༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ལོ་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་སུ་དགུང་གྲངས་ ༧༥ ཕེབས་པའི་དུས་ཚིགས་གལ་ཆེན་ཡིན་པ་ལྟར་མགོན་པོ་གང་ཉིད་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་རླབས་ཆེན་ཐུགས་ཀྱི་བཞེད་དགོངས་མཐའ་དག་ལྷུན་གྱི་འགྲུབ་པར་སྤྱི་མཐུན་བསོད་ནམས་རྒྱ་ཆེ་གསོག་ཕྱིར་སྐུའི་འཁྲུངས་སྐར་ནས་ལོ་འཁོར་མོར་རྣམ་དཀར་ཆོས་ཕྱོགས་ཀྱི་བྱེད་སྒོ་སྣེ་མང་སྤེལ་ཏེ་སྲུང་བརྩི་ཞུ་བཞིན་པའི་ལས་རིམ་ནང་བལ་ཡུལ་སྤོག་ར་བོད་མིའི་གཞིས་ཆགས་ཐུན་མོང་ནས་གོ་སྒྲིག་ཞུས་ཏེ་ཕྱི་ལོ་ ༢༠༡༠ ཟླ་ ༧ ཚེས་ ༡༨།༡༩།༢༠ བོད་ཟླ་ ༦ ཚེས་ ༡༠ བླ་མ་དགོངས་འདུས་ལུགས་ཀྱི་སྤྲེལ་ཟླའི་ཚེས་བཅུ་དང་བསྟུན་ཉིན་གསུམ་རིང་གློ་སྒྲིག་བྱམས་པ་གླིང་གཞིས་ཆགས་སུ་མ་ཧཱ་གུ་རུའི་འབུམ་ཚོགས་ཟབ་རྒྱས་ཕུལ་ཡོད། རྡོ་རྗེ་སློབ་དཔོན་བལ་ཡུལ་མཆོད་རྟེན་ཞེ་ཆེན་དགོན་པ་ནས་བླ་མ་ལུང་རིག་ཉི་མ་རིན་པོ་ཆེ་དང་དབུ་མཛད་ཆེན་མོ་གཙོས་པའི་ཆོག་གྲྭ་བཅུ་གཅིག སྤོག་ར་བྱང་ཆུབ་ཆོས་གླིང་དགོན་པ་དང་། ཤངས་དགའ་ལྡན་ཆོས་འཁོར་དགོན་པ། ཤྲི་དགའ་ལྡན་དར་རྒྱས་གླིང་དགོན་པ། པདྨ་ཚལ་དཔལ་ས་སྐྱའི་སློབ་གཉེར་ཁང་བཅས་ནས་དགེ་འདུན་པ་ཞལ་གྲངས་ ༦༥ དང་སྔགས་པ་ ༡༢ བཅས་ཁྱོན་བསྡོམས་ཞལ་གྲངས་ ༧༧ ནས་ཉིན་གསུམ་རིང་རིག་འཛིན་གདུང་སྒྲུབ་ཀྱི་སྒོ་ནས་འབུམ་ཚོགས་ཟབ་རྒྱས་དང་སྟོང་མཆོད་ཕུལ་ཡོད། འབུམ་ཚོགས་འདིར་སྤོག་ར་དགོན་ཁག་དང། ཚོགས་སྐྱིད་ཁག གཞིས་ཆགས་ཁག་གི་མི་མང་། གློ་ཚེ་རོག་གཞིས་ཆགས་ཀྱི་མི་མང་བཅས་ནས་གཏོང་ཕོད་ཆེན་པོས་ཞལ་འདེབས་ཕུལ་བ་ནས་འགྲོ་སོང་གྲ་རྒྱས་ཕུན་སུམ་ཚོགས་པ་བྱུང་ཡོད་པ་བཅས་འདི་གར་བལ་ཡུལ་སྤོག་ར་བོད་མིའི་གཞིས་ཁག་གི་མ་ཧཱ་གུ་རུའི་འབུམ་ཆོགས་གོ་སྒྲིག་ཚོགས་ཆུང་ནས་གཏང་གནས་སུ།།
