༢༠༡༠ ཟླ་ ༨ ཚེས་ ༢༠ རེས་གཟའ་པ་སངས།
༸གོང་ས་༸སྐྱབས་མགོན་ཆེན་པོ་མཆོག་སྐྱི་ལོང་སི་ཤུའི་མགྲོན་ཁང་དུ་༸ཞབས་སོར་འཁོད་སྐབས།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༨ ཉིན་སྔ་དྲོ་ཆུ་ཚོད་ ༧ ཐོག་མ་ན་ལི་སར་ཀེ་ཊི་ཧོའོ་སི་ཞེས་པའི་མགྲོན་ཁང་ནས་ཆིབས་འགྲོའི་ཐོག་གར་ཞྭའི་མངའ་ཁུལ་ཇེ་སི་པར་ཆིབས་སྒྱུར་སྐྱོང་སྐབས་ལམ་བར་དུ་ཡུལ་མི་གནས་ཡུལ་ཚང་མའི་ས་གནས་ཡུལ་མི་རྣམས་ཀྱིས་༸གོང་ས་མཆོག་ལ་ཕེབས་བསུའི་རྒྱལ་སྒོ་བསྒྲོན་པ་དང་བསངས་གསོལ་གཏོང་བ། ལག་ཏུ་དཀར་གཙང་མཇལ་དར་དང་སྤོས་སྣེ་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། ཕེབས་ལམ་དུ་ཕྱེད་ཡོལ་ཆུ་ཚོད་ ༡༢།༣༠ ཐོག་ཀྱི་ལོང་ (Sissu rest house) སི་སུ་མགྲོན་ཁང་དུ་ཆིབས་སྒྱུར་བསྐྱངས་ཏེ་མགྲོན་ཁང་དེར་ཉིན་གུང་གི་ལྗགས་སྨིན་མཛད་པ་དང་། མགྲོན་ཁང་དེར་སྔོན་ནས་ཕེབས་བསུ་དང་མཇལ་ཁར་བཅར་བའི་གཡས་གཡོན་གྱི་ཡུལ་མི་གྲངས་ ༢༠༠ ཙམ་ལ་མཇལ་ཁ་དང་བཀའ་སློབ་བྱིན་རླབས་སོགས་ཐུགས་བརྩེ་བ་ཆེན་པོས་སྩལ། དེ་ཡང་སྐབས་དེར་༸གོང་ས་མཆོག་གིས་ཡུལ་མི་རྣམས་ལ་དམིགས་བསལ་བཀའ་སློབ་ཕེབས་དོན། སྔོན་མ་ངོས་རང་ལམ་འདི་བརྒྱུད་ནས་བསླེབས་ཡོད། སྔ་མོ་སྔ་མོ་རོ་བྲང་ལ་ལམ་ཀ་བཟོས་ཚར་མེད་པ་རེད། ང་ཚོ་བོད་པ་ཚོས་ལས་ཀ་བྱེད་སྐབས་ངོས་རང་ལྟ་བར་ཡོང་མྱོང་ཡོད། ཡང་དེའི་རྗེས་སུ་གར་ཞྭར་འཕགས་པ་མཇལ་བར་བསྐྱོད་སྐབས་བསླེབས་ཡོད། དེ་རྗེས་ཇེ་སི་པར་དུས་འཁོར་དབང་ཆེན་སྐབས་ཐེངས་གཅིག་བསླེབས་ཡོད། ཁྱེད་རང་ཚོ་ཚང་མས་ང་ཐུག་པར་ཡོང་བ་རེད། ཧ་ཅང་དགའ་པོ་བྱུང་ཐུགས་རྗེ་ཆེ་ཟེར་རྒྱུ་ཡིན། ཁྱེད་རང་ཚོ་ཡུལ་པའི་ནང་དུ་ནང་པ་བྱེད་མཁན་ག་ཚོད་ཡོད་དམ། ནང་པའི་ཆོས་ཞེས་པ་འདི་གང་འདྲ་ཞིག་རེད་ཟེར་གྱི་འདུག་གམ། ཞེས་བཀའ་སློབ་ཕེབས་པར་ཁོང་ཚོས་ཚང་མ་ནང་པ་ཡིན་ཞེས་དང་། ནང་པའི་ཆོས་ཞེས་པ་སངས་རྒྱས་ལ་མཆོད་པ་འབུལ་རྒྱུ་སོགས་ཡིན་སྐོར་སྙན་སྒྲོན་ཞུས། དེ་རྗེས་མུ་མཐུད་བཀའ་སློབ་ཕེབས་དོན། སངས་རྒྱས་བཅོམ་ལྡན་འདས་དང་འཇིག་རྟེན་བཀོད་པ་པོ་འདོད་མཁན་གཉིས་ལ་ཁྱད་པར་ཡོད་དམ། དེར་ཁྱད་པར་ཡོད། སངས་རྒྱས་བཅོམ་ལྡན་འདས་ང་ཚོ་བཞིན་མི་ཕལ་པ་ཞིག་གནང་ཡོད་པ་དང་རྗེས་སུ་སངས་རྒྱས་པ་ཞིག་རེད། བཅོམ་ལྡན་འདས་སངས་རྒྱས་ཐུབ་རྒྱུ་དེ་གང་རེད་དམ་ཞེ་ན། ཁོང་གི་རྒྱུད་ལ་ཁམས་བདེ་གཤེགས་སྙིང་པོའི་རྒྱུ་ཡོད་པ་རེད། དེར་བརྟེན་སངས་རྒྱས་པ་རེད། ཁམས་བདེ་གཤེགས་སྙིང་པོ་དེ་ང་ཚོ་མི་ཚང་མར་ཡོད། སངས་རྒྱས་བཅོམ་ལྡན་འདས་ཀྱི་ཆོས་དེས་ང་ཚོ་ཡང་སངས་རྒྱས་བཅོམ་ལྡན་འདས་བཞིན་ཆགས་ཐུབ། སངས་རྒྱས་དང་། ཆོས། དགེ་འདུན་གསུམ་ལ་སྐྱབས་སུ་མཆིའོ། ཞེས་པ་འདི་གཙོ་བོ་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་ཐུབ་པ་ཞིག་དགོས་ཀྱི་ཡོད། དེ་བཞིན་༸གོང་ས་མཆོག་གིས་བཀའ་འགྱུར་པོད་བརྒྱ་དང་བསྟན་འགྱུར་པོད་ཉིས་བརྒྱ་ལྷག་ཡོད་པ་རྣམས་བྱིན་རླབས་ཙམ་དུ་མིན་པར་དེར་སློབ་སྦྱོང་བྱེད་དགོས་པའི་སྐོར་དང་རྟེན་ཅིང་འབྲེལ་བའི་རྣམ་གཞག་དང་། ལས་འབྲས། འཚེ་བ་མི་བྱེད་པ་སོགས་ཀྱི་སྐོར་བཀའ་སློབ་ཟབ་མོ་སྩལ་ཡོད། དེ་རྗེས་བཅོམ་ལྡན་འདས་ཀྱིས་མཚན་སྔགས་དང་། མ་ཎི། བཛྲ་གུ་རུ། ཨ་ར་པ་ཛ། རྗེ་བཙུན་སྒྲོལ་མའི་ཟུངས་སྔགས། བདེ་མཆོག་བཅས་ཀྱི་ཟུངས་སྔགས་ཀྱི་བཀའ་ལུང་སྩལ་རྗེས་དེར་བཅར་བའི་མི་མང་རྣམས་ལ་བྱིན་རླབས་གསོལ་སྩལ་བཀའ་དྲིན་ཆེ་བ་སྩལ་ཏེ་ཇེ་སི་པར་ཆིབས་༸ཞལ་བསྒྱུར།
