༢༠༡༠ ཟླ་ ༡༠ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༤ སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ལ་སཊྣ་ཕོཌ་གཙུག་ལག་སློབ་གྲྭའི་མཐུན་ཚོགས་ནས་ (Community of Standford University) ཇི་ལྟར་གསོལ་འདེབས་ཞུས་དོན་བཞིན་སཊྣ་ཕོཌ་གཙུག་ལག་སློབ་གྲྭ་ཆགས་ཡུལ་མཛེས་སྡུག་ལྡན་པའི་གྲོང་ཚོ་པཱ་ལོ་ཨལ་ཊོའི་མེ་པི་ལེ་སི་པེ་ཝི་ལི་ཡོན་ (Maples Pavilion) ཚོགས་ཁང་ཆེན་མོའི་ནང་གཙུག་ལག་སློབ་གྲྭའི་སློབ་ཕྲུག་དང་མཁས་དབང། དགེ་ལས་བཅས་ཁྱོན་མི་གྲངས་ ༦༥༠༠ ཙམ་ལ་སྤྱི་ཚོགས་དང་མི་སྒེར་གྱི་མི་ཚེའི་ནང་བྱམས་བརྩེའི་གལ་གནད། ཅེས་པའི་བརྗོད་གཞིའི་ཐོག་བཀའ་སློབ་སྩལ། དེ་ཡང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ཐོག་མར་ཚོགས་ཁང་དུ་༸ཞབས་སོར་འཁོད་མཚམས་ཚོགས་བཅར་བ་ཚང་མ་ཡར་བཞེངས་ཏེ་མགོན་པོ་གང་ཉིད་མཆོག་ལ་དགའ་བསུའི་འཚམས་འདྲི་ཞུས་ཡོད། དེ་རྗེས་སཊྣ་ཕོཌ་གཙུག་ལག་སློབ་གྲྭའི་སློབ་སྤྱི་སྐུ་ཞབས་ཇོན་ཨེལ་ཧན་ནེ་སི་ (John L Hennessy) ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲིའི་གསུང་བཤད་གནང་ཡོད་ཅིང་གསུང་བཤད་ནང་ཁོང་གིས། ངས་འཛམ་གླིང་འདིའི་ནང་ཆེ་བསྟོད་ཞུ་ས་མི་གཅིག་ཡོད་པ་དེ་ནི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཡིན། ཞེས་སོགས་ཀྱི་གསུང་བཤད་གནང་གྲུབ་བསྟུན། ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། གཞི་རྩའི་ང་ཚོ་ཚང་མ་འགྲོ་བ་མི་ཞིག་ཡིན་པའི་ཆ་ནས་མི་ཚེ་བདེ་སྐྱིད་ལྡན་པ་ཞིག་སྐྱེལ་རྒྱུའི་ཐོབ་ཐང་ཡོད། གནའ་དུས་སྐབས་མི་ཚོས་ང་ཚོ་དང་ཁོང་ཚོ་ཞེས་ཕན་ཚུན་ལྟོས་མེད་རང་དབང་གི་བསམ་ཚུལ་ཤུགས་ཆེན་པོ་ཡོད། འོན་ཀྱང་དུས་རིམ་འགྱུར་གྱིས་ད་ལྟའི་ཆར་ཕན་ཚུན་རྟེན་མི་དགོས་པ་རང་དབང་ཡིན་བསམ་པའི་བསམ་ཚུལ་དེ་དངོས་ཡོད་གནས་ཚུལ་དང་མི་འཚམས་པ་ཤིག་ཆགས་ཡོད་པས་ཕན་ཚུན་གཅིག་ལ་གཅིག་རྟེན་དགོས་པའི་གནས་སྟངས་ཤིག་ཆགས་ཡོད། དེང་སྐབས་ཕན་ཚུན་ཡིད་ཆེས་ཐོག་འཆམ་མཐུན་ངོ་མ་ཞིག་ཡོང་རྒྱུ་དུས་ཀྱི་དགོས་མཁོ་ཞིག་ཆགས་ཡོད། ཡིད་ཆེས་དེ་དྲང་པོ་དང་ཕྱི་གསལ་ནང་གསལ་ལས་ཡོང་དགོས། འགྲོ་བ་མི་རྣམས་འཚོ་གནས་ཐུབ་རྒྱུར་བྱམས་བརྩེའི་བསམ་པ་དེ་གཞི་རྩ་ལྟ་བུ་ཆགས་ཡོད་ཅེས་བཀའ་སྩལ། ཕྱོགས་མཚུངས་མགོན་པོ་གང་ཉིད་མཆོག་གིས་གཞི་རྩའི་འགྲོ་བ་མིའི་རིན་ཐང་གོང་འཕེལ་གཏོང་རྒྱུར་ལྷ་ཡོད་སྨྲ་བ་དང་ལྷ་མེད་སྨྲ་བ། ཆོས་ཁས་མི་ལེན་མཁན་གྱི་ཐབས་ལམ་བཅས་ཐབས་ལམ་གསུམ་ཡོད་པ་དང་། ལྷ་ཡོད་སྨྲ་བ་ཚོས་མཐའ་མེད་པའི་བརྩེ་བ་ཅན་གྱི་འཇིག་རྟེན་དཀོད་པ་པོ་འདོད། ཁོང་ཚོས་མཐའ་གཅིག་ཏུ་འཇིག་རྟེན་དཀོད་པ་པོར་ཡིད་ཆེས་བྱེད་ཀྱི་ཡོད། དེར་བརྟེན་ཐབས་ལམ་དེ་བརྒྱུད་ཁོང་ཚོས་གཞི་རྩའི་འགྲོ་བ་མིའི་རིན་ཐང་གོང་འཕེལ་གཏོང་རྒྱུར་ཕན་ཕོགས་བྱེད་ཀྱི་ཡོད། ལྷ་མེད་སྨྲ་བ་ཚོས་ཆོས་ཐམས་ཅད་རྒྱུ་རྐྱེན་ལས་བྱུང་བར་བརྟེན་རང་ལ་རྣམ་སྨིན་གང་བྱུང་བ་དེ་རང་གིས་བྱས་པའི་ལས་ལ་རག་ལུས་པར་འདོད། རྒྱུ་མཚན་དེ་ལ་བརྟེན་ནས་རང་ཉིད་ལ་མི་ཚེ་བདེ་སྐྱིད་ལྡན་པ་ཞིག་ཐོབ་ཆེད་ལས་ཡག་པོ་གསོག་དགོས་པ་དེས་གཞི་རྩའི་འགྲོ་བ་མིའི་རིན་ཐང་གོང་འཕེལ་གཏོང་རྒྱུར་ཕན་ཐོགས་བྱེད་ཀྱི་ཡོད། ཐབས་ལམ་གསུམ་པ་དེ་ཆོས་ཁས་མི་ལེན་མཁན་ཚོ་ནས་ཡོང་གི་ཡོད། ཆོས་ལུགས་ཀྱི་དབུ་ཁྲིད་འགས་བཟང་སྤྱོད་ཀྱི་བསླབ་བྱ་དེ་ཆོས་ལུགས་ལ་གཞི་བཅོལ་དགོས་པའི་བསམ་ཚུལ་ཡོད། ལྟ་ཚུལ་དེ་སེམས་གུ་དོག་པོའི་ལྟ་ཚུལ་ཞིག་ཡིན། ཆོས་ཁས་མི་ལེན་མཁན་ཚོ་ལའང་ཆོས་ཁས་ལེན་མཁན་བཞིན་བདེ་སྐྱིད་འདོད་ཀྱི་ཡོད། དེར་བརྟེན་ཆོས་ལུགས་རིས་མེད་ཀྱི་བསམ་བློའི་ཐོག་ནས་ནང་གི་ཞི་བདེ་བསྐྲུན་རྒྱུ་གལ་ཆེ་ཆགས་ཡོད་ཅེས་བཀའ་སྩལ་བ་མ་ཟད། ༸གོང་ས་མཆོག་གིས་བཀའ་སྩལ་བའི་ཆོས་ལུགས་རིས་མེད་དེ་ཆོས་ལ་དགག་པ་བྱེད་པའི་གོ་དོན་མིན་པར་གནའ་བོའི་རྒྱ་གར་གྱི་སྲོལ་རྒྱུན་ནས་དར་བའི་ཆོས་ལུགས་ཚང་མར་འདྲ་མཉམ་གྱིས་གུས་བརྩི་ཞུ་རྒྱུ་དེ་ཡིན་སྐོར་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་ཆོས་ལུགས་རིས་མེད་ཀྱི་བཟང་སྤྱོད་གོང་འཕེལ་གཏོང་རྒྱུའི་རྒྱུ་མཚན་གཙོ་བོ་གསུམ་ཡོད་སྐོར་བཀའ་སྩལ། རྒྱུ་མཚན་དང་པོ་དེ་ང་ཚོ་ཚང་མར་ཉམས་མྱོང་གང་བྱུང་བ་དེ་ཡིན་པ་དང། ཕྲུ་གུ་སྐྱེས་སྐབས་རང་གི་མས་བྱམས་སྐྱོང་མཐའ་གཅིག་ཏུ་བྱེད་ཀྱི་ཡོད། སྐབས་དེར་ཕྲུ་གུ་དེས་རང་གི་མ་དང་འབྲེལ་བ་ཇི་ཡོད་ཤེས་ཚོར་ཐུབ་ཀྱི་མེད་ནའང་མ་ལ་བརྟེན་ནས་འཚོ་གནས་བྱེད་ཀྱི་ཡོད། ཉམས་མྱོང་དེ་དུད་འགྲོ་ལའང་ཡོད་ཅེས་བཀའ་སྩལ། དེ་བཞིན་༸གོང་ས་མཆོག་གིས་བྱམས་བརྩེའི་རིན་ཐང་ལ་བསྔགས་བརྗོད་མཛད་རྒྱུའི་དགོངས་བཞེད་དེ་ཡུམ་གྱིས་བྱམས་བརྩེ་ཆེན་པོས་གཟིགས་སྐྱོང་གནང་བར་བརྟེན་ནས་བྱུང་བ་ཞིག་ཡིན་སྐོར་བཀའ་སྩལ་བ་མ་ཟད། མགོན་པོ་གང་ཉིད་མཆོག་གི་ཐུགས་དགོངས་ལ་བྱམས་བརྩེའི་ས་བོན་ཐོག་མ་དེ་ཡུམ་གྱིས་བཏབ་པ་ཞིག་དང་དེ་ནས་རིམ་པས་ནང་ཆོས་སློབ་གཉེར་མཛད་པར་བརྟེན་བྱམས་བརྩེའི་བསམ་བློ་དེ་རྒྱ་སྐྱེད་ཐུབ་པ་བྱུང་ཞེས་བཀའ་སྩལ། ཆོས་ལུགས་རིས་མེད་ཀྱི་བཟང་སྤྱོད་གོང་འཕེལ་གཏོང་རྒྱུའི་རྒྱུ་མཚན་གཉིས་པའི་ཐོག་༸གོང་ས་མཆོག་གིས་བཀའ་སློབ་སྩལ་དོན། དཔལ་འབྱོར་གྱིས་གནས་སྐབས་བཅོས་མའི་བདེ་སྐྱིད་ཙམ་བསྐྲུན་ཐུབ། ནང་བསམ་བློའི་ཞི་བདེ་ངོ་མ་དེ་བྱམས་བརྩེའི་བསམ་པ་ལས་ཡོང་དགོས་ཞེས་བཀའ་སྩལ།
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་རིས་མེད་ཀྱི་བཟང་སྤྱོད་གོང་འཕེལ་གཏོང་རྒྱུའི་རྒྱུ་མཚན་གསུམ་པ་དེ་ཚན་རིག་གི་ལམ་ནས་ར་སྤྲོད་བྱུང་བའི་དཔང་རྟགས་ཡོད་པ་དེ་ཡིན་སྐོར་བཀའ་སྩལ་དོན། རྟག་ཏུ་ཞེ་སྡང་དང་འཇིགས་སྣང་གི་བསམ་བློ་ཡོད་པ་དེས་ང་ཚོའི་ལུས་ཀྱི་ནད་གཞི་འགོག་བྱེད་ཀྱི་གཟུངས་ཉམས་ཟད་གཏོང་གི་ཡོད་པ་དང། བྱམས་བརྩེའི་བསམ་བློ་དང་ཞི་བདེ་ཡོད་པའི་མི་དེའི་ལུས་ཀྱི་ནུས་ཤུགས་འཕེལ་གྱི་ཡོད་པ་ར་ཕྲོད་བྱུང་ཡོད་ཅེས་བཀའ་སྩལ།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་བཅར་བའི་ཆེད་དོན་དྲི་བར་བཀའ་ལན་མཛད། ཉིན་རྒྱབ་མགོན་པོ་གང་ཉིད་མཆོག་གིས་མང་ཚོགས་ ༡༣༠༠ འདུ་འཛོམས་བྱུང་བའི་མི་མོ་རེལ་ཡེ་ཤུའི་ལྷ་ཁང་དུ་ཆིབས་སྒྱུར་བསྐྱངས་ཏེ་མི་ཚེ་དོན་དང་ལྡན་པའི་བརྗོད་གཞིའི་ཐོག་བཀའ་སློབ་སྩོལ་སྐབས་མི་ཚེ་དོན་ལྡན་ཡོང་བར་བྱམས་བརྩེའི་བསམ་བློ་དགོས་གལ་ཆེ་བ་དང། དཔལ་འབྱོར་དང་སྟོབས་ཤུགས་དེ་དག་མི་ཚེ་དོན་ལྡན་ཡོང་བའི་ཆ་རྐྱེན་རིམ་པ་གཉིས་པ་ལྟ་བུ་ཡིན། དེར་བརྟེན་མི་ཚེའི་ནང་འདོད་ཆུང་ཆོག་ཤེས་དགོས་པ་གལ་ཆེན་པོ་ཡིན་ཞེས་སོགས་བཀའ་སློབ་སྩལ་གྲུབ་བསྟུན། མང་ཚོགས་ཀྱིས་དྲི་བར་བཀའ་ལན་སྩལ། དེ་རྗེས་མགོན་པོ་གང་ཉིད་མཆོག་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས་ཏེ་རྒྱ་རིགས་གཙུག་ལག་སློབ་དཔོན་དང་མཁས་དབང་སློབ་ཕྲུག་བཅས་ཁྱོན་མི་གྲངས་ ༡༣༠ ཙམ་ལ་མཇལ་ཁ་དང་བགྲོ་གླེང་མཛད་ཡོད།།
