༢༠༡༡ ཟླ་ ༢ ཚེས་ ༣ རེས་གཟའ་ཕུ་བུར།
༄༅། །ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༢ ཚེས་ ༢ ཉིན་གྱི་སྔ་དྲོ་ཆུ་ཚོད་ ༨ པ་ཡོལ་ཙམ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་ནས་དུང་རྒྱ་སྤོས་སྣེས་སྔོན་བསུས་ཏེ་བཞུགས་ཁྲི་རིན་པོ་ཆེར་༸ཞབས་སོར་འཁོད་དེ་འབྲས་སྤུངས་བླ་སྤྱིའི་འདུ་ཁང་དུ་དེར་འདུས་དད་ལྡན་སེར་སྐྱ་ཕོ་མོ་ཡོངས་ལ་རྩ་ཤེས་ཊི་ཀའི་ཟིན་བྲིས་ཀྱི་ཆོས་འབྲེལ་ཉིན་གཉིས་པ་དབུ་འཛུགས་བསྐྱངས་ཡོད།
དེ་ཡང་ཉིན་གཉིས་པའི་ཆོས་འབྲེལ་མཇུག་སྒྲིལ་མ་ཐུབ་པར་བརྟེན་སང་ཉིན་མུ་མཐུད་སྩལ་རྒྱུ་ཡིན་སྐོར་བཀའ་སློབ་ཕེབས་པ་དང་ཆབས་ཅིག་ཚེས་ ༥ ཉིན་དགའ་ལྡན་ཤར་རྩེ་གྲྭ་ཚང་དུ་འཇིགས་བྱེད་ཀྱི་བཀའ་དབང་སྩལ་རྒྱུ་ཡིན་སྟབས་དེ་ཉིན་དོལ་རྒྱལ་བསྟེན་སྲོལ་བྱེད་མཁན་ཚོ་ཆོས་འབྲེལ་བྱེད་སྐབས་མ་ཡོང་རོགས་ཞེས་བཀའ་སློབ་ནན་པོ་ཕེབས་ཡོད། དེ་བཞིན་༸གོང་ས་མཆོག་གིས་ཕྱི་ཚུལ་དུ་དོལ་རྒྱལ་བསྟེན་མཁན་མིན་ཡང་ནང་བསམ་བློའི་ནང་དོལ་རྒྱལ་ལ་ཡིད་ཆེས་ཕྲན་བུ་ཡོད་མཁན་ཚོ་ཡང་མ་ཕེབས་རོགས་ཞེས་བཀའ་སྩལ་ཡོད། ༸གོང་ས་མཆོག་གིས་བཀའ་སློབ་ཕེབས་དོན། ངོས་ལ་གྲོགས་པོ་མང་པོ་ཡོད་སྟབས། ཕྱི་རྒྱལ་དང་བོད་ཕྱི་ནང་གཉིས་ཀྱི་གནས་ཚུལ་མང་པོ་གོ་གི་འདུག ངོས་རང་ཕྱག་སྟོང་སྤྱན་སྟོང་མིན་ཡང་རྣ་ཆོག་སྟོང་ཡོད་ལབ་མཆོག་གི་རེད་ཅེས་ཞལ་ཤོབ་མཛད་ཡོད། དེ་བཞིན་མགོན་པོ་གང་ཉིད་མ་ཆོག་གིས་བཀའ་སློབ་སྩལ་དོན། ཕྱི་རྟག་ཏུ་ངོས་ཀྱི་མདུན་ལ་འདྲ་ཆགས་པོ་བྱས་ཀྱང་རྒྱབ་ཕྱོགས་སུ་དེ་ལྟར་མེད་པའི་གནས་ཚུལ་དེ་འདྲ་ཡང་གོ་རྒྱུ་འདུག