༢༠༡༡ ཟླ་ ༢ ཚེས་ ༡༤ རེས་གཟའ་ཟླ་བ།

༅༅། །ཕྱི་ལོ་ ༢༠༡༡ ཟླ་ ༢ ཚེས་ ༡༠ དང་ ༡༡ བཅས་ཉིན་གྲངས་གཉིས་རིང་ཐེ་ཝན་བོད་གཞུང་སྐུ་ཚབ་དོན་ཁང་གིས་གོ་སྒྲིག་ཐོག་དཔལ་ས་སྐྱའི་གདུང་སྲས་རཏྣ་བཛྲ་རིན་པོ་ཆེ་མཆོག་གིས༌བློ་སྦྱོང་ཞེན་པ་བཞི་བྲལ་གྱི་གསུང་ཆོས་བཀྲིན་ཆེ་བ་གནང་ཡོད། དེ་ཡང་གསུང་ཆོས་ཐོག་ཐེ་ཝན་ཆོས་ཞུ་བ་ ༣༠༠ ཙམ་ཞིག་འདུ་འཛོམས་བྱུང་ཡོད། དེ་ཉིན་བོད་གཞུང་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་རིན་པོ་ཆེ་མཆོག་གིས་དུས་ཚོད་འགངས་ཆེན་བཏོན་ཏེ་གསུང་ཆོས་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག སྐུ་ཚབ་དོན་གཅོད་ཀྱིས་དཔལ་ས་སྐྱ་པའི་གདུང་རབས་བྱུང་རིམ་སྐོར་གསུང་བཤད་གནང་ཡོད། དེ་བཞིན་ཁོང་གིས་གསུང་ཆོས་གོ་སྒྲིག་བྱེད་དགོས་དོན་ནི་ཐེ་ཝན་གྱི་ནང་པ་ཚོར་ཞབས་ཞུའི་ཆེད་དུ་ཡིན་ཞེས་གསུངས་ཡོད། ཕྱི་ལོ་ ༢༠༠༣ ལོ་ནས་བཟུང་ཐེ་ཝན་བོད་གཞུང་སྐུ་ཚབ་དོན་ཁང་ནས་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་གདན་ཞུས་ཀྱིས་གསུང་ཆོས་དང་ནང་ཆོས་ངོ་སྤྲོད་སོགས་གོ་སྒྲིག་ཞུས་ཡོད་པའི་ཁོངས་ནས་ད་རེས་ཐེངས་ ༩ པ་ཆགས་ཡོད་པ་བཅས།།