༢༠༡༠ ཟླ་ ༩ ཚེས་ ༢༡ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཧ་གྷ་རི་ནང་པའི་མཐུན་ཚོགས་དང་ཧང་གྷ་རི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་ཐུན་མོང་ནས་ཇི་ལྟར་གསོལ་འདེབས་ཞུས་དོན་ལྟར་ཕྱི་ལོ་ ༢༠༡༠ ཟླ་ ༩ ཚེས་ ༡༧ ཉིན་མགོན་པོ་གང་ཉིད་མཆོག་ཧང་གྷ་རིར་ཆིབས་སྒྱུར་བསྐྱངས་ཏེ་ཕྱི་ཚེས་ ༡༨ ཉིན་ཧང་གྷ་རིའི་རྒྱལ་ས་བྷུ་ཌ་པེ་སི་ Sport Aernaནང་འཛམ་གླིང་ཤར་ནུབ་ནས་ཕེབས་པའི་མི་མང་ཁྲི་གཅིག་བརྒལ་བའི་དབུས་སུ་གྲ་སྒྲིག་ཚོགས་ཆུང་གིས་༸གོང་ས་མཆོག་ཧང་གྷ་རིའི་ནང་ཆིབས་སྒྱུར་བསྐྱངས་པར་དགའ་བསུའི་གསུང་བཤད་གནང་ཡོད་པའི་ནང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་ཡུལ་ནང་ད་རེས་ཆིབས་སྒྱུར་སྐྱོང་ཐེངས་བདུན་པ་ཆགས་ཡོད། ༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ང་ཚོའི་ཡུལ་ནང་༸ཞབས་སོར་འཁོད་པ་ཙམ་གྱིས་ང་ཚོར་ཕན་ཐོགས་ཧ་ཅང་ཆེན་པོ་འདུག་པས་བཀའ་དྲིན་ཤིན་ཏུ་ཆེ་ཞུ་རྒྱུ་ཡིན། ཞེས་སོགས་ཀྱི་གུས་བརྩིའི་གསུང་བཤད་གནང་ཡོད། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དེར་འདུས་མི་མང་ཁྲི་གཅིག་བརྒལ་བ་རྣམས་ལ་ལམ་སྟོན་བཀའ་སློབ་སྩལ་དོན། ཕྱི་ལོ་ ༡༩༥༦ ཕྱི་ཟླ་ ༡༠ པའི་ནང་ཡུལ་འདིའི་ནང་དྲག་དམག་གིས་འཐབ་རྩོད་ཀྱི་མེ་ལྕེ་འབར་སྐབས་ངོས་རང་བོད་དུ་ཡོད་ཀྱང་རང་དབང་འཐབ་རྩོད་པ་རྣམས་དང་ཧ་ཅང་བློ་ཐག་ཉེ་པོར་གནས་ཡོད། དེ་ནས་རུ་སུའི་གུང་ཁྲན་རིང་ལུགས་ཀྱི་ལྟ་སྤྱོད་ཨུ་ལན་བྷ་ཧཱ་དུ་ནས་ཧང་གྷ་རིའི་ནང་ཁྱབ་སྟེ་མི་མང་ལ་དཀའ་ངལ་ཆེན་པོ་བྱུང་ཡོད། དེ་བཞིན་ངོས་རང་ཐོག་མར་ཨི་ཊ་ལི་བརྒྱུད་ཧང་གྷ་རིའི་ནང་ཡོང་སྐབས་གནམ་ཐང་ལ་འབྱོར་བ་ནས་མགྲོན་ཁང་དུ་མ་སླེབས་བར་ལམ་གྱི་གཡས་གཡོན་དུ་མག་ཁེ་སི་ལེ་ཉིན་རིང་ལུགས་དང་སི་ཏ་ལིན་གྱི་འདྲ་པར་དེ་འདྲ་བཀལ་ཏེ་དམར་པོའི་ལྟ་སྤྱོད་འོག་དཀའ་ངལ་ཆེན་པོ་ཡོད་པའི་ཚོར་སྣང་བྱུང་། དེ་ནས་ཨི་ཊ་ལིར་འབྱོར་སྐབས་མི་ཚང་མ་བློ་བདེ་བག་ཕེབས་ངང་གནས་འདུག ད་ཆ་རིམ་པས་འགྱུར་བ་ཕྱིན་ཏེ་ཡུལ་གྲུ་ཆུང་ཆུང་འདིའི་ནང་མང་གཙོ་དར་འཕེལ་གྱིས་གང་ཅིའི་ཐད་ཡར་རྒྱས་ཀྱི་ཕྱོགས་སུ་འགྲོ་བཞིན་ཡོད་པའི་ཚོར་སྣང་བྱུང་བས་ཧ་ཅང་དགའ་པོ་བྱུང་། ངོས་ཀྱིས་ནང་ཆོས་སློབ་གཉེར་བྱས་ནས་རྟེན་ཅིང་འབྲེལ་བ་བྱུང་བ་དང་མཐའ་མེད་པའི་སྙིང་རྗེ་བཅས་ཀྱི་ལྟ་གྲུབ་ལ་གོ་རྟོགས་འཕེལ་བའི་ཀུན་ཁྱབ་ཀྱི་སེམས་ཁུར་བླངས་ཏེ་འཛམ་གླིང་ཞི་བདེ་དང་། འཚེ་བ་མེད་པ། འགྲོ་བ་མིའི་རིན་ཐང་གོང་འཕེལ། དེ་བཞིན་འཛམ་གླིང་འདིའི་ནང་ཡོད་པའི་ཆོས་ལུགས་ཕན་ཚུན་མཐུན་སྒྲིལ་གྱི་གལ་འགངས་ཆེ་བའི་ལས་དོན་དག་ལ་བརྟེན་ནས་འགྲོ་བ་མིའི་གཞི་རིམ་གྱི་བཟང་སྤྱོད་གོང་འཕེལ་གཏོང་རྒྱུའི་འབད་བརྩོན་མུ་མཐུད་བྱེད་བཞིན་ཡོད། ཅེས་སོགས་ཀྱི་བཀའ་སློབ་སྩལ་ཡོད།
