༢༠༡༠ ཟླ་ ༡༡ ཚེས་ ༨ རེས་གཟའ་ཟླ་བ།
༄༅། །འདི་གར་བོད་མིའི་རང་དབང་རྩོམ་སྒྲིག་པས་ཉི་ཧོང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༥ ཉིན་གྱི་དགོང་དྲོའི་ཆུ་ཚོད་ ༨།༢༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་གསར་པའི་ཨིན་ཌར་གྷན་ཌི་རྒྱལ་སྤྱིའི་གནམ་ཐང་ནས་སྟོན་འཁོར་དང་བཅས་ཉི་ཧོང་དུ་ཆིབས་སྒྱུར་བསྐྱངས་ཡོད། ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༧།༢༠ ཙམ་ལ་ཉི་ཧོང་གྱི་རྒྱལ་ས་ཊོཀ་ཁྱོ་ན་རི་ཏ་གནམ་ཐང་དུ་༸ཞབས་སོར་འཁོད་སྐབས་ཉི་ཧོང་བོད་གཞུང་སྐུ་ཚབ་དོན་གཅོད་ལྷག་པ་མཚོ་སྒོ་ལགས་དང་འབྲེལ་ཡོད་མི་སྣ་ཁག་གིས་སྣེ་ལེན་གྱིས་ཕེབས་བསུ་གཟབ་རྒྱས་ཞུས་ཡོད། གནམ་ཐང་དུ་གསར་འགོད་པ་ཁག་གཅིག་གིས་ཉི་ཧོང་དང་རྒྱ་ནག་དབར་ཉེ་ལམ་མཚོ་གླིང་དང་འབྲེལ་བའི་རྩོད་རྙོག་དང་རྒྱ་ནག་གི་རྩོམ་པ་པོ་གྲགས་ཅན་སྐུ་ཞབས་ལིའུ་ཞའོ་པོ་སོགས་ཀྱི་གནད་དོན་སྐོར་ལ་དྲི་བ་ཁག་གཅིག་ཕུལ་བར་བཀའ་ལན་མཛད། དེ་རྗེས་རྒྱལ་ས་ཊོཀ་ཁྱོའི་ཧིལ་ཊོན་མགྲོན་ཁང་དུ་སྐུ་ངལ་གསོ་གནང་མཛད་པ་དང་སྦྲགས་ཉིན་གུང་ལྗགས་སྨིན་གྲུབ་བསྟུན། བཞུགས་གནས་མགྲོན་ཁང་ནས་ཧ་ནི་ཌ་གནམ་ཐང་བརྒྱུད་གྲོང་ཁྱེར་ཨོ་ས་ཀོར་ཆིབས་སྒྱུར་བསྐྱངས། རྒྱལ་ས་ཊོཀ་ཁྱོ་ནས་ཆུ་ཚོད་ ༡།༣༠ ཙམ་ལ་མཁའ་ལམ་བརྒྱུད་ཉི་ཧོང་གི་གྲོང་ཁྱེར་ཆེ་ཤོས་གཉིས་པ་ཨོ་ས་ཀོར་ཆིབས་སྒྱུར་གྱིས་ཉི་ཧོང་གི་ཉིན་རྒྱབ་ཆུ་ཚོད་ ༤།༢༠ ཙམ་ལ་ཧ་ཡིཊ་རི་ཇེན་སི་ཨོ་ས་ཀ་ཞེས་པའི་བཞུགས་གནས་མགྲོན་ཁང་དུ་༸ཞབས་སོར་བདེ་བར་འཁོད་དེ་སྐུ་ངལ་གསོས་གནང་མཛད།
ཕྱི་ཚེས་ ༧ གྱི་སྔ་དྲོ་ཆུ་ཚོད་ ༡༡།༥༠ ཙམ་ལ་མགོན་པོ་གང་ཉིད་མཆོག་གི་བཞུགས་གནས་མགྲོན་ཁང་གི་ཉེ་འཁྲིས་སུ་ཡོད་པའི་ཨིན་ཊེ་སི་ཨོ་ས་ཀ་ཞེས་པའི་ཚོགས་ཁང་དུ་རྒྱལ་སྤྱིའི་གཞོན་ནུ་ལྷན་ཚོགསཀྱི་ཚོགས་མགོན་དུ་ཆིབས་སྒྱུར་བསྐྱངས་ཏེ་དུས་རབས་ ༢༡ གཞོན་སྐྱེས་ཚོོར་ཞི་བའི་ལམ་སྟོན་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། ཉིན་གུང་ཆུ་ཚོད་ ༡༢།༤༠ ཐོག་ལྗགས་སྨིན་གྲུབ་རྗེས་གཞོན་སྐྱེས་ཚོའི་དྲི་བར་བཀའ་ལན་མཛད་ཡོད་པ་དང། དེ་ནས་མགོན་པོ་གང་ཉིད་མཆོག་ན་ར་མགྲོན་ཁང་དུ་ཆིབས་སྒྱུར་བསྐྱངས་ཡོད་པ་བཅས།།
