༢༠༡༡ ཟླ་ ༢ ཚེས་ ༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༨ ཉིན་ནས་བཟུང་ཨ་རིའི་དམིགས་བསལ་བོད་དོན་འབྲེལ་མཐུད་པ་ལྕམ་སྐུ་མ་རི་ཡ་ཨོ་ཊེ་རོ་ཡིས་རྒྱ་གར་ལྷོ་ཕྱོགས་སྦེལ་ཀོབ་ཏུ་བོད་མིའི་གཞིས་ཆགས་ཀྱི་བཟོ་གཞིས་དང་། རྣམ་གྲོལ་གླིང་དགོན། སློབ་གྲྭ་བཅས་ལ་འཚམས་གཟིགས་སུ་ཕེབས་ཡོད་པ་དང་། 
དེ་སྔོན་ཁོང་ཕྱི་ལོ་ ༢༠༠༩ ཟླ་ ༨ པའི་ནང་བཞུགས་སྒར་རྡ་སར་ཕེབས་ཡོད་ནའང་བོད་མིའི་ལྷོ་ཕྱོགས་གཞིས་ཆགས་ལ་འཚམས་གཟིགས་ད་ཐེངས་ཐོག་མ་དེ་ཡིན་པ་དང༌། ཨ་རིའི་ནང་སྲིད་ལས་ཁུངས་ཀྱི་མགྲིན་ཚབ་པས་འདི་ཟླའི་ཚེས་ ༧ ཉིན་གསལ་བསྒྲགས་གནང་དོན། བདུན་ཕྲག་འདིའི་ནང་མང་གཙོ་གོང་འཕེལ་དང་། རྒྱལ་སྤྱིའི་གནད་དོན་འབྲེལ་མཐུད་ཚན་པའི་དྲུང་ཆེ་གཞོན་པ་ལྕམ་སྐུ་མ་རི་ཡ་ཨོ་ཊེ་རོ་རྒྱ་གར་ལྷོ་ཕྱོགས་སུ་འཚམས་གཟིགས་གྲུབ་རྗེས་ལྡི་ལིར་ཕེབས་ཐོན་གྱི་ཁོང་ནས་ཕྱོགས་ཡོངས་ཀྱི་རྒྱལ་སྤྱིའི་གནད་དོན་ཐད་འབྲེལ་མཐུད་ཡག་པོ་ཡོང་བའི་གོ་བསྡུར་དང་། བོད་མི་སྐྱབས་བཅོལ་བའི་གཞིས་ཆགས་ཁག་གཅིག་ལ་ཕེབས་འཆར། དེ་བཞིན་རྒྱ་གར་དང་བལ་ཡུལ་འབྲུག་བཅས་ཀྱི་ཡུལ་གྲུ་སོ་སོའི་ནང་འོས་བསྡུའི་ལམ་ལུགས་དོན་སྨིན་ལྡན་པ་ཡོང་བའི་མཉམ་འབྲེལ་གྱི་ཐབས་ལམ་འཚོལ་སྒྲུབ་དང་རྐྱེན་ངན་ལ་གདོང་ལེན་གནང་ཕྱོགས་ཀྱི་སློབ་སྟོན་སོགས་གནང་རྒྱུ་ཡིན་འདུག་པ་བཅས། །
