༢༠༡༡ ཟླ་ ༢ ཚེས་ ༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མོན་གྷོ་འདོད་རྒུ་གླིང་གཞིས་ཆགས་ཁུལ་གྱི་མཛད་འཕྲིན་རྣམས་ལེགས་པར་གྲུབ་རྗེས་ཕྱི་ཚེས་ ༨ ནས་ ༡༢ བར་རྒྱ་གར་ནུབ་ཕྱོགས་མངའ་སྡེ་ར་ཇི་སི་ཐན་གྱི་གྲོང་ཁྱེར་ཇོ་ཌ་པུར་དང་ཇེའི་པུར་སོགས་ནང་ཆིབས་སྒྱུར་བསྐྱང་སྟེ་མཛད་འཕྲིན་བསྐྱང་གནང་མཛད་རྒྱུ་ཡིན་འདུག
དེ་ཡང་མགོན་པོ་གང་ཉིད་མཆོག་གིས་ཕྱི་ཚེས་ ༩ སྔ་དྲོའི་ཆུ་ཚོད་ ༩ །༣༠ ཙམ་ལ་ཇོ་ཌ་པུར་གྱི་གྲོང་ཁྱེར་ནང་རྟེན་གཞི་བྱས་པའི་ཨ་ར་ཝ་ལི་ཨིན་སི་ཊུ་ཊ་ (Aravalli Institute Of Management ) ཞེས་པའི་སློབ་ཁང་གིས་ཇི་ལྟར་གསོལ་འདེབས་ཞུས་དོན་བཞིན་ཏཱཇ་ཧ་རི་མ་ཧཱལ་ (Taj Hari Mahal) ཞེས་པའི་མགྲོན་ཁང་གི་ཚོམས་ཆེན་ནང་སློབ་ཁང་དེ་ལོ་བཅུ་འཁོར་བའི་དུས་ཆེན་མཛད་སྒོ་དང་འབྲེལ་བའི།  རྒྱ་གར་སྲོལ་རྒྱུན་གྱི་གཅེས་ནོར།  དཔལ་ནཱ་ལེནྡྲའི་ལེགས་བཤད། ཅེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་དང་། སྐབས་དེར་ཇོ་ཌ་པུར་གྱི་མར་ཝར་(Maharaja Gaj Singh of Marwar-Jodhpur ) རྒྱལ་པོ་ག་ཇ་སིངྒ་མཆོག་ཕེབས་རྒྱུ་ཡིན་འདུག
དེ་རྗེས་ཉིན་རྒྱབ་ཆུ་ཚོད་ ༡།༣༠ ཙམ་ལ་རཇ་མ་ཏཱ་བུ་མོའི་སློབ་གྲྭའི་ནང་ཆིབས་སྒྱུར་བསྐྱང་སྟེ་བཀའ་སློབ་སྩལ་གནང་མཛད་རྒྱུ་ཡིན་པ་མ་ཟད།  ཕྱི་ཚེས་ ༡༠ ཉིན་༸གོང་ས་མཆོག་གིས་མངའ་སྡེ་དེའི་བོད་མི་སུད་ཚོང་བ་དང་རྒྱ་གར་གྱི་ཡུལ་མི་རྣམས་ཏཱཇ་ཧ་རི་མ་ཧཱལ་གྱི་ཚོགས་ཁང་དུ་འདུ་འཛོམས་ཐོག་བཀའ་སློབ་སྩལ་གནང་མཛད་རྒྱུ་ཡིན་འདུག མཛད་སྒོ་དེའི་སྐབས་ཇོཌ་པུར་མར་ཝར་གྱི་རྒྱལ་པོ་ག་ཇ་སིངྒ་མཆོག་དང་རཱ་ཇ་སི་ཐན་མངའ་སྡེའི་སྤྱི་ཁྱབ་བློན་ཆེན་ (Chief Minister) སྐུ་ཞབས་ཨ་ཤོག་གེ་ལོཌ་ (Ashok Ghelot) མཆོག རྒྱ་གར་གཞུང་གི་གྲོས་ཚོགས་འཐུས་མི་ལྕམ་ཅན་སྡེ་རེ་ཤི་ཀུ་མ་རི་མཆོག གཞན་ཡང་ཇོ་ཌ་པུར་གྲོང་སྡེའི་སྤྱི་ཁྱབ་པ་(Mayor) བཅས་སྐུ་མགྲོན་དུ་མགྲོན་འབོད་ཞུས་ཡོད་འདུག ཕྱི་ཚེས་ ༡༢ ཉིན་༸གོང་ས་མཆོག་གིས་ཇེའི་པུར་ (Jaipur) དུ་རྟེན་གཞི་བྱས་པའི་སྦེར་ཕུ་ཊ་མཐོ་སློབ་ཏུ་(Barefoot College) ཆིབས་སྒྱུར་བསྐྱང་སྟེ་བཀའ་སློབ་སྩལ་གནང་མཛད་རྒྱུ་ཡིན་འདུག་པ་བཅས།།