༢༠༡༡ ཟླ་ ༢ ཚེས་ ༣ རེས་གཟའ་ཕུ་བུར།
༄༅། །༸གོང་ས་མཆོག་གི་སྐུ་ཚབ་སྐལ་བཟང་རྒྱལ་མཚན་མཆོག་ནས་སྐབས་གསུམ་པའི་བཀའ་བློན་ཁྲི་པའི་དངོས་གཞིའི་འོས་མི་གསུམ་ལ་བོད་རྒྱ་འབྲེལ་མོལ་གྱི་ལས་རིམ་དང་རྒྱབ་ལྗོངས་སྙིང་དོན་འགྲེལ་བརྗོད་གནང་ཡོད།
དེ་ཡང་༸གོང་ས་༸སྐྱབས་མགོན་ཆེན་པོའི་བཀའ་འཁྲོལ་ཐོག་བཀའ་བློན་ཁྲི་པ་ཟམ་གདོང་རིན་པོ་ཆེར་གོ་བསྡུར་གྱིས་ཕྱི་ལོ་ ༢༠༡༡ ཟླ་ ༢ ཚེས་ ༢ རེས་གཟའ་ལྷག་པའི་ཉིན་སྐུ་ཚབ་སྐལ་བཟང་རྒྱལ་མཚན་མཆོག་གིས་བཀའ་ཤག་ཚོགས་ཁང་དུ་བཀའ་ཁྲི་སྐབས་གསུམ་པའི་དངོས་གཞིའི་འོས་མི་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་། བཀའ་ཟུར་བཀྲིས་དབང་འདུས་མཆོག བློ་བཟང་སེང་གེ་ལགས་བཅས་གསུམ་ལ་བོད་རྒྱ་འབྲེལ་མོལ་སྐོར་ངོ་སྤྲོད་གནང་ཞིང་། ཐོག་མར་ཕྱི་ལོ་ ༡༩༧༩ ལོར་རྒྱ་ནག་གི་ཆེས་མཐོའི་འགོ་ཁྲིད་ཏིང་ཞའོ་ཕིང་གིས་བོད་རང་བཙན་མ་གཏོགས་གནད་དོན་གཞན་ཚང་མ་གྲོས་བསྡུར་གནང་ཆོག་པར་གསུངས་པ་ལ་བརྟེན་ནས་བོད་རྒྱ་འབྲེལ་མོལ་གྱི་ལས་རིམ་འགོ་ཚུགས་ཚུལ་རྒྱབ་ལྗོངས་འགྲེལ་བརྗོད་དང་།
ཕྱི་ལོ་ ༢༠༠༢ ནས་འབྲེལ་ལམ་བསྐྱར་མཐུད་ཀྱིས་འབྲེལ་མོལ་ཐེངས་དགུ་དང་ནང་ལུགས་གྲོས་བསྡུར་ཐེངས་གཅིག་གི་ཚིག་ཐོ་ཁྱོན་བསྡོམས་ཤོག་གྲངས་ ༦༢༣ དང་། རྒྱ་གཞུང་ལ་ཡིག་ཐོག་སྤྲད་པའི་ཡིག་ཆ་གསལ་བཤད་དང་། འགྲེལ་བརྗོད། གསལ་བསྒྲགས་བཅས་ཤོག་གྲངས་ ༢༠༠ ཡི་སྙིང་དོན་འགྲེལ་བརྗོད་གནང་ཡོད།
ཕྱི་ལོ་ ༢༠༠༢ ནས་བཟུང་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་དབུ་ཁྲིད་པའི་སྐུ་ཚབ་ཚོགས་ཆུང་དང་རྒྱ་ནག་གཞུང་གི་སྐུ་ཚབ་ཚོའི་དབར་འབྲེལ་མོལ་ཐེངས་དགུ་གནང་ཡོད། འབྲེལ་མོལ་ཐེངས་དགུ་པ་དེ་ཕྱི་ལོ་ ༢༠༡༠ ཟླ་ ༡ པོའི་ནང་གནང་ཡོད་པ་བཅས།
