༢༠༡༡ ཟླ་ ༡ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༢༨ རེས་གཟའ་པ་སངས་ཉིན་དགུང་ཆུ་ཚོད་ ༡༢།༡༥ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་ཁུལ་དུ་མཛད་འཕྲིན་སྐྱོང་ཆེད་བཞུགས་སྒར་ཕོ་བྲང་ནས་ཆིབས་སྒྱུར་བསྐྱངས་གནང་མཛད་ཡོད། དེ་ཡང་མགོན་པོ་གང་ཉིད་མཆོག་ཕྱི་ཚེས་ ༢༩ རེས་གཟའ་སྤེན་པའི་ཉིན་རྒྱ་གར་ལྷོ་ཕྱོགས་ཀྱི་གྲོང་ཁྱེར་བྷེང་ལོར་ནས་རྒྱང་ཐག་ཀི་ལོ་མི་ཊར་ ༡༥༠ ཙམ་དུ་ཡོད་པའི་ཆི་ཏྲ་དྷུར་གྷར་(Chitradurga) ཆིབས་སྒྱུར་བསྐྱང་སྟེ་ཁུལ་དེར་ཀར་ཎ་ཊ་ཀ་མངའ་སྡེའི་སྤྱི་ཁྱབ་བློན་ཆེན་དང་པོ་སྐུ་ཞབས་ཨེ་སི་ནི་ཇ་ལིངྒ་པ་ (S.Nijalingapa) དམ་པ་མཆོག་གི་དྲན་རྟེན་ཚོགས་ཁང་དབུ་འབྱེད་མཛད་རྒྱུ་དང་སྐབས་དེར་ཀར་ཎ་ཊ་ཀའི་མངའ་སྡེའི་སྤྱི་ཁྱབ་བློན་ཆེན་ (Chief Minister ) སྐུ་ཞབས་ཡ་དྷི་ཡུ་རབ་པ་ (Yeddyurappa) མཆོག་དང་མངའ་གཞུང་གི་ཕྱོགས་འགལ་ཚོགས་པའི་ཚོགས་གཙོ་མཆོག་ཀྱང་ལྷན་ཞུགས་གནང་རྒྱུ་ཡིན་འདུག
ཕྱི་ཚེས་ ༣༠ སྔ་དྲོ་ཆུ་ཚོད་ ༩།༣༠ ནས་ ༡༡ བར་བྷེང་ལོར་སེན་ཇོ་སེཕ་(St Joseph) མཐོ་སློབ་ཏུ་ཆིབས་སྒྱུར་བསྐྱང་སྟེ་བཀའ་སློབ་སྩལ་གནང་མཛད་རྒྱུ་ཡིན་འདུག དེ་རྗེས་ཉིན་རྒྱབ་ཆུ་ཚོད་ ༢།༣༠ ནས་ ༤ བར་བྷེང་ལོར་ཁུལ་དུ་རྟེན་གཞི་བྱས་པའི་ཆོས་འཁོར་གསུམ་གླིང་ཆོས་ཚོགས་དང། ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་ (FPMT) གཉིས་ཟུང་འབྲེལ་ཐོག་ཇི་ལྟར་གསོལ་འདེབས་ཞུས་དོན་བཞིན་མགོན་པོ་གང་ཉིད་མཆོག་གིས་རྒྱལ་ཡོངས་མཐོ་སློབ་ཀྱི་ཐང་ཆེན་དུ།  དཀའ་རྙོག་ཅན་གྱི་དུས་སྐབས་སུ་བདེ་སྐྱིིད་འཚོལ་བ། ཞེས་པའི་བརྗོད་གཞིའི་ཐོག་མི་གྲངས་ ༧༠༠༠ ཙམ་ལ་བཀའ་སློབ་སྩལ་གནང་མཛད་རྒྱུ་དང། བཀའ་སློབ་གྲུབ་མཚམས་སྐར་མ་ ༣༠ ཙམ་རིང་མང་ཚོགས་ཀྱི་དྲི་བར་བཀའ་ལན་སྩལ་གནང་མཛད་རྒྱུ་ཡིན་འདུག
ཕྱི་ཚེས་ ༣༡ ནས་ ཚེས་ ༦ བར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་ཆིབས་སྒྱུར་བསྐྱང་སྟེ་བདུན་ཕྲག་གཅིག་རིང་མཛད་འཕྲིན་རྒྱ་ཆེ་བསྐྱང་གནང་མཛད་རྒྱུ་ཡིན་འདུག་པ་བཅས།།