༢༠༡༠ ཟླ་ ༡༠ ཚེས་ ༤ རེས་གཟའ་ཟླ་བ།
༄༅། །འདི་གར་བོད་གཞུང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ཟླ་ ༡༠ ཚེས་ ༣ གྱི་ཉིན་མོ་བཙན་བྱོལ་བོད་མི་གནས་ཡུལ་ས་གནས་ཚང་མར་བཀའ་ཁྲི་སྐབས་ ༣ པ་དང་། སྤྱི་འཐུས་སྐབས་ ༡༥ པའི་སྔོན་འགྲོའི་འོས་བསྡུ་ཆེན་མོ་ཡིན་པ་ལྟར། ཨ་རིའི་གྲོང་ཁྱེར་ནིའུ་ཡོཀ་དང་། ནིའུ་འཇར་སི་ཁུལ་གྱི་བོད་མི་ཚོས་ཀྱང་དེ་ཉིན་སྔ་དྲོ་ཆུ་ཚོད་ ༩ ནས་དགོང་དྲོ་ཆུ་ཚོད་ ༦ དང་ཕྱེད་ཀ་བར་སྐུ་ཚབ་དོན་གཅོད་ཁང་གི་ཉེ་འགྲམ་དུ་ཡོད་པའི་ཡེ་ཤུ་ལྷ་ཁང་ཆེན་མོ་ཞིག་ནང་ཚང་ཀ་ཤིག་ཤིག་གིས་རང་གི་རྩ་ཆེའི་འོས་ཤོག་དེ་བོད་མི་རིགས་ཀྱི་རྩ་དོན་སྒྲུབ་ཐུབ་མཁན་གྱི་མི་དེར་འཕེན་ཡོད་པ་རེད། བྱང་ཨ་རིའི་ཁུལ་དུ་བོད་རིགས་གནས་སྡོད་བྱེད་ཡུལ་ས་གནས་ ༣༠ ཡོད་པ་དེ་དག་ནང་ཁ་སྔོན་དེབ་སྐྱེལ་བྱེད་མཁན་ཁྱོན་བསྡོམས་མི་གྲངས་ ༥༩༠༤ བྱུང་ཡོད་པ་དང་། ས་གནས་དེ་དག་གི་ནང་ནས་ནིའུ་ཡོཀ་དང་ནིའུ་འཇར་སི་ནི་ས་གནས་ཆེ་ཤོས་ཡིན་ཞིང་། དེབ་སྐྱེལ་བྱེད་མཁན་མི་གྲངས་ ༡༤༦༨ བྱུང་ཡོད་པ་རེད། ཕྱི་ཚེས་ ༣ ཉིན་འོས་ཤོག་འཕེན་མཁན་མི་གྲངས་ ༡༡༠༠ མིན་ཙམ་བྱུང་ཡོད་པ་དང་། ནིའུ་ཡོཀ་དང་། ནིའུ་འཇར་སི་ཕུད། དེ་འཕྲོས་ས་གནས་རྣམས་ཀྱི་འོས་སྒམ་རྟག་ཐེར་སྦྱར་མ་ཕྱི་ཚེས་ ༥ ཉིན་བྱང་ཨ་རིའི་ས་གནས་འོས་བསྡུ་ལས་ཁང་དུ་འབྱོར་གྱི་ཡོད་ཅིང་།
དེ་རྗེས་ཕྱི་ཚེས་ ༦ ཉིན་བྱང་ཨ་རིའི་ས་གནས་འོས་བསྡུ་ལས་ཁང་གི་ཚོགས་མི་ཡོངས་རྫོགས་འཛོམས་སར་ས་གནས་ཁག ༣༠ འོས་སྒམ་རྟག་ཐེར་སྦྱར་མ་ཁ་བསྔོགས་གྲངས་བཤེར་གྱིས་བསྡོམས་ཐོ་ཁ་གསལ་བཟོས་ཏེ། དབུས་འོས་བསྡུ་ལས་ཁང་དུ་འབུལ་རྒྱུ་ཡིན་པ་རེད། སྔོན་འགྲོའི་འོས་ཤོག་འཕེན་པའི་དུས་ཚོད་དང་སྟབས་བསྟུན་ཏེ་ས་གནས་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་བ་བཏབ་པ་བཞིན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རི་རྫོང་རིན་པོ་ཆེ་མཆོག་ནས་འོས་ཤོག་འཕེན་པར་ཕེབས་མཁན་བོད་མི་ ༡༠༠༠ ལྷག་ཙམ་དང་། དེ་མིན་གྱི་ཕྱི་རྒྱལ་མི་རིགས་ཁག་གཅིག་ལ་སྒྲོལ་དཀར་གྱི་ཚེ་དབང་དང་། གསུང་བཤད་གནང་ཡོད་པ་མ་ཟད། ༸གོང་ས་༸སྐྱབས་མགོན་ཆེན་པོའི་བཀའ་སློབ་སྙིང་དབུས་སུ་བཅངས་ནས་སེམས་རྒྱུད་བཟང་པོ་བྱེད་རྒྱུ་ཧ་ཅང་གི་གལ་ཆེན་པོ་ཡིན་པའི་གསུང་བཤད་གནང་ཡོད། དེ་བཞིན་མཇུག་ཏུ་མང་ཚོགས་ཀྱི་རེ་འདོད་ལྟར་མི་གྲངས་ ༡༠༠༠ ལྷག་ཙམ་ལ་མཇལ་ཁ་ཡང་གནང་ཡོད་པ་རེད།།