དེ་ནི་རང་མགོ་རང་གི་ལྐོག་ཏུ་མ་འགྱུར་དུས་སོ་སོས་བསམ་བློ་གཏོང་དགོས་པ་རེད། རྒྱལ་བ་རིན་པོ་ཆེས་དོལ་རྒྱལ་དམ་བསྒྲགས་བྱས་པར་བརྟེན་ཕྱི་ངོས་སུ་བསྟེན་སྲོལ་བྱེད་ཀྱི་མེད་མདོག་མདོག་བྱས་ཏེ། སེམས་ནང་ལ་བྱམས་མགོན་རྒྱལ་བའི་བསྟན་སྲུང་བླ་ན་མེད་པ་ཡིན་བསམས་ཡོད་ན་འཇིགས་བྱེད་ཀྱི་བཀའ་དབང་ལ་མ་ཡོང་རོགས་ཞེས་ཟེར་གྱི་ཡོད། ང་ཚོ་མང་གཙོའི་ལམ་སྲོལ་ཐོག་སྐྱོད་བཞིན་ཡོད་དུས་དངོས་སུ་ངོ་རྒོལ་བྱེད་མཁན་ཚོ་འགྲིག་པ་རེད། དེ་མིན་ཕྱི་ལ་རྣམ་འགྱུར་གཅིག་དང་ནང་དོན་རྣམ་འགྱུར་གཞན་པ་ཞིག་བསྟན་ན་དེ་ནི་རྫུན་མ་རེད། མགོ་གཉིས་བྱས་ན་འགྲིག་གི་མ་རེད། བསམ་བློའི་ནང་ད་དུ་ཡང་དོལ་རྒྱལ་བློས་མ་ཐུབ་མཁན་དེ་འདྲ་ཡོད་ན་ཚེས་ ༥ ཉིེན་བཀའ་དབང་ཞུ་བར་མ་ཡོང་རོགས་ཞེས་ནན་པོ་བཀའ་ཕེབས་ཡོད།
ཕྱེད་ཡོལ་ཆུ་ཚོད་ ༢ ཡོལ་ཙམ་ལ་༸གོང་ས་མཆོག་འབྲས་སྤུངས་སྒོ་མང་གྲྭ་ཚང་གི་འདུ་ཁང་ནང་ཆིབས་སྒྱུར་སྐྱོང་སྐབས་སྒོ་མང་མཁན་རིན་པོ་ཆེ་ཡོན་ཏན་དམ་ཆོས་ཀྱིས་སྤོས་སྣེས་སྔོན་བསུས་ཏེ་ཕེབས་བསུ་ཞུས་ཡོད། སྐབས་དེར་སྒོ་མང་གྲྭ་ཚང་གི་དགེ་འདུན་པས་གཙོས་གྲྭ་བཙུན་ཞལ་གྲངས་ ༡༥༠༠ བརྒལ་བ་དང་། དེ་བཞིན་སོག་རིགས་ཕོ་མོ་ཁྱོན་མི་གྲངས་བརྒྱ་བརྒལ་བ་ཞིག་ཀྱང་བཅར་ཡོད། དེ་ནས་མགོན་པོ་གང་ཉིད་མཆོག་བཞུགས་ཁྲིར་༸ཞབས་སོར་འཁོད་གྲུབ་བསྟུན་སྒོ་མང་མཁན་རིན་པོ་ཆེས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་དགེ་འདུན་འདུས་མང་ཡོངས་ཀྱིས་རྒྱལ་བའི་ཞབས་བརྟན་དང་པཎ་གྲུབ་བཅུ་བདུན་གྱི་གསོལ་འདེབས་གསུང་འདོན་གནང་གྲུབ་མཚམས། མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། སྒོ་མང་གྲྭ་ཚང་འདི་སྔོན་མ་བོད་ནང་མཁས་པ་མང་པོ་བྱུང་སའི་གྲྭ་ཚང་ཞིག་ཆགས་ཡོད། ད་བར་ཁྱེད་རང་ཚོས་ཧུར་ཐག་བྱས་འདུག ཡུལ་ཁག་འདྲ་མིན་ནས་གྲྭ་རྒྱུན་མང་པོ་ཞིག་འདིར་སློབ་གཉེར་བྱེད་བཞིན་ཡོད། ལྷག་པར་སོག་པོའི་གྲྭ་རྒྱུན་མང་པོ་ཞིག་གྲྭ་ཚང་འདིའི་ནང་ཡོད། བར་སྐབས་རིམ་པས་གྲྭ་རྒྱུན་འཕེལ་ཏེ་ཞེ་དྲག་ཡག་པོ་འདུག