ཕྱི་དྲོ་ཆུ་ཚོད་ ༢།༣༠ ཐོག་ཇ་སི་པ་འབྲུག་ཆོས་འཁོར་སྡེའི་ཕོ་བྲང་གི་མདུན་ཐང་དུ་༸ཞབས་སོར་འཁོད་སྐབས་དེར་ཕེབས་བསུར་བཅར་བའི་མི་མང་རྣམས་ཀྱིས་ལག་ཏུ་དཀར་གཙང་མཇལ་དར་དང་མེ་ཏོག་སྣ་ཚོགས་ཐོགས་པ་དང་དགོན་དེའི་དགེ་འདུན་པ་རྣམས་ཀྱིས་དུང་རྒྱ་སྤོས་སྣེས་གཙུག་ལག་ཁང་དེར་གདན་འདྲེན་ཞུས་ཏེ་གནད་ཡོད་མི་སྣ་རྣམས་དང་མཇལ་མོལ་གྲུབ་རྗེས་ས་གནས་མངའ་སྡེའི་གྲོས་ཚོགས་ཀྱི་འཐུས་མི་ཟུར་པས་ཕེབས་བསུའི་གསུང་བཤད་གནང་གྲུབ་བསྟུན་༸གོང་ས་མཆོག་གིས་བཀའ་སློབ་ཕེབས་དོན། དེ་རིང་འདིར་མངའ་སྡེའི་གྲོས་ཚོགས་ཀྱི་འཐུས་མི་ཟུར་པ་དང་དེ་བཞིན་ཞི་དྲག་གི་ལས་བྱེད་རྣམ་པ། འདིར་འཛོམས་པའི་སེར་སྐྱ་མི་མང་ཚང་མར་ཞུ་རྒྱུར་དེ་རིང་འདིར་ཡང་བསྐྱར་གཅིག་ཡོང་ཐུབ་པར་ཞེ་དྲག་དགའ་པོ་བྱུང་། འདིར་གྲ་སྒྲིག་རྒྱས་པོ་གནང་འདུག་ལ་མི་མང་ཚོ་ཡང་དད་པ་དམ་ཚིག་གཡོ་བ་མེད་པའི་ཐོག་ནས་འདིར་དགའ་བསུར་ཕེབས་པ་རེད། ལམ་ཁར་ལ་ཆ་བཞག་ན་གྲོང་པ་ཡོད་ཚད་ཀྱིས་ནང་མི་རྣམས་ནས་ཕྱིར་ཐོན་ཏེ་དགའ་བསུ་དང་སྣེ་ལེན་བྱས་བྱུང་བས་ཚང་མར་ཐུགས་རྗེ་ཆེ་ཟེར་རྒྱུ་ཡིན། ད་ལྟ་གོང་དུ་འཐུས་མི་ཟུར་པས་གཏམ་བཤད་ནང་གྲ་སྒྲིག་ཡག་པོ་བྱུང་མ་སོང་། གནམ་ཐོག་ནས་ཐད་འཕུར་གནམ་གྲུ་སྟབས་འགྲིག་མ་སོང་བའི་དགོངས་སེལ་ཡོང་བ་ཞེས་གསུང་དགོས་མེད། འདི་ག་གར་ཞྭ་ཁུལ་དུ་བཀྲ་ཤིས་དཔལ་འབྱོར་གྱིས་སྔོན་མ་ནས་ཡོང་རོགས་ཞེས་བརྗོད་པ་ལྟར་གཅིག་ཡོང་ཐུབ་ན་སྙམ་ཏེ་སེམས་ཤུགས་སྐྱེས་ཏེ་བསྡད་ཡོད་ཀྱང་ངོས་རང་ཕར་ཚུར་འགྲོ་རྒྱུ་མང་སྟབས་དུས་ཚོད་སྐོར་བ་འཁོར་མེད་པས་མཐར་དུས་ཚོད་ཅིག་བྱུང་བར་བརྟེན་འདིར་ཡོང་རྒྱུ་ཞིག་གཏན་འཁེལ་ཡོད། ཉིན་གཉིས་གསུམ་གོང་ལ་ལམ་ཡག་པོ་མི་འདུག་ཕལ་ཆེར་ཕྱི་ཤོལ་བྱས་ན་ཡག་པ་མེད་དམ་ཞེས་སྐད་ཆ་བྱུང་ཡོད། འོན་ཀྱང་ག་ལེར་བསྐྱོད་ན་སྐྱོན་མེད་ཅེས་ཐག་བཅད་དེ་ཡོང་བ་ཡིན། མ་གཞི་དེ་རིང་སྔ་དྲོ་ལམ་ཁར་གཟུགས་པོ་ཕར་གཡུགས་ཚུར་གཡུགས་བྱས་ཏེ་ཡོང་བ་རེད་དེ་ལམ་ཁར་འགག་པ་སོགས་བྱུང་མ་སོང་། གཟུགས་པོ་མ་བདེ་བ་གང་ཡང་མི་འདུག ཀྱོག་ཀྱོག་བྱས་ཏེ་འགྲོ་དགོས་ཀྱང་སྐྱུག་པ་སྐྱུག་དགོས་མ་བྱུང་ལ་ཕར་བལྟས་ཚུར་བལྟས་མོ་ཊའི་ནང་འགྲོ་སྐབས་ནམ་རྒྱུན་ཁ་འདོན་བྱེད་རྒྱུ་དེ་དག་བྱེད་ཀྱིན་བསྐྱོད་པས་ཁ་འདོན་ཡང་ཚར་དུས་ཚོད་ཡང་མགྱོགས་པོ་འགྲོ་ཡི་འདུག ཁག་གཅིག་སྐྱུག་པ་ཤོར་ཏེ་དཀའ་ངལ་འཕྲད་ཀྱི་འདུག གང་ལྟར་དེ་རིང་འདིར་བདེ་པོའི་ངང་འབྱོར་བ་རེད། ལམ་ཁར་ཡོང་སྐབས་གཡས་གཡོན་ལ་ཁང་པ་གསར་པ་མང་པོ་བརྒྱབ་འདུག ལུང་པ་ཡར་རྒྱས་སོང་འདུག་པར་རྗེས་སུ་ཡི་རང་ཡོད། མི་ཚེའི་དོན་དང་ལུས་པོའི་བདེ་སྐྱིད་ཡོང་རྒྱུར་དངོས་པོ་ཡར་རྒྱས་ངེས་པར་དགོས་ཀྱི་ཡོད། དེ་དང་ཆབས་ཅིག་བསམ་བློའི་བདེ་སྐྱིད་ཡོང་བར་ནང་སེམས་དཀྲུག་ཡོང་མཁན་དེ་དག་ལ་གཉེན་པོ་རྟེན་ཕྱོགས་གང་འདྲ་བྱེད་དགོས་ཀྱི་འདུག དེ་འདྲའི་ཐོག་ནས་སེམས་ལ་ཞི་བདེ་ཡོང་བའི་ཐབས་ཤེས་བྱེད་དགོས་རྒྱུ་དང་། ཡུལ་པ་ཚོ་དངོས་པོ་ཡར་རྒྱས་ཕྱིན་པ་དང་སྦྲགས་སོ་སོའི་ཕ་མེས་ཡང་མེས་ནས་སངས་རྒྱས་པའི་ཆོས་བྱེད་ཀྱི་ཡོད་པ་རེད། སངས་རྒྱས་པའི་ཆོས་དེའི་ཐོག་ནས་དང་སྣང་དང་དད་པ་འགྱུར་བ་མེད་པར་གནས་ཡོད་པ་ཧ་ཅང་ཡག་པོ་རེད། ད་ཆ་ག་རེ་གལ་ཆེན་པོ་རེད་དམ་བརྗོད་ན་སངས་རྒྱས་པའི་ཆོས་ཞེས་པ་འདི་མིང་ཚིག་གཅིག་པུར་ཆ་མ་