༢༠༡༠ ཟླ་ ༡༠ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས ༩ སྔ་དྲོ་ཆུ་ཚོད་ ༧།༠༠ ༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་རྒྱ་གར་ལྷོ་ནུབ་པུ་ནེ་གྲོང་ཁྱེར་དུ་མཛད་འཆར་གྱི་ཆེད་ཆིབས་སྒྱུར་སྐྱོང་སྐབས་བོད་མི་གཙོ་བོ་གྱུར་བའི་དད་ལྡན་པ་རྣམས་ནས་ལག་ཏུ་སྤོས་སྣེ་དང་དཀར་གཙང་མཇལ་དརར་ཐོགས་ཏེ་ཕེབས་སྐྱེལ་ཞུས་ཡོད། མགོན་པོ་གང་ཉིད་མཆོག་གིས་ཕྱི་ཚེས་ ༡༠ ཉིན་པུ་ནེ་གྲོང་ཁྱེར་ནང་གི་སོ་ནམ་ཞིང་ལས་ཀྱི་མཐོ་སློབ་གཅིག་གི་ཐང་ཆེན་དུ།  འཛམ་གླིང་ཞི་བདེ་དང་སེམས་ཀྱི་བདེ་བ།  ཞེས་པའི་དུས་སྟོན་གྱི་མཛད་སྒོ་དེ་བཞིན་དབུ་འབྱེད་མཛད་ཡོད། ཁུལ་དེར་རྟེན་གཞི་བྱས་པའི་ (Tej Gyan, Foundation) ཞེས་པའི་ཐེབས་རྩས་གོ་སྒྲིག་ཞུས་པའི་དུས་སྟོན་དེར་རྒྱ་གར་གྱི་སྙན་གྲགས་ཅན་གྱི་མི་སྣ་སོགས་ཁྱོན་མི་གྲངས་སྟོང་ཕྲག་བརྒལ་བར་ཕེབས་ཡོད། དེ་ཡང་དབུ་འབྱེད་མཛད་སྒོའི་སྐབས་མགོན་པོ་གང་ཉིད་མཆོག་གིས་མང་ཚོགས་རྣམས་ལ་དུས་ཆེན་དང་འབྲེལ་བའི་བཀའ་སློབ་སྩལ་དོན། འཛམ་གླིང་ནང་གི་རྩོད་རྙོག་མང་པོ་ཡོད་པ་དེ་དག་གྲོས་མོལ་གྱི་ལམ་ནས་སེལ་དགོས། ང་ཚོས་དུས་རབས་ ༢༡ དེ་འཚེ་བ་མེད་པའི་དུས་རབས་ཤིག་བཟོ་དགོས། ཁྱིམ་མཚེས་རྒྱལ་ཁབ་ཚོ་དང་བསྡུར་ན་རྒྱ་གར་ཞི་བདེ་ཡིན། རྒྱ་གར་ནང་ལོ་ངོ་སྟོང་ཕྲག་རིང་ནས་འཚེ་མེད་ཞི་བའི་ལྟ་གྲུབ་ལག་བསྟར་བྱེད་བཞིན་ཡོད། དེ་བཞིན་མང་གཙོའི་རིང་ལུགས་ཀྱི་ལྟ་གྲུབ་ལ་མཚོན་ན་རྒྱ་གར་ནང་སྲིད་དོན་པ་འགའ་རེས་ཆབ་སྲིད་ལ་བརྟེན་པའི་དཀའ་ངལ་ཆུང་ཚག་རིགས་འཕྲད་བཞིན་ཡོད་ནའང་ཆོས་ལུགས་འདྲ་མིན་གྱི་རྗེས་འབྲངས་པ་ཚོས་ཞི་བའི་ངང་མཉམ་གནས་བྱེད་བཞིན་ཡོད། རྒྱ་གར་རང་གི་ནང་བྱུང་བའི་ཧིན་ཌུ་དང་ནང་ཆོས། སིཀ་གི་ཆོས་བཅས་ཀྱི་རྗེས་འཇུག་པ་ཙམ་མ་ཟད། ཆོས་ལུགས་གཞན་གྱི་རྗེས་འཇུག་པ་ཚོ་ཡང་རྒྱ་གར་ནང་གཞིས་ཆགས་ཏེ་ཞི་བདེ་ལྷིང་འཇགས་ཐོག་འཚོ་བ་སྐྱེལ་ཐུབ་ཀྱི་ཡོད། དཔེར་ན། རྒྱལ་ས་མུམ་སྦེ་ལྟ་བུར་མཚོན་ན་པར་སིའི་ཆོས་ལུགས་རྗེས་འབྲངས་པ་ཉུང་ཤས་ཤིག་ལས་མེད་ནའང་ཁོང་ཚོས་སྤྱི་ཚོགས་ནང་ཕན་རླབས་ཆེ་བའི་ལག་རྗེས་བཞག་ཡོད། དེར་བརྟེན་རྒྱ་གར་བ་ཚོས་གྲོས་མོལ་དང་འཆམ་མཐུན་གྱི་སྤྱི་ཚོགས་ཤིག་བསྐྲུན་རྒྱུར་འགན་ཁུར་རྐང་ལེན་བྱེད་དགོས། འཛམ་གླིང་ཞི་བདེ་ཟེར་བ་དེ་གནམ་ནས་བབ་རྒྱུ་ཞིག་མིན་པར་མི་མང་ཚོས་ཞི་བདེ་ཡོང་ཐབས་ཀྱི་འབད་བརྩོན་བྱེད་དགོས། རྒྱལ་ཁབ་ཚང་མ་ཕན་ཚུན་གཅིག་ལ་གཅིག་བརྟེན་ཡོད། ཁྱིམ་མཚེས་རྒྱལ་ཁབ་ལ་གཏོར་བཅོམ་བྱུང་བ་དེས་སོ་སོར་དཀའ་ངལ་འཕྲད་ངེས་ཤིག་ཆགས་ཡོད། ངོས་རང་རྒྱ་གར་གྱི་བང་ཆེན་ལྟ་བུ་ཞིག་ཡིན་ཞེས་བརྗོད་རྒྱུར་སྤོབས་པ་ཡོད་ཅེས་བཀའ་སྩལ།