་འདི་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཞི་བདེ་དང་རང་དབང་དུ་གནས་པའི་བོད་ཀྱི་བདག་པོ་བོད་མིའི་ཐོག་མི་སྤྱོད་ལས་འདས་པའི་དྲག་གནོན་གྱི་ཁྲིམས་གཞི་བསྡམས་པ་ནས་བཟུང་ད་བར་མནར་གཅོད་དང་གཉའ་གནོན། བཤུ་གཞོག་འོག་བོད་རིགས་རྒྱལ་གཅེས་སེར་སྐྱ་ཕོ་མོ་རྒན་བྱིས་བར་གསུམ་གྲངས་འདས་དུས་མིན་རྐྱེན་ལམ་དུ་གྱུར་པ་དང་། ཉེས་མེད་བོད་མི་ཁྲི་ཚོ་མང་པོ་བཙོན་འཇུག་སོགས་ཀྱི་ཀླ་ཀློ་མཐའ་འཁོབ་བྱ་སྤྱོད་འོག་དཀའ་སྡུག་ཚད་མེད་ཀྱི་དམྱལ་བ་མི་ཡུལ་དུ་མྱངས་དང་མྱོང་བཞིན་ཡོད་པའི་སྙིང་སྟོབས་ལྡན་པའི་བོད་ཀྱི་དཔའ་བོ་སེར་སྐྱ་ཕོ་མོ་རྒན་བྱིས་བར་གསུམ་གྱིས་ལུས་སྲོག་བློས་བཏང་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན་ཞེས་སོགས་འཁོད་ཡོད། དེ་རྗེས་མུ་མཐུད་སྨོན་ལམ་མཆོད་འབུལ་གནང་ཡོད་པ་བཅས། །