༢༠༡༠ ཟླ་ ༩ ཚེས་ ༤ རེས་གཟའ་སྤེན་པ།
༄༅། ཕྱི་ལོ་ ༢༠༡༠ ཟླ་ ༩ ཚེས་ ༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་རྣམ་གྲོལ་གླིང་སྔ་འགྱུར་རྙིང་མའི་མཐོ་སློབ་མདོ་སྔགས་རིག་པའི་འབྱུང་གནས་གླིང་གི་བསླབ་པ་མཐར་སོན་རྣམས་ལ་ཕྱག་ཁྱེར་སྩོལ་བའི་མཛད་སྒོ་ཐེངས་དྲུག་པའི་ཐོག་ཇི་ལྟར་གསོལ་འདེབས་ཞུས་པ་བཞིན་ཆིབས་སྒྱུར་བཀའ་དྲིན་བསྐྱངས་ཡོད། དེ་ཉིན་སྡ་དྲོ་ཆུ་ཚོད་ ༡༡ ཐོག་གཙུག་ཁང་དུ་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས། སྨིན་གླིང་འཁོར་ཆེན་རིན་པོ་ཆེ། ས་སྐྱའི་སྤྲུལ་སྐུ་བསྟན་པའི་རྒྱལ་མཚན་རིན་པོ་ཆེ། འབྲི་འབྲུག་བཀའ་བརྒྱུད་ཀྱི་མཁན་པོ་རྣམ་པ། སེར་འབྲས་དགའ་གསུམ་གྱི་མཁན་པོ་ལས་ཟུར་རྣམ་པ། བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ཕྱི་རྒྱལ་གྲོས་ཚོགས་ཁག་གི་སྐུ་མགྲོན་རྣམ་པ། ཀར་ཎཱ་ཊ་ཀ་མངའ་སྡེའི་ཤེས་རིག་བློན་ཆེན་དབུས་པའི་ས་གནས་སྐུ་མགྲོན་རྣམ་པ། འབྲས་ལྗོངས་དང་མོན་ཡུལ་གྱི་སྐུ་ཚབ་རྣམ་པ། ཚོགས་བཅར་པ་རྣམ་པ། དགེ་འདུན་འདུས་པ་རྒྱ་མཚོ་དང་བཙུན་མ་རྣམ་པ། རྒྱ་ཆེའི་མང་ཚོགས་བཅས་མི་གྲངས་ ༦༠༠༠ བརྒལ་བའི་དབུས་སྔ་འགྱུར་རྙིང་མའི་མཁན་ཆེན་ཚེ་དབང་རྒྱ་མཚོ་མཆོག་སོགས་ཀྱིས་སྤོས་སྣེ་དང་དུང་རྒྱ་སེར་སྦྲེང་བསྟར་སྒྲིག་གིས་གདན་ཞུས་ཀྱིས་གཙུག་ལག་ཁང་ནང་༸ཞབས་སོར་འཁོད་མཚམས་རྟེན་གཙོ་ཐུབ་པའི་སྐུ་བརྙན་མདུན་མར་མེ་ཞལ་ཕྱེ་མཛད། དེ་ནས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་རྙིང་མའི་མཁན་རིན་པོ་ཆེས་མཎྜལ་རྟེན་གསུམ་འདེགས་འབུལ་ཞུས།
དེ་རྗེས་མཁན་ཆེན་ཚེ་དབང་རྒྱ་མཚོ་མཆོག་གིས་མཛད་སྒོ་ངོ་སྤྲོད་སྙན་སྒྲོན་ཞུས་མཚམས་བཤད་གྲྭའི་དྲུང་ཆེ་བསོད་ནམས་ཉི་མས་བསླབ་པ་ཐར་སོན་པ་རྣམས་ཀྱི་མཚན་གཞུང་སྒྲོགས་སྦྱང་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱག་ཁྱེར་གསོལ་སྩལ་བཀྲིན་ཆེ་བ་གྲུབ་མཚམས་༸གོང་ས་མཆོག་གི་སྐུ་མདུན་དུ་རྒྱུད་སྡེ་གོང་འོག་ཐོན་པའི་སློབ་ཐོན་ཡོངས་ནས་བསྟན་འགྲོ་སྤྱིར་ཞབས་ཞུ་རྣམ་དག་ཞུ་རྒྱུའི་དམ་བཅའ་ཕུལ། དེ་ནས་ཀར་ཎཱ་ཊ་ཀ་མངའ་གཞུང་གི་ཤེས་རིག་དྲུང་ཆེ་སྐུ་ཞབས་ཨེམ་མ་ལྷན་གྷོ་པལ་ལགས་ཀྱིས་༸གོང་ས་མཆོག་གི་དགུང་གྲངས་དང་མཉམ་པའི་སྐུ་པར་སྣ་ཚོགས་བསྒྲིགས་པ་ཞིག་འབུལ་ལམ་ཞུས་རྗེས་གསུང་བཤད་གནང་། དེ་རྗེས་བཀའ་ཁྲི་མཆོག་གིས་གསུང་བཤད་གནང་དོན། སྐྱབས་རྗེས་གྲུབ་དབང་དམ་པ་དེའི་ཐུགས་རྗེའི་འཕྲིིན་ལས་ཀྱི་བཤད་སྒྲུབ་བསྟན་པ་འཛིན་མཁན་གྲངས་ལས་འདས་པ་བྱུང་བར་རྗེས་སུ་ཡི་རངས་དང་། རྣམ་པ་ཚོས་མུ་མཐུད་གནང་རོགས། དེ་བཞིན་འདི་གར་བོད་རྒྱལ་ཡོངས་ཚོགས་ཆེན་ཚོགས་པར་རྣམ་གྲོལ་གླིང་དགོན་དང་སེ་ར་ཐེག་ཆེན་གླིང་གིས་གཙོས་འབྲེལ་ཡོང་མང་པོས་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ། ཞེས་སོགས་ཞུས་གྲུབ་མཚམས་༸གོང་ས་མཆོག་གིས་སྐྱབས་རྗེ་གྲུབ་དབང་དཔལ་ནོར་རིན་པོ་ཆེ་དམ་པ་དེ་ཉིད་ཀྱི་ཡང་སྲིད་མྱུར་བྱོན་སྐྱབས་འཇུག་གསོལ་འདེབས་དང་འབྲེལ་སློབ་འབངས་ཡོངས་ལ་འདི་ཕྱི་གཉིས་ཕན་གྱི་བཀའ་སློབ་ཟབ་མོ་བཀའ་དྲིན་སྩལ་རྗེས་རྣམ་གྲོལ་གླིང་གི་དབུ་འཛིན་གྱང་ཁང་རིན་པོ་ཆེ་མཆོག་ནས་༸གོང་ས་མཆོག་གི་དབུས་མཛད་སྒོར་ཕེབས་པའི་སྐུ་མགྲོན་རྣམས་ལ་ཐུགས་རྗེ་ཆེ་ཞུས་རྗེས་མཛད་སྒོ་དངོས་གཞི་གྲོལ་བ་དང་༸གོང་ས་མཆོག་གི་ཉིན་དགུང་ལྗགས་སྨིན་རྣམ་གྲོལ་གླིང་དུ་མཛད་རྗེས་ཁུལ་དེའི་མཛད་འཆར་ཁག་ཡོངས་སུ་ལེགས་པར་གྲུབ་ཏེ་སྦེང་ལོར་ཕྱོགས་སུ་ཆིབས་༸ཞལ་བསྒྱུར་བ་བཅས།།
