༢༠༡༡ ཟླ་ ༢ ཚེས་ ༡༧ རེས་གཟའ་ཕུར་བུ།
༄༅། །འདི་གར་ཨོ་སི་ཊོ་ལི་ཡའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨོ་སི་ཊོ་ལི་ཡའི་རྒྱལ་ས་ཀན་བྷེ་རར་ལོ་ལྟར་མི་རིགས་ཁག་གི་རིག་གཞུང་སྣ་འཛོམས་ཀྱི་དུས་སྟོན་ཞེས་ཚུགས་སྲོལ་ཡོད་པ་ལྟར།    ཕྱི་ལོ་ ༢༠༡༡ ཟླ་ ༢  ཚེས་ ༡༡ ནས་ཚེས་ ༡༣ བར་ཉིན་གསུམ་རིང་གི་དུས་སྟོན་སྐབས།  ཨོ་སི་ཊི་ལི་ཡའི་སྐུ་ཚབ་དོན་གཅོད་ལས་ཁུངས་ཀྱི་རིག་གཞུང་བསྟི་གནས་ཁང་ནས་མཉམ་ཞུགས་གནང་ཡོད་པ་མ་ཟད། གུར་གྱི་ཁང་པའི་བཟོ་དབྱིབས་ནང་བོད་ཀྱི་ཁྱད་ཆོས་ལྡན་པའི་མཆོད་ཤོམ་དང་དེའི་ནང་སྐུ་བརྙན་དང་དངུལ་ལས་གྲུབ་པའི་ཏིང་དང་མཆོད་ཀོང་། མཎྜལ་སོགས་ཁྱད་འཕགས་ཅན་མང་པོ་དང་། དེ་བཞིན་གྱང་ངོས་སུ་དར་གོས་ཆེན་གྱིས་བརྒྱན་པའི་ཞལ་ཐང་དང་། བོད་ཀྱི་ཁྱིམ་ཚང་ལྟར་ལྕོག་ཙེའི་སྟེང་མཆོད་པའི་ཡོ་ཆས་དང་གསོལ་ཇའི་ཞལ་དཀར། ཇ་ལྟིར་སོགས་སྒྲིག་ཤོམ་གནང་ཡོད། ཕྱོགས་མཚུངས་བོད་རིགས་ཕོ་མོའི་གྱོན་གོས་དང་། བརྙན་འཕྲིན་བརྒྱུད་བོད་གཞུང་ཟློས་གར་གྱི་དབྱར་སྐྱིད་འོད་སྡེར་ཁག་བཅས་མང་ཚོགས་རྣམས་ལ་འགྲེམ་སྟོན་གནང་བ་མ་ཟད་། བོད་དོན་མཁྱེན་འདོད་ཡོད་མཁན་རྣམ་པས་ཐུགས་ཞིབ་ཆེད་༸གོང་ས་མཆོག་གི་ཕྱག་དེབ་ཁག་གི་མཚན་བྱང་དང་། བོད་དོན་དང་འབྲེལ་བའི་ངྲ་རྒྱ་ཁག་གི་ཁ་བྱང་།  བོད་གཞུང་ཟློས་གར་དང་ཤེས་རིག་ལས་ཁུངས་ཀྱི་ཕྲུ་གུའི་སློབ་ཡོན་དང་འབྲེལ་བའི་ཡིག་ཆ།   ༸གོང་ས་མཆོག་གི་ཆིབས་སྒྱུར་མཛད་རིམ། དོན་གཅོད་ལས་ཁུངས་ཀྱི་ཟླ་གསུམ་གསར་འཕྲིན་དང་རིག་གཞུང་བསྟི་གནས་ཁང་གི་བརྡ་ཁྱབ་ཤོག་ལྷེ་སོགས་འགྲེམས་སྤེལ་རྒྱ་གང་ཆེ་ཞུས་པར། མང་ཚོགས་ནས་དོ་སྣང་དང་དགའ་མོས་ཆེན་པོ་གནང་བ་མ་ཟད། ཀན་བྷེ་ར་རིག་གཞུང་སྣ་འཛོམས་དུས་སྟོན་གྱི་གོ་སྒྲིག་ཚོགས་ཆུང་ངོས་ནས། དུས་སྟོན་འདིའི་ནང་མཉམ་ཞུགས་གནང་མཁན་ནང་ཁུལ་གོ་སྒྲིག་ཞུ་སྟངས་ཐོག་ཞིབ་འཇུག་གིས་མཐར་ཨོ་སི་ཊོ་ལི་ཡའི་དོན་གཅོད་ལས་ཁང་ནས་གོ་སྒྲིག་ཞུས་པའི་འགྲེམས་སྟོན་ཁང་དུ་སྒྲིག་ཤོམ་དང་། གོ་སྒྲིག་ལེགས་ཤོས་ཀྱི་ཨང་རིམ་དང་པོའི་བྱ་དགའ་གནང་ཡོད། ཀན་བྷེ་རར་ལོ་ལྟར་རིག་གཞུང་སྣ་འཛོམས་ཀྱི་དུས་སྟོན་སྐབས་རྒྱལ་ཁབ་འདིའི་ནང་གནས་སྡོད་གནང་མཁན་གྱི་མི་རིགས་འདྲ་མིན་རྣམས་ནས་རང་གི་ཁྱད་ཆོས་ལྡན་པའི་རིག་གཞུང་འགྲེམས་སྟོན་གནང་བ་དང་། ཁ་ཟས་ཚོང་འགྲེམས། གཞས་སྣ་འཁྲབ་སྟོན་སོགས་གནང་གི་ཡོད་པ་མ་ཟད། གཞུང་ཚབ་ཁག་ནས་ཀྱང་དུས་སྟོན་ནང་ཆ་ཤས་ལེན་ནས་འགྲེམས་སྟོན་དྲིལ་བསྒྲགས་གནང་གི་ཡོད།
དུས་ཆེན་འདིའི་སྐབས་ཀན་བྷེ་ར་བོད་རིགས་ཚོགས་པ་ནས་བོད་ཀྱི་ཞལ་ཟས་བཞེས་མོ་ག་ཚོང་བ་དང་།  སྦེར་སེ་སྦེན་གནས་བཞུགས་བོད་མིའི་གཞས་པ་བསྟན་འཛིན་ཆོས་རྒྱལ་ལགས་ནས་རྐྱང་གཞས་དང་སྒྲ་སྙན་བཏང་བའི་མཉམ་དུ་ཉི་ཧོང་གཞས་པ་ཞིག་ནས་ཕྲེད་གླེང་བཏང་།  སིད་ནིའི་བོད་རིགས་མཐུན་ཚོགས་ཀྱི་ཟློས་གར་འཁྲབ་སྟོན་པ་ན་གཞོན་ཁག་གཅིག་ནས་སྒྲ་སྙན་འཁྲབ་གཞས་སོགས་གཟིགས་འབུལ་ཞུས་སྐབས་གཟིགས་མོ་བ་ཡོངས་ནས་དགའ་སྣང་ཆེན་པོ་གནང་ཡོད་པ་བཅས།།