༢༠༡༠ ཟླ་ ༡༠ ཚེས་ ༡༡ རེས་གཟའ་ཟླ་བ།
༅༅། །ཕྱི་ཟླ་ ༡༠ ཚེས་ ༡༠ ཉིན་སྤོན་ཊ་སམ་བྷོ་ཊའི་སློབ་གྲྭར་གོ་ལ་སྲུང་སྐྱོབ་ཉིན་མོ་ Global Work Day ཞེས་པ་སྲུང་བརྩི་ཞུས་ཡོད། ཉིན་དེར་སློབ་གྲྭའི་དགེ་ལས་ཡོངས་ནས་མོ་ཊའི་ཚབ་ཏུ་གོམ་པ་བརྒྱབ་ཡོད། གོང་ཚེས་ཉིན་སྐུ་མགྲོན་གཙོ་བོ་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་དང། སློབ་གྲྭའི་སློབ་སྤྱི། དགེ་ལས། འཛིན་རིམ་དྲུག་པ་ཡན་གྱི་སློབ་ཕྲུག་ཡོངས་ཚང་འཛོམས་ཐོག་ཚོགས་ཁང་ནང་ཚོུད་ ༩།༠༠ ཐོག་མཛད་སྒོ་དབུ་འཛུགས་གནང་ཡོད། སྐབས་དེར་སློབ་གྲྭའི་སློབ་སྤྱི་མཆོག་ནས་གསུང་བཤད་གནང། དེ་བཞིན་བསྟན་འཛིན་ནོར་བུ་ལགས་ནས་གོ་ལའི་ཚ་དྲོད་དང་། གོ་ལའི་ཚ་དྲོད་ཀྱི་རྐྱེན་པའི་འཛམ་གླིང་གི་སྣེ་གསུམ་པ་བོད་ཀྱི་ཁོར་ཡུག་ལ་གནོད་ཚབས་ཡོང་བཞིན་པའི་སྐོར་གསུང་བཤད་གནང་ཡོད། དེ་རྗེས་ Michael Buckley མེ་ཀལ་བཀ་ལེས་ Meltdown in Tibet ཞེས་པའི་གློག་བརྙན་ཞིག་བསྟན་ཡོད། ཆུ་ཚོད་ ༡༡།༤༥ ཐོག་སྐུ་ཞབས་བསྟན་འཛིན་ནོར་བུ་ལགས་ཀྱིས་ཁོར་ཡུག་སྐོར་གྱི་དྲི་བ་རྣམས་ལ་ལན་འདེབས་ཀྱང་གནང་ཡོད། ཉིན་རྒྱབ་སློབ་ཕྲུག་ཚོར་ཁོར་ཡུག་དང་འབྲེལ་བའི་རི་མོ་རྩེད་ཕུད་འབྲི་མཁན་རྣམས་ལ་བྱ་དགའ་གནང་བ་དང། དགེ་ལས་སློབ་ཕྲུག་ཡོངས་ནས་སློབ་གྲྭའི་ཉེ་འཁོར་གཙང་མ་བཟོ་བཞིན་ཁོར་ཡུག་སྲུང་སྐྱོབ་དང་བདག་གཅེས་ཉིན་མོ་སྲུང་བརྩི་གཟབ་རྒྱས་ཞུས་འདུག

ཕྱོགས་མཚུངས་བཞུགས་སྒར་རྡ་སར་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པ་དང་། ས་གནས་འགོ་འཛིན་ལས་ཁང་གཉིས་མཉམ་རུབ་ཐོག་རྡ་སྟེང་གི་ཁོར་ཡུག་གཙང་མ་བཟོ་རྒྱུ་ལས་གཞིའི་འོག་རྒྱལ་སྤྱིའི་གནམ་གཤིས་ཉིན་མོ་སྲུང་བརྩི་གཟབ་རྒྱས་ཞུས་ཡོད། སྐབས་དེར་མི་མང་བརྒྱ་ཕྲག་མང་པོས་ཐེག་ཆེན་ཆོས་གླིང་གཙུག་ལག་ཁང་ནས་བྷག་སུ་བར་གྱི་ལམ་ཁ་གཙང་མ་བཟོ་བར་མཉམ་ཞུགས་བྱས་ཡོད། འགྱིག་ཤོག་བེད་སྤྱོད་བྱས་རྐྱེན་ཁོར་ཡུག་ལ་གནོད་སྐྱོན་ཇི་ཡོད་སྐོར་Addicted to Plastic ཞེས་པའི་གློག་བརྙན་ཞིག་བསྟན་རྗེས་དེའི་སྐོར་གྲོས་བསྡུར་ཡང་བྱས་ཡོད། བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་ཁོར་ཡུག་ཉམས་ཞིབ་པ་བར་ཚོ་དོན་གྲུབ་སྒྲོལ་མ་ལགས་དང། ཆོས་སྐྱིད་ལགས། འཇིགས་མེད་ནོར་བུ་ལགས་ནས་ཀྱང་མཉམ་ཞུགས་གནང་ཡོད་འདུག་པ་བཅས།།