༢༠༡༡ ཟླ་ ༢ ཚེས་ ༢༥ རེས་གཟའ་པ་སངས།
༄༅། །རྒྱལ་ཡོངས་ས་ཆེན་གསུང་རབ་སློབ་གཉེར་ཁང་ངམ་མ་དགོན་བཤད་གྲྭ་ནས་རིན་ཆེན་བློ་བཟང་དར་རྒྱས་ལགས་ཀྱིས་བཏང་གནས་ནང་འཁོད་དོན། ཉེ་ཆར་སྐུ་ཞི་བར་གཤེགས་པ་འཇམ་མགོན་སྐུའི་ཡོངས་འཛིན་དམ་པ་སྐྱབས་རྗེ་མཁན་ཆེན་ཨ་པད་རིན་པོ་ཆེ་མཆོག་ནི་མདོ་ཁམས་སྡེ་དགེ་ཀུ་སེ་ཡུལ་དུ་ཕྱི་ལོ་ ༡༩༢༧ ལོར་སྐུ་འཁྲུངས། 
སྐུ་གཞོན་ནུའི་དུས་ན་རྒྱལ་བ་ཀམ་ཚང་བཀའ་བརྒྱུད་ཀྱི་སྐྱེ་སྤྲུལ་ཞིག་ཏུ་ངོས་འཛིན་གནང་ཡང་ཁོང་གི་ཡབ་ཡུམ་གཉིས་ཀྱིས་ཞལ་བཞེས་གནང་ཡོད་མི་འདུག ཅུང་ན་སོན་པའི་ཚེ་ཀུ་སེ་གསེར་ལྗོངས་དགོན་དུ་ཆོས་སྒོར་བཞུགས།
དེ་ནས་རིམ་བཞིན་མདོ་ཁམས་སྨད་ཀྱི་ཆར་སྡེ་དགེ་སྨད་ཤོད་ཁམས་བྱེ་མ་ཐང་མཁས་གྲུབ་བྱེ་བའི་འབྱུང་གནས་རྫོང་གསར་བཤད་གྲྭ་ལྔ་རིག་ནང་བསྟན་སློབ་གླིང་དུ་ཕེབས་ནས་རྗེ་བླ་མ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་དང་མདོ་སྲིབ་པ་མཁན་ཆེན་ཐུབ་བསྟན་རྒྱལ་མཚན། མཁན་ཆེན་བློ་གྲོས་རྒྱལ་མཚན་སྨྲ་བའི་དབང་པོ་མི་ཉག་དམ་ཆོས་འོད་ཟེར་སོགས་བཤེས་གཉེན་དུ་མའི་ཞབས་རྡུལ་ལེགས་པར་རེག་སྟེ་ཐོས་བསམ་གྱི་སྒྲོ་འདོགས་བཅད་ནས་མཁས་པའི་མཚན་སྙན་ཕྱོགས་ཀུན་ཁྱབ། དེ་ཡང་སྐུའི་བགྲང་བྱ་ཤིན་ཏུ་ཕྲ་བའི་གནས་སྐབས་སུ་གྲུབ་ཆེན་རྡོ་རྗེ་འཆང་སྡེ་གཞུང་ཨ་འཇམ་རིན་པོ་ཆེ་མཆོག་དང་མཧཱ་པཎྜི་ཏ་མཁན་ཆེན་བློ་གྲོས་རྒྱལ་མཚན་གཉིས་ཀྱི་སྐུ་དྲུང་དུ་ཚེ་འདིར་མ་མཐར་ཡང་ཐེག་ཆེན་སྦྱོར་ལམ་གྱི་བཟོད་པ་ཐོབ་པར་གནང་རྒྱུའི་བློ་འདས་གཡར་དམ་ཆེན་པོ་ཕུལ། དེ་ནས་རང་ཡུལ་གསེར་ལྗོངས་དགོན་པའི་བཤད་གྲྭའི་མཁན་ཆེན་གྱི་ཐུགས་འགན་བཞེས་ཏེ་སྐལ་ལྡན་བུ་སློབ་དུ་མ་བསྐྱངས། རྗེ་བླ་མ་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་བཀའ་དགོངས་བཞིན་དབུས་ཕྱོགས་སུ་ཕེབས་ཏེ་གཙང་ངོར་དཔལ་ཨེ་ཝཾ་ཆོས་ལྡན་གདན་སའི་བཤད་གྲྭའི་མཁན་པོ་གནང་ནས་བསྟན་འགྲོའི་འགྲོ་དོན་རྒྱ་ཆེ་གནང་། 
