༢༠༡༠ ཟླ་ ༧ ཚེས་ ༡༦ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༡༨ ནས་ ༢༦ བར་དཔལ་ལྡན་བཀའ་ཁྲི་ཟམ་གདོང་རིན་པོ་ཆེ་མཆོག་སིམ་ལ་དང་། ཌོ་ལན་ཇི། སྤོན ཌོ་ཁྱབ་ཁོངས་ས་གནས་ཁག ཀུ་ལུ་མ་ནཱ་ལི། ཅོན་ཏ་ར། འབིར། བཀྲ་ཤིས་ལྗོངས་བཅས་སུ་གཞུང་འབྲེལ་འཚམས་གཟིགས་ཕེབས་གཏན་འཁེལ་འདུག དེ་ཡང་ཟླ་ ༧ ཚེས་ ༡༨ ཉིན་སྔ་དྲོ་རྡ་ས་ནས་སིམ་ལར་ཕེབས་ཐོན་གནང་རྒྱུ་དང་། ཕྱི་ཚེས་ ༡༩ ཉིན་སིམ་ལར་འཚམས་གཟིགས་ལས་འཆར་རྣམས་གནང་རྒྱུ་དང་། དེ་ནས་ཕྱི་ཚེས་ ༢༠ ཉིན་སྔ་དྲོ་ཆུ་ཚོད་ ༧།༣༠ ཐོག་ཌོ་ལན་ཇིར་ཕེབས་ཐོན་གྱིས་ས་གནས་དེར་ལས་དོན་ཁག་གནང་རྒྱུ། ཕྱི་ཚེས་ ༢༡ ཉིན་སྔ་དྲོ་ཌོ་ལན་ཇི་ནས་མན་ཌི་བརྒྱུད་མཚོ་པལྨར་ཕེབས་ཐོན་གྱིས་དེ་ཉིན་ལས་དོན་རྣམས་གྲུབ་རྗེས་ཕྱི་ཚེས་ ༢༢ ཉིན་སྔ་དྲོ་ཆུ་ཚོད་ ༩ ཐོག་མ་ནཱ་ལིར་ཕེབས་འབྱོར་གྱིས་ས་གནས་སུ་ལས་དོན་ཁག་གནང་རྒྱུ། དེ་རྗེས་ཕྱི་ཚེས་ ༢༣ ཉིན་ཀུ་ལུ་དང་སྤོན་