༢༠༡༡ ཟླ་ ༢ ཚེས་ ༡༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༡༨ ཉིན་༸གོང་ས་༸སྐྱབས་མགོན་ཆེནཔོ་མཆོག་གིས་རྒྱ་གར་གྲོང་ཁྱེར་(Mumbai University’s)མུམ་བྷེ་གཙུག་ལག་གཉེར་ཁང་ཞིག་ཏུ་བཀའ་སློབ་སྩལ་གྲུབ་རྗེས་དེར་འདུས་སློབ་མ་རྣམས་ཀྱི་དྲི་བར་བཀའ་ལན་སྩལ་དོན། བོད་ཀྱི་དཀའ་རྙོག་དེ་ངོས་ཀྱི་མི་ཚེ་ནང་སེལ་ཐུབ་རྒྱུའི་རེ་བ་ཡོད། དེ་སྔོན་ངོས་རང་དམར་པོའི་མག་ཁ་སེ་རིང་ལུགས་ལ་དེ་སྔ་ནས་དོ་སྣང་ཆེན་པོ་བྱེད་བཞིན་ཡོད་ལ་སྐབས་ཤིག་ངོས་རང་ཡང་རྒྱ་ནག་གུང་ཁྲན་ཚོགས་མིའི་ཁོངས་སུ་འཛུལ་ཞུགས་བྱེད་འདོད་ཡོད་ཅེས་དེ་སྔ་རྒྱ་ནག་གི་དཔོན་རིགས་ཚོར་ངོས་ཀྱིས་བརྗོད་མྱོང་ཡོད།  དེ་བཞིན་སློབ་བུ་གཅིག་གིས་དེང་སྐབས་འཛམ་གླིང་ནང་དཔལ་འབྱོར་ཉམས་གུད་ཕྱིན་པའི་སྐོར་ལ་དྲི་བ་ཕུལ་བར་བཀའ་ལན་སྩལ་དོན། དཀའ་རྙོག་དེ་དག་ནི་ཚོང་པ་ཚོ་འདོད་རྔམ་ཆེ་དྲགས་པར་བརྟེན་ནས་བྱུང་བ་ཞིག་ཡིན། ཚོང་པ་དེ་དག་ཀྱང་སྤྱི་ཚོགས་འདྲ་མིན་ནས་ཡོང་བ་ཤ་སྟག་ཡིན་སྟབས། རྩ་བའི་སྤྱི་ཚོགས་རང་གི་བསམ་བློའི་འཁྱེར་སོའི་ཐོག་བསྒྱུར་བ་ཞིག་མ་བཏང་ན་ཡོང་ཐབས་མེད། རྒྱ་གར་གྱི་ཡུལ་ལུང་འདི་ནི་མི་འབོར་ཆེན་པོ་ཡིན་པ་ཙམ་མ་ཟད། ཆོས་ལུགས་འདྲ་མིན་སྣ་ཚོགས་ཤིག་ཡོད་པའི་གནས་སྟངས་དེ་དག་ལ་གཞིགས་ན་རྙོག་གྲ་ཆེ་བའི་རིགས་ཡོང་གི་མེད་པ་དེ་ནི་བསྔགས་བརྗོད་ཞུས་པ་ཡིན་ཞེས་བཀའ་ལན་སྩལ་ཡོད། དེ་བཞིན་གསར་འགོད་པ་ཁག་གཅིག་གིས་ཨི་ཇབ་དང་ཏུན་ནི་སེ་ཡ་མི་མང་སྒེར་ལངས་ཀྱིས་ལས་འགུལ་སྤེལ་བའི་སྐོར་ལ་དྲི་བ་ཕུལ་བར་བཀའ་ལན་སྩལ་དོན། ཨི་ཇབ་དང་ཏུན་ནི་སེ་ཡ་མི་མང་སྒེར་ལངས་ཀྱིས་ལས་འགུལ་སྤེལ་བ་དེ་དག་དྲག་པོའི་ཐོག་ནས་མ་ཡིན་པར་འཚེ་མེད་ཞི་བའི་ལམ་གྱི་ཐོག་ནས་སྤེལ་བ་དེ་ནི་རྒྱ་གར་སྐྱེས་བུ་དམ་པ་གྷན་རྡི་ཇིའི་ལམ་སྟོན་གཞིར་བཟུང་ཡིན་གནང་བ་ཞིག་ཡིན། དེ་སྔ་མི་རིགས་ནག་པོའི་རང་དབང་འཐབ་རྩོད་གནང་མཁན་ཆོས་དཔོན་མཱ་ཏཱན་ལུ་ཐར་ཀིང་དང་ལྷོ་ཨ་ཕི་རི་ཀའི་སྲིད་འཛིན་ཟུར་པ་ནཱེལ་སེན་མ་ཌེ་ལ་རྣམ་གཉིས་ནས་ཀྱང་དེ་ལྟར་མཛད་རྗེས་བཞག་ཡོད། འཚེ་མེད་ཞི་བའི་ལམ་ནི་ཉམ་ཐག་པ་ཞིག་མ་ཡིན་པར་དེ་ནི་བློ་སྟོབས་སྐྱེ་རྒྱུའི་ལས་དོན་ཞིག་ལ་ངོས་འཛིན་བྱེད་དགོས་པ་ཞིག་ཡིན། ཞེས་བཀའ་ལན་སྩལ་ཡོད། ཐེངས་འདིའི་༸གོང་ས་མཆོག་གིས་བཀའ་སློབ་སྩལ་སྐབས་མུམ་བྷེ་མཐོ་རིམ་སློབ་གྲྭ་ཁག་མི་འདྲ་བ་ནས་སློབ་ཕྲུག་ ༤༠༠ ཙམ་བཅར་ཡོད་པ་བཅས།།