ལྷ་ལྡན་ཆོས་ཀྱི་ཞིང་ས་དམ་པ་རུ་སླར་ཡང་འཇམ་མགོན་རྡོ་རྗེ་འཆང་ཆོས་ཀྱི་བློ་གྲོས་ཉིད་ཀྱིས་དུས་འགྱུར་མི་ཟད་པ་འབྱུང་རུང་ཟག་མེད་མངོན་པར་ཤེས་པའི་ཐུགས་ཀྱིས་མ་ལུས་པ་མངོན་སུམ་དུ་མཁྱེན་བཞིན་དུ་དགོངས་གཞི་དང་དགོས་པ་རླབས་པོ་ཆེ་ལ་དགོངས་ཏེ། ཐུགས་ལྷག་པར་དགྱེས་པ་ཆེན་པོའི་སྒོ་ནས་སྙིགས་དུས་ཀྱི་ནཱ་ལེནྡྲ་གཉིས་པ་མདོ་སྔགས་ཆོས་ཀྱི་འབྱུང་གནས་ཁམས་སྡེ་དགེ་རྫོང་གསར་བཤད་གྲྭའི་གདན་རབས་པ་མཁན་ཆེན་མཁྱེན་རབ་སེང་གེའི་རྗེས་སུ་ཆོས་སྡེ་དེའི་ཁྲི་ལ་མངའ་གསོལ་ལེགས་པར་གནང་། བསྟན་དགྲ་རྒྱ་དམར་གྱིས་བོད་ས་ཡོངས་རྫོགས་བཙན་བཟུང་བྱས་པར་བརྟེན་དམ་པ་གང་ཉིད་ཀྱང་བོད་མི་སྤྱི་མཚུངས་ལྟར་རྒྱ་གར་དུ་ཕེབས་དགོས་བྱུང་། བཙན་བྱོལ་དུ་འབྱོར་ནས་ཡུན་མི་རིང་བ་ཐུན་མོང་དང་ཐུན་མོང་མ་ཡིན་པའི་མདོ་སྔགས་རིག་གནས་དང་བཅས་པ་ལྷག་ཏུ་སྔགས་སྐོར་ཡོངས་རྫོགས་དཔལ་ས་སྐྱ་པའི་ཁྲི་ཐོག་ཞེ་གཅིག་པ་ཆེན་པོ་མཆོག་ལ་འཆད་འཁྲིད་གནང་ནས་སྐུའི་ཡོངས་འཛིན་གྱི་ཐུགས་འགན་བཞེས།
དེ་ནས་རང་ལུགས་ཆོས་བརྒྱུད་ཀྱི་རང་རྐང་ཚུགས་པའི་སློབ་གླིང་གི་བསྟི་གནས་ཤིག་མེད་པར་གཟིགས་ཏེ་ས་སྐྱ་མཐོ་རིམ་སློབ་གྲྭ་གསར་འཛུགས་གནང་ནས་བཤད་གྲྭའི་མཁན་པོ་དང་འགན་འཛིན་གཅིག་ལྕོགས་ལོ་མང་རིང་གནང་སྟེ། སྔར་གྱི་བཤད་རྒྱུན་རྣམས་མི་ཉམས་གོང་འཕེལ་དང་ཉམས་པ་སོར་ཆུད་ཀྱིས་བསྟན་པ་འཛིན་ནུས་ཀྱི་མཁས་གྲུབ་གཉིས་ལྡན་གྱི་སློབ་མ་མང་དག་ཅིག་བསྐྱངས། རིམ་བཞིན་རྒྱ་གར་དུ་གནམ་གཤིས་དང་སྐུ་ཁམས་སོགས་འཕྲོད་མིན་ལ་བརྟེན་བལ་ཡུལ་ཡང་ལེ་ཤོད་དུ་ལོ་ལྔའི་རིང་སྐུའི་བཅད་རྒྱ་དམ་པོ་གནང་ནས་བཞུགས། དགུ་ཅུ་གོ་གྲངས་ནས་དབུ་འཛུགས་གནང་སྟེ་རྒྱལ་ཡོངས་ས་ཆེན་གསུང་རབ་སློབ་གཉེར་ཁང་འདི་བཞིན་གསར་འཛུགས་གནང་སྟེ་སྔོན་བྱོན་བོད་ཀྱི་མཁས་པ་རྣམ་པའི་ཡིག་ཆ་བསྡུ་རུབ་ཀྱིས་གསུང་འབུམ་ཕྱོགས་བསྒྲིགས་ཀྱི་ཐུགས་འགན་བཞེས་ཏེ། ལོ་གཅིག་ནང་དབྱར་དུས་སུ་གྲུབ་མཐའ་རིས་མེད་ཀྱི་བླ་ཆེན་རྣམ་པ་དང་ཕྱི་ནས་ཕེབས་པའི་ཆོས་ཞུ་བ་སྟོང་ཚོ་ལྷག་ལ་བློ་སྦྱོང་ཞེན་པ་བཞི་བྲལ་དང་བློ་སྦྱོང་དོན་བདུན་མ་སོགས་ཀྱི་གསུང་ཆོས་གནང་། རྒྱུན་དུ་ཉམས་ལེན་འབའ་ཞིག་ལ་བརྩོན་ནས་བཞུགས་པ་མ་ཟད། དམ་པ་གང་ཉིད་ནི་སྐུ་ཚེ་གང་པོ་སངས་རྒྱས་ཀྱི་བསྟན་པ་ཁོ་ན་ཐུགས་ལ་བརྣག་སྟེ་བློས་གཏོང་གནང་མཁན་ངེས་དོན་གྱི་སྐྱེ་ཆེན་ཞིག་རེད།
ཁོང་གི་ཞལ་སློབ་ནི་ས་བསྟན་ཡོངས་རྫོགས་ཀྱི་མངའ་བདག་སྐྱབས་མགོན་གོང་མ་བདག་ཁྲི་རིན་པོ་ཆེ་མཆོག་གི་དབུས་པའི་དཔལ་ལྡན་ས་སྐྱ་པའི་བསྟན་འཛིན་རྣམས་དང་། སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་དབུས་པའི་གསང་ཆེན་རྙིང་མ་པའི་བསྟན་འཛིན་རྣམས་དངརྒྱལ་བ་འབྲི་གུང་པའི་རྒྱལ་ཚབ་སྐྱབས་མགོན་ཆེ་ཚང་རིན་པོ་ཆེ་དབུས་པའི་མཉམ་མེད་བཀའ་རྒྱུད་པའི་བསྟན་འཛིན་ལ་སོགས་པའི་དེང་གི་དུས་སུ་མདོ་སྔགས་ཀྱི་བསྟན་པ་ཡོངས་སུ་འཛིན་ནུས་ཀྱི་བསྟན་འཛིན་གྱི་སྐྱེས་བུ་དམ་པ་མང་དུ་བྱོན། 
རིམ་བཞིན་ཁ་སྔོན་བོད་ཟླ་ ༡༡ སྔ་མའི་ཚེས་ ༢༣ ཕྱི་ཟླ་ ༡༢ པའི་ཚེས་ ༢༨ ཉིན་སྔ་དྲོ་བལ་ཡུལ་གྱི་ཆུ་ཚོད་དགུ་པའི་ཐོག་གདུལ་བྱ་རྟག་འཛིན་ཅན་རྣམས་ལ་གཟུགས་སྐུ་བཀོད་པའི་ཆོས་དབྱིངས་སུ་ཐིམ་པའི་ཚུལ་བསྟན་ཏེ། ཉིན་གསུམ་རིང་ཐུགས་དམ་བཞུགས་པ་མ་ཟད་ངོ་མཚར་བའི་ཚད་མ་སོགས་ཧ་ཅང་མང་པོ་བྱུང་ཡོད་འདུག དམ་པ་གང་ཉིད་སྐུ་ཞི་བར་གཤེགས་པ་དེ་ནི་སྤྱིར་ན་སངས་རྒྱས་བསྟན་པ་དང་ཡང་སྒོས་བོད་གངས་ཅན་གྱི་ལྗོངས་འདིར་བསྟན་འཛིན་སྐྱེས་བུ་ཞིག་ཉུང་དུ་ཕྱིན་ཡོད་པ་གདོན་མི་ཟ་བའི་ཡིད་སྐྱོའི་གནས་ཚུལ་ཞིག་རེད་འདུག་སྙམ། སྐུ་གདུང་ཞུགས་འབུལ་གྱི་ཆེད་རྒྱ་གར་ནས་སྐྱབས་རྗེ་དཔལ་ས་སྐྱ་གོང་མ་བདག་ཁྲི་རྡོ་རྗེ་འཆང་ཆེན་པོ་མཆོག་དང་སྐྱབས་རྗེ་ངོར་ཀླུ་ལྡིང་མཁན་ཆེན་རིན་པོ་ཆེ་རྣམ་གཉིས་ཆེད་ཕེབས་གནང་འདུག སྐབས་དེར་འཛམ་གླིང་ཤར་ནུབ་ཡུལ་གྲུ་གང་ས་ནས་ཁོང་གི་བླ་མ་དང་སློབ་མ་རིས་སུ་མ་ཕྱེ་པའི་བླ་ཆེན་མི་ཆེན་བཅས་མཆོད་འབུལ་ཆེད་བཅར་མཁན་མང་པོ་ཞིག་བྱུང་ཡོད་པ་མ་ཟད། རྒྱ་གར་ནས་གདན་ས་ཁག་གི་སྐུ་ཚབ་དང་ཆོག་གྲྭ་སོགས་ཆེད་གཏོང་གནང་འདུག ཕྱི་ཚེས་བདུན་ཉིན་མོ་ཕྱོགས་བཞི་དཀྱིལ་འཁོར་བཞིའི་སློབ་དཔོན་དུ་ཤར་དུ་རྣལ་འབྱོར་མའི་དཀྱིལ་འཁོར་གྱི་རྡོ་སློབ་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དང་། ལྷོར་དཔལ་ཀྱཻ་རྡོ་རྗེའི་དཀྱིལ་འཁོར་གྱི་རྡོ་སློབ་འཁོན་གདུང་བདག་ཆེན་རཏྣ་བཛྲ་རིན་པོ་མཆོག་དང་ནུབ་ཏུ་ཀུན་རིག་རྣམ་པ་སྣང་མཛད་དཀྱིལ་འཁོར་གྱི་རྡོ་སློབ་ཏུ་སྐྱབས་རྗེ་ངོར་ཀླུ་ལྡིང་མཁན་ཆེན་རྡོ་རྗེ་འཆང་མཆོག་དང་། བྱང་དུ་རྡོ་རྗེ་སེམས་དཔའི་དཀྱིལ་འཁོར་གྱི་རྡོ་སློབ་ཏུ་རྫོང་གསར་མཁྱེན་བརྩེ་ཐུབ་བསྟན་ཆོས་ཀྱི་རྒྱ་མཚོ་མཆོག་བཅས་དབུ་བཞུགས་ཐོག་གཞན་ཡང་བླ་ཆེན་རྣམ་པ་དང་དགེ་འདུན་འདུས་པ་བདུན་བརྒྱ་ཡས་མས་བཅས་ཚོགས་བཞུགས་གནང་སྟེ་ཞུགས་འབུལ་གནང་། སྐབས་དེར་བོད་རིགས་དང་བལ་པོའི་ཡུལ་མི་སོགས་མི་མང་སྟོང་ཚོ་མང་པོ་ཡང་ཚོགས་མཇལ་ལ་བཅར་འདུག་པ་བཅས། །