ཆེན་པོ་ཧོར་གྱི་ཡུལ་ནས་སྤྲུལ་སྐུ་ཁ་ཤས་ཤིག་འདིར་སློབ་གཉེར་གནང་བཞིན་ཡོད། ད་གིན་སོག་པོའི་ཕྱི་སྲིད་བློན་ཆེན་དང་ངེད་གཉིས་བཀའ་མོལ་བྱུང་། སྔར་རྒྱ་གར་གྱི་ཡུལ་ལ་བླ་མ་དང་སྤྲུལ་སྐུ་ངོས་འཛིན་བྱེད་རྒྱུ་ལུགས་སྲོལ་མེད། བོད་ལ་ཕལ་ཆེར་ཀརྨ་པ་དུས་གསུམ་མཁྱེན་པའི་སྐབས་ནས་སྤྲུལ་སྐུ་ངོས་འཛིན་བྱེད་རྒྱུ་བྱུང་བ་རེད། སྤྲུལ་སྐུའི་ནང་ལའང་བསྟན་པའི་ཞབས་འཐེན་མཁན་ཡང་རེ་བཟུང་ཡོད། འོན་ཀྱང་སྤྱི་ཡོངས་ནས་དགོན་པ་དང་ཡུལ་པ་མང་པོ་ཞིག་ལ་བླ་མ་དང་སྤྲུལ་སྐུའི་མཚན་ཐོགས་མཁན་ཚོས་བསྟན་པ་དང་འགྲོ་བའི་ཞབས་འདེགས་ཆེན་པོ་བསྒྲུབས་ཡོད། ཆེན་པོ་ཧོར་གྱི་ཡུལ་ནས་ཡིན་པའི་སྤྲུལ་སྐུ་ཁ་ཤས་ཡོད་པ་དེ་ཚོས་ཉུང་ཐར་ལོ་བཅུ་བཅོ་ལྔ་སློབ་གཉེར་བྱེད་དགོས་ཀྱི་རེད། དེ་བཞིན་ཕྱི་སྲིད་བློན་ཆེན་ལ་ངོས་རང་གི་སློབ་གཉེར་ཇི་ལྟར་བྱས་པའི་ལོ་རྒྱུས་བཤད་པ་ཡིན། ངོས་༸རྒྱལ་བ་རིན་པོ་ཆེ་ཡིན་ཡང་སློབ་གཉེར་མ་བྱས་པར་ཡོན་ཏན་ཐམས་ཅད་ཐུགས་སུ་ཆུད་ཀྱི་མེད། སོག་པོ་བླ་མ་ཚོར་ཆ་བཞག་ན་བླ་མ་སྐྱེས་བུ་དམ་པ་རེད། འོན་ཀྱང་ཡོན་ཏན་མ་བསླབ་པར་མཁྱེན་གྱི་རེད་ཟེར་རྒྱུའི་སྐད་ཆ་ཤོད་རྒྱུ་མེད། དེ་སྔ་ང་ཚོ་བོད་ལ་བྱུང་བ་ལྟར་ཕྱི་ལོ་ ༡༩༣༠ ནང་ཁྱེད་རང་ཚོར་ཧ་ལས་པའི་དཀའ་ངལ་འཕྲད་ཡོད། དགེ་འདུན་རབ་ཏུ་བྱུང་བ་འབུམ་ཕྲག་མང་པོ་དམར་གསོད་བཏང་ཡོད་པ་མ་ཟད། དགོན་སྡེ་ཁག་མང་པོ་ཞིག་གཏོར་བཤིག་བཏང་བའི་གནས་ཚུལ་བྱུང་ཡོད། བར་སྐབས་རང་དབང་སླར་གསོ་བྱུང་བ་རེད། རང་དབང་ཐོབ་པའི་སྐབས་སུའང་འདས་པའི་ལོ་དྲུག་ཅུ་བདུན་ཅུ་རིང་ཕྱིའི་བསྟན་པའི་དགྲ་བོ་ཤུགས་ཆེ་ཡོད་ཀྱང་། སེམས་ནང་སོག་པོའི་ཡུལ་པ་ཚོས་སངས་རྒྱས་པའི་ཆོས་དེ་མ་བརྗེད་པར་གནས་ཡོད། ངོས་རང་ཐོག་མར་སོག་པོའི་ཡུལ་དུ་བསྐྱོད་སྐབས་དམར་པོའི་ལུང་པ་རེད། དགའ་ལྡན་དགོན་པའི་ནང་རང་དབང་གང་ཙམ་ཡོད་ཀྱང་ཕྱིར་རང་དབང་མེད། སོག་པོའི་སྐོར་སྲུང་བ་དེ་འདྲ་གཅིག་པུ་ཡོད་སྐབས་ཞྭ་མོ་ཕུད་དེ་བྱིན་རླབས་གནང་རོགས་ཞེས་ཟེར་མཁན་ཡོད། རོགས་པ་གཞན་མཉམ་དུ་ཡོད་སྐབས་དད་པ་མེད་མདོག་བྱས་ནས་སྡོད་ཀྱི་འདུག