༢༠༡༡ ཟླ་ ༡ ཚེས་ ༣༡ རེས་གཟའ་ཟླ་བ།
༄༅། །འདི་གར་ཨ་རིའི་བོད་གཞུང་སྐུ་ཚབ་དོན་ཁང་ནས་གནས་ཚུལ་བཏང་བའི་ནང་འཁོད་དོན། ཨ་རིའི་གྲོང་ཁྱེར་ནིའུ་ཡོཀ་ནང་ཡོད་པའི་རྒྱ་རིགས་ཀྱི་ཚོགས་པ་ སྐྱིད་སྡུག་ཆེ་ཁག་དྲུག་ཐུན་མོང་ནས་གོ་སྒྲིག་ཞུས་པའི་སྐུ་ཞབས་སི་དུ་ཧ་ལ་མྱ་ངན་རྗེས་དྲན་བྱེད་པའི་ཚོགས་འདུ་ཞིག་ཕྱི་ཟླ་ ༡ ཚེས་ ༣༠ ཉིན་གྲོང་ཁྱེར་ནིའུ་ཡོཀ་གི་ཅའེ་ནཱ་ཁྲའོན་ཞེས་པའི་རྒྱ་ནག་གྲོང་སྡེར་ཚོགས་ཡོད་པ་དང་། བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་གདན་ཞུས་ལྟར་རྗེས་དྲན་ཚོགས་འདུར་མཉམ་ཞུགས་གནང་ནས་སྙན་གྲགས་ཅན་གྱི་དམངས་གཙོའི་དབུ་ཁྲིད་སྐུ་ཞབས་སི་དུ་ཧ་དང་། ཁོང་གི་རྗེས་ཤུལ་ནང་མི་རྣམས་ལ་བོད་མིའི་གདུང་སེམས་མཉམ་སྐྱེ་མཚོན་པར་བྱས་ཡོད་པ་རེད།
ནིའུ་ཡོཀ་གྲོང་ཁྱེར་ནང་ཡོད་པའི་རྒྱ་རིགས་ཀྱི་སྐྱིད་སྡུག་འདྲ་མིན་གྱི་ཚོགས་གཙོ་དང་། མང་གཙོ་དོན་གཉེར་བའི་ཚོགས་པའི་སྐུ་ཚབ། སི་དུ་ཧ་དང་འབྲེལ་བ་ཡོད་པའི་ཨ་རི་བ་ཁག་གཅིག་བཅས་ཁྱོན་མི་གྲངས་ ༡༠༠ ལྷག་ཙམ་མྱ་ངན་རྗེས་དྲན་གྱི་ཚོགས་འདུར་མཉམ་ཞུགས་གནང་ཡོད། ཚོགས་སྐྱིད་ཁག་གི་སྐུ་ཚབ་ཁག་གཅིག་ནས་རྗེས་དྲན་ཚོགས་འདུར་གསུང་བཤད་མདོར་བསྡུས་རེ་གནང་ཡོད་པ་ལྟར།
ཟུང་དྲུང་ཀུན་དགའ་བཀྲིས་ལགས་ཀྱིས་གསུང་བཤད་གནང་དོན། སྐུ་ཞབས་སི་དུ་ཧ་ནི་ང་ཚོ་དང་གཏན་དུ་བྲལ་ཟིན་ཡང་། ཁོང་གིས་ཧོང་ཀོང་དང་། རྒྱ་ནག་ནང་མང་གཙོ་ཚད་ལྡན་ཡོང་ཐབས་ལ་སྐུ་ཚེ་ཧྲིལ་པོར་སྐུ་ལས་བསྐྱོན་པའི་སྙིང་སྟོབས་ནི་ང་ཚོ་དང་དུས་ནམ་ཡང་མཉམ་དུ་གནས་ཡོད་ཅིང་། ང་རང་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་མཛད་པའི་འཚེ་མེད་ཞི་བའི་ཐབས་ལམ་ལ་རྩེ་གཅིག་ཏུ་ཡིད་ཆེས་བྱེད་མཁན་བོད་མི་ཞིག་ཡིན་པའི་ཆ་ནས་སྐུ་ཞབས