བཞག་པར་ཆོས་ཞེས་པ་འདི་འཛིན་པ་དང་སྐྱོབ་པར་གོ་གི་ཡོད། ཕ་རོལ་པོ་དངོས་སུ་འཇིགས་པ་ལས་སྐྱོབ་རྒྱུའི་ཆེད་དུ་རེད། དེ་སྐྱོབ་སྟངས་གང་འདྲ་བྱས་ནས་སྐྱོབ་ཀྱི་ཡོད་པ་རེད། དེ་སྐྱོབ་ཐུབ་རྒྱུའི་རྒྱུ་མཚན་གང་ཡོད་དམ། དེ་དག་ད་གིན་སྤྱི་ཟུར་དང་སྐད་ཆ་བྱུང་། ང་ཚོ་ཡུལ་པ་ཚང་མས་ཤེས་གསལ་ལྟར་བཀའ་འགྱུར་པོད་བརྒྱ་དང་བསྟན་འགྱུར་པོད་ཉིས་བརྒྱ་ལྷག་ཙམ་ཡོད་པ་དེ་དག་དད་པ་བྱེད་སའི་ཡུལ་གཅིག་པུ་མ་རེད། དེ་དག་ལ་སློབ་གཉེར་བྱེད་རྒྱུ་ཞིག སློབ་དེབ་ལྟ་བུ་བརྩི་དགོས་པ་རེད། སངས་རྒྱས་པའི་ཆོས་ཀྱི་སྙིང་པོ་དེ་རྟེན་ཅིང་འབྲེལ་བ་བྱུང་བ་གསུང་གི་ཡོད། པོད་སུམ་བརྒྱ་ལྷག་ཙམ་དེ་དག་གི་རྟེན་ཅིང་འབྲེལ་བ་བྱུང་བ་ཞེས་པའི་གནས་ཚུལ་དེ་རྣམས་གཏན་ལ་འབེབ་ཀྱི་ཡོད། ད་རེས་བྲེལ་འཚུབ་བྱས་ཏེ་ཡོང་དགོས་པའི་རྒྱུ་མཚན་གཅིག་དེ་སང་ཉིན་ཡར་ངོའི་ཚེས་བཅུ་འཁེལ་ཡོད། གནས་འདི་འཁོར་ལོ་སྡོམ་པའི་གནས་བརྩིས་ཀྱི་འདུག བྱས་ཙང་སྔོན་མ་ནས་འདིར་འཁོར་ལོ་སྡོམ་པའི་དབང་ཞིག་བྱུང་ན་བརྗོད་བཞིན་ཡོད། དེར་བརྟེན་སང་ཉིན་ཚེས་བཅུ་འཁེལ་སྟབས་འཁོར་ལོ་སྡོམ་པ་བདེ་མཆོག་དྲིལ་བུ་ལྷ་ལྔའི་བཀའ་དབང་དེ་བྱས་ན་དྲན་བྱུང་། སང་ཞོགས་ཐོག་མ་བྱང་ཆུབ་ལམ་སྒྲོན་གྱི་ཆོས་འབྲེལ་དང། ཕྱི་དྲོ་བདེ་མཆོག་དྲིལ་བུ་ལྷ་ལྔའི་བཀའ་དབང་བྱས། ཁྱེད་ཚོ་འདིར་གཉུག་གནས་ཤུགས་ཆེན་པོ་གནང་གི་ཡོད་ཙང་གནངས་ཉིན་ཐུགས་རྗེ་ཆེན་པོའི་དབང་ཆེན་ཞིག་ཕལ་ཆེར་བྱེད་ཐུབ་ཀྱི་རེད། དེ་ནས་ཡང་དཀྲུག་གིན་དཀྲུག་གིན་ལ་ལུས་རྩལ་དང་སྦྲགས་ཕར་ལོག་འགྲོ་རྒྱུ་རེད། ཐུགས་རྗེ་ཆེ་ཞུ་གི་ཡིན། ཞེས་བཀའ་སློབ་ཕེབས་ཏེ་ཉིན་དེའི་མཛད་རིམ་གྲུབ་པ་བཅས།།