ཅེས་སོགས་ཀྱི་བཀའ་སློབ་ཕེབས་ཡོད།
ཡང་མགོན་པོ་གང་ཉིད་མཆོག་གིས་སོག་རིགས་སློབ་གཉེར་བ་ཚོར་སློབ་སྦྱོང་ཡག་པོ་བྱེད་དགོས་པའི་སྐོར་ལ་བཀའ་སློབ་ཕེབས་དོན། ང་ཚོའི་གནས་སྟངས་ལ་ཆ་བཞག་ན་བཙན་བྱོལ་བ་རེད། འོན་ཀྱང་ང་རང་ཚོ་ལོ་བརྒྱ་ཕྲག་མང་པོ་ནས་དམིགས་བསལ་གྱི་འབྲེལ་བ་ཡོད་པའི་ཆ་ནས་ཁྱེད་རང་ཚོ་སྐུ་མགྲོན་ལྟ་བུ་ཆགས་ཡོད། ཁྱེད་རང་ཚོ་སློབ་གཉེར་གནང་རྒྱུ་དེ་དག་ང་ཚོར་དམིགས་བསལ་གྱི་ཆ་རྐྱེན་གང་ཡང་མེད་ཀྱང་། ང་ཚོ་བོད་ལ་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་དེ་དུས་ད་ལྟ་བར་དུ་ང་ཚོས་ཉར་ཚགས་བྱས་ཡོད། ཁྱེད་རང་ཚོ་སློབ་གཉེར་ཡག་པོ་བྱེད་དགོས། ཆེན་པོ་ཧོར་ཡུལ་གྱི་སློབ་ཕྲུག་ཚོས་བསྟན་པའི་ཞབས་འདེགས་སྒྲུབ་པར་རང་རྒྱུད་ལ་ལུང་རྟོགས་ཀྱི་བསྟན་པའི་གནས་ཚད་ཚང་བའི་ཐོག་བསྟན་པའི་ཞབས་འདེགས་བསྒྲུབ་དགོས། ཞེས་སོགས་ཀྱི་བཀའ་སློབ་སྩལ། དེ་རྗེས་སྒོ་མང་དགེ་འདུན་པའི་རྩོད་རྒྱུགས་སྐབས་༸གོང་ས་མཆོག་གིས་ཐུགས་ཞིབ་མཛད་ཡོད་པ་མ་ཟད། རྩོད་རྒྱུགས་གནང་མཁན་ཚོ་དང་ལྷན་སྐུ་པར་བསྒྲོན་ཏེ་མོན་གྷོ་དཔལ་ས་སྐྱའི་ཆོས་སྒར་བརྩེ་ཆེན་མདོ་སྔགས་ཆོས་གླིང་དུ་ཆིབས་སྒྱུར་བསྐྱངས་ཏེ། དེར་འདུས་མང་ ༡༨༥ ཙམ་ལ་མགོན་པོ་གང་ཉིད་མཆོག་གིས་བསླབ་པ་སློབ་གཉེར་ཡག་པོ་བྱེད་དགོས་པའི་བཀའ་སློབ་ཕེབས་པ་དང་ཆབས་ཅིག་དགོན་པའི་ངོས་ནས་སྤྱི་ཚོགས་ཀྱི་ཞབས་འདེགས་བསྒྲུབ་རྒྱུའི་ལས་དོན་མང་པོ་བསྒྲུབས་པར་བསྔགས་བརྗོད་མཛད་པ་དང་ལྷན་མུ་མཐུད་མི་མང་ལ་རོགས་སྐྱོར་བྱེད་དགོས་པའི་བཀའ་སློབ་ཟབ་མོ་ཕེབས་ཡོད་པ་བཅས།།
