༢༠༡༡ ཟླ་ ༡ ཚེས་ ༣༡ རེས་གཟའ་ཟླ་བ།
༄༅། །འདི་གར་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡ ཚེས་ ༣༠ ཉིན་རྒྱབ་ཆུ་ཚོད་ ༤ ཐོག་བཀའ་ཁྲི་མཆོག་གིས་མོན་གྷོ་བོད་སློབ་འཛིན་ཚོགས་ཀྱི་སློབ་གྲྭའི་ཚོགས་ཁང་དུ་ཕེབས་ཏེ་སློབ་གྲྭའི་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད། དེ་ཡང་ཐོག་མར་སློབ་གྲྭའི་སློབ་སྤྱིས་བཀའ་བློན་ཁྲི་པ་མཆོག་ལ་འཚམས་འདྲི་ཞུས་པ་དང་ཆབས་ཅིག་བཀའ་ཁྲི་མཆོག་གིས་ངོ་སྤྲོད་དང་། སློབ་གྲྭའི་ལས་བསྡོམས་སྙིང་བསྡུས་ཤིག་ངོ་སྤྲོད་གནང་། དེ་རྗེས་བཀའ་ཁྲི་མཆོག་གིས་ས་གནས་འགོ་འཛིན་གྱིས་གཙོས་དགེ་ལས་སློབ་ཕྲུག་ཡོངས་ལ་འཚམས་འདྲི་ཞུས་པ་དང་སྦྲགས་སློབ་ཕྲུག་ཚོར་གསུང་བཤད་གནང་དོན། ཁྱེད་རང་ཚོ་མང་ཆེ་བ་ཞིག་བོད་གངས་ཅན་ཆོས་ལྡན་གྱི་ཞིང་གི་རིགས་རྒྱུད་ལ་སྐྱེས་པའི་བུ་ཕྲུག་ཅིག་རེད། བོད་ཆོས་ལྡན་གྱི་ཞིང་འདིེ་འཇིག་རྟེན་ཁྱོན་ཡོངས་ལ་མཁས་པའི་གྲས་སུ་ལག་རྗེས་ཡོད་པའི་མི་རིགས་ཆེ་བ་ཞིག་རེད། དེ་འདྲ་བའི་མི་རིགས་ད་ལྟ་ཆག་འཇིགས་ཀྱི་གནས་ལ་གྱར་ཡོད་པར་བརྟེན་ན་གཞོན་ཁྱེད་རང་ཚོར་འགན་ཆེན་པོ་ཞིག་ཡོད། བོད་ཀྱི་ཐུན་མོང་མིན་པའི་ཆོས་དང་རིག་གཞུང་། ཡུལ་གོམས། གཤིས་ལུགས། ལྷག་པར་དུ་ཡ་རབས་བཟང་སྤྱོད་འགྲོ་བ་མི་རིགས་སྤྱི་ཡོངས་ཀྱི་དགོས་མཁོར་ཕན་ཐོགས་ཡོད་པ་དེ་རྩ་མེད་དུ་མི་འགྲོ་བར་རྒྱུན་སྐྱོང་བྱེད་རྒྱུའི་འགན་དེ་ཁྱེད་རང་ཚོར་བབས་ཡོད་པ་དེ་ངོ་ཤེས་པ་གནང་དགོས་རྒྱུ་གལ་ཆེན་པོ་རེད།
དེ་དང་ཁྱེད་རང་ཚོ་དང་ལོ་ན་གཅིག་མཚུངས་ཡིན་པ་བོད་ནང་བཞུགས་མཁན་བོད་རིགས་སྤན་ཟླ་ཚོར་ཁྱེད་ཚོ་བཞིན་སློབ་སབྱོང་བྱེད་རྒྱུའི་གོ་སྐབས་མེད། ཕ་མས་སློབ་གྲྭར་གཏོང་འདོད་ཡོན་ནའང་དཔལ་འབྱོར་གྱི་མཐུན་སྐྱེན་མ་འདང་བར་བརྟེན་སློབ་གྲྭར་གཏོང་ཐུབ་ཀྱི་མེད། སློབ་གྲྭར་གཏོང་ཐུབ་མཁན་ཚོ་རྒྱ་སྐད་རྒྱ་ཡིག་བརྒྱུད་ནས་བསླབ་པ་མ་གཏོགས་བོད་ཀྱི་སྐད་ཡིག་གི་ཐོག་སློབ་སབྱོང་བྱེད་རྒྱུའི་གོ་སྐབས་ཐོབ་ཀྱི་མེད། ཕྱི་ལོ་ ༢༠༠༧ ལོར་རྒྱ་ནག་གཞུང་གིས་བཏོན་པའི་གྲངས་ཐོ་གཞིར་བཟུང་བྱས་ན་བོད་རང་སྐྱོང་ལྗོངས་ཀྱི་ནང་སློབ་ལོ་སོན་པའི་ཕྲུ་གུའི་ནང་བརྒྱ་ཆ་ ༢༤ མ་གཏོགས་སློབ་གྲྭར་སྒྲིམ་ཐུབ་ཀྱི་མེད་པ་བཀོད་འདུག དེ་འདྲ་ཡིན་ན་ཧ་ཅང་བརྒྱ་ཆ་ཉུང་ཉུང་རེད།
བཙན་བྱོལ་སྤྱི་ཚོགས་ནང་ཆ་བཞག་གནའ་དེང་ཟུང་འབྲེལ་ཐོག་སློབ་སྦྱོང་བྱེད་རྒྱུའི་གོ་སྐབས་ཡོད། ༸རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་སློབ་སྦྱོང་བྱེད་རྒྱུའི་གོ་སྐབས་བཟང་པོ་རག་པ་དེ་ཆུད་ཟོས་སུ་མི་འགྲོ་རྒྱུ་དང་། ང་རང་ཚོར་འཁྲིས་པའི་འཇིག་རྟེན་སྤྱི་ཡོངས་ཀྱི་ལས་འགན་སྒྲུབ་ཐུབ་པ་བྱེད་རྒྱུའི་བསམ་བློ་འཁྱེར་ཏེ་སློབ་སབྱོང་ཡག་པོ་གནང་རོགས་ཞེས་འབོད་སྐུལ་ཞུ་གི་ཡིན། ད་བར་སློབ་སྦྱོང་ཡག་པོ་གནང་འདུག ད་ལྟ་སློབ་སྤྱིས་ལས་དོན་མདོར་བསྡུས་གསུང་པའི་སྐབས་རྒྱུགས་འཕྲོད་པའི་བརྒྱ་ཆ་ཐོན་པོ་ཡོད་པ་དང་།
དམིགས་བསལ་གྱི་གཟེངས་སུ་ཐོན་པ་ཡང་མང་པོ་བྱུང་འདུག སློབ་སྦྱོང་ཙམ་དུ་མ་ཟད་རྩེད་རིགས་ཀྱི་ཐོག་དམིགས་བསལ་གཟེངས་ཐོན་བྱུང་ཡོད་པ་དེ་དག་གོ་དུས་དགའ་བོ་ཞེ་དྲག་བྱུང་། ཁྱེད་རང་ཚོའི་ཐོག་བོད་མི་རིགས་དང་རྒྱལ་ཁབ་ཀྱི་མ་འོངས་པ་རགས་ལུས་ཀྱི་ཡོད་པ་དེ་མ་བརྗེད་པ་བྱེད་དགོས། ཆག་འཇིགས་ཀྱི་མཚམས་ལ་བསླེབས་པའི་མི་རིགས་དང་སྐད་ཡིག་རིག་གཞུང་སོགས་གནས་མ་གནས་ཀྱི་འགན་དེ་ཁྱེད་རང་ཚོ་ལོ་ཚད་ནང་ཡོད་པའི་མི་རབས་ཚོར་ཧ་ལམ་བརྒྱ་ཆ་བརྒྱ་ཐམ་རགས་ལུས་ཡོད།་གནས་ཚུལ་དེ་ཆུང་ཆུང་ཞིག་མ་རེད། འགན་ཆེན་པོ་དང་ཛ་དྲག་པོའི་གནས་ཚུལ་ཡིན་པ་མ་བརྗེད་པ་བྱེད་དགོས། སྐུ་གཟུགས་བདེ་པོ་དང་སློབ་སྦྱོང་ཚད་ལྡན་ཡོང་རྒྱུ། གལ་ཏེ་སློབ་སྦྱོང་ཡག་པོ་ཞིག་མ་བྱུང་ནའང་ཡ་རབས་བཟང་སྤྱོད་ཡོད་མཁན་གྱི་བོད་མི་ཚད་ལྡན་ཡོང་རྒྱུའི་འབོད་སྐུལ་དང་སྨོན་ལམ་རྒྱག་གི་ཡིན། ཞེས་སོགས་ཀྱི་གསུང་བཤད་གནང་ཡོད།།
