༢༠༡༡ ཟླ་ ༢ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༧ ནས་ ༡༠ བར་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པས་རཱ་ཇི་སི་ཐཱན་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་དང་སྟབས་བསྟུན། ས་གནས་བོད་མི་སུད་ཚོང་བ་རྣམས་ཀྱིས་ཆེད་འབོད་ལྟར་བོད་དོན་དྲིལ་བསྒྲགས་ཆེད་༸གོང་ས་མཆོག་གི་མཛད་རྣམ་དང་བཙན་བྱོལ་ནང་གི་འགྲུལ་བཞུད་སོགས་ཀྱི་པར་རིགས་ཁག་གཅིག་འགྲེམས་སྟོན་གནང་རྒྱུ་མ་ཟད། བོད་དོན་དང་འབྲེལ་བའི་གློག་བརྙན་སྟོན་རྒྱུ་ཡིན་འདུག  དེ་རྗེས་ཕྱི་ཟླ་ ༢ ཚེས་ ༡༥།༡༦ བཅས་ཉིན་གཉིས་རིང་ལྡི་ལི་རོ་ཧི་ནི་ས་གནས་གཞོན་ནུ་ལྷན་ཚོགས་ཀྱིས་གོ་སྒྲིག་འོག་ལྡི་ལི་གཙུག་ལག་སློབ་ཁང་གི་ཊ་གོར་ཚོམས་ཆེན་དུ་བོད་ཀྱི་དུས་སྟོན་ (Tibet Festival) ཞེས་པའི་ལས་འཆར་དང་འབྲེལ་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པས་བཙན་བྱོལ་ནང་གི་འགྲུལ་བཞུད། ཕ་ཡུལ་ཕྱོགས་སུ་རྒྱང་བལྟ།  ཞེས་པའི་པར་རིགས་ཚན་པ་འདྲ་མིན་ཁག་འགྲེམས་སྟོན་གནང་རྒྱུ་ཡིན་འདུག ཕྱོགས་མཚུངས་སྐབས་དེར་བོད་དང་འབྲེལ་བའི་བརྗོད་གཞི་འདྲ་མིན་ཐོག་མཁས་དབང་ཁག་དབུ་བཞུགས་ཐོག་བགྲོ་གླེང་ཚོགས་འདུ་དང་རྒྱ་གར་གྱི་ཆོས་གྲོགས་ཚོས་བོད་ཆས་གྱོན་རྒྱུའི་འགྲན་བསྡུར་གནང་རྒྱུ་ཡིན་པ་མ་ཟད།  བོད་མིའི་སྲོལ་རྒྱུན་གྱི་རྩེད་མོ་ཁག་གཅིག་ཀྱང་གོ་སྒྲིག་ཞུ་རྒྱུ་ཡིན་འདུག་པ་བཅས།།