་སི་དུ་ཧ་ཡིས་སྐུ་ངལ་གང་འདྲ་ཞིག་འཕྲད་རུང་འཚེ་མེད་ཞི་བའི་ལམ་ཕྱོགས་རྒྱུན་འཁྱོངས་གནང་བ་དེར་དམིགས་བསལ་གྱི་གུས་བཀུར་ཞུ་རྒྱུ་ཡིན། གོ་སྐབས་འདི་བརྒྱུད་སྐུ་ཞབས་སི་དུ་ཧ་ལ་གུས་བཀུར་དང་། ཁོང་གི་རྗེས་ཤུལ་ནང་མི་རྣམས་ལ་ཐུགས་གསོ་མཚོན་ཆེད་བོད་མི་རིགས་ཀྱི་ལེགས་བྱང་ལྟར་དཀར་གཙང་གི་མཇལ་དར་འདི་གོ་སྒྲིག་ཚོགས་ཆུང་བརྒྱུད་འབུལ་རྒྱུ་ཡིན་ཞེས་གསུང་བཤད་གནང།
པེ་ཅིང་དཔྱིད་ཀ་ཞེས་པའི་དུས་དེབ་ཀྱི་རྩོམ་སྒྲིག་པ་རྒྱ་རིགས་ཤེས་ཡོན་ཅན་སྐུ་ཞབས་ཧུ་ཕིང་སོགས་ནས་ཀྱང་སྐུ་ཞབས་སི་དུ་ཧ་ཡི་ལག་རྗེས་དྲན་གསོ་བྱེད་པའི་གསུང་བཤད་གནང་ཡོད་པ་དང་། སྐུ་ཞབས་སི་དུ་ཧ་ལ་མྱ་ངན་རྗེས་དྲན་བྱེད་པའི་ཚོགས་འདུ་དེ་བཞིན། གྲོང་ཁྱེར་ནིའུ་ཡོཀ་ཙམ་མ་ཟད། ཆི་ཀ་ཀོ་དང་། ཝ་ཤིང་ཊོན། ཊོ་རོན་ཊོ། ཝན་ཁུ་ཝར། ལོ་སི་ཨན་ཇི་ལི་སི་སོགས་བྱང་ཨ་རིའི་གྲོང་ཁྱེར་ཁག་དགུའི་ནང་དུས་གཅིག་ལ་ཚོགས་ཀྱི་ཡོད་པ་དེར། གྲོང་ཁྱེར་ཁག་དགུའི་ནང་ཡོད་པའི་བོད་རིགས་སྤྱི་མཐུན་ཚོགས་པའི་སྐུ་ཚབ་ཀྱང་མྱ་ངན་རྗེས་དྲན་བྱེད་པའི་ཚོགས་འདུར་མཉམ་ཞུགས་གནང་ཡོད་པ་རེད། སྐུ་ཞབས་སི་དུ་ཧ་ནི་ཡུན་རིང་ཧོང་ཀོང་ནང་ཡོད་པའི་མང་གཙོ་དང་། རང་དབང་། འགྲོ་བ་མིའི་ཐོབ་ཐང་རྩོད་ལེན་གྱི་ལས་འགུལ་སྣེ་འཁྲིད་མཁན་སྙན་གྲགས་ཅན་ཞིག་ཡིན་པ་དང་། རྒྱ་རིགས་ཚང་མས་ཁོང་ནི་མང་གཙོ་དོན་གཉེར་བ་དང་། མང་གཙོ་དོན་གཉེར་བ་ཡོངས་ཀྱི་དབུ་ཁྲིད་གཅིག་ལ་གཅིག་གྱུར་གྱིས་ངོས་འཛིན་དང་ཆེ་བསྟོད་ཞུ་གི་ཡོད། སྐུ་ཞབས་སི་དུ་ཧ་སྙུན་ནས་བཟུང་ཁོང་གི་ནང་མི་དང་། དགའ་ཉེ་བློ་དཀར་ཚོས་སྨན་བཅོས་གང་ཡོང་བྱས་ཀྱང་ཕན་འབྲས་མ་ཐོན་པར་ཟླ་བ་འདིའི་ཚེས་ ༢ ཉིན་ཧོང་ཀོང་དུ་སྐུ་ཚེ་རྫོགས་ཤིང་། སྐབས་དེར་དགུང་གྲངས་ ༨༠ ཕེབས་ཀྱི་ཡོད་པ་བཅས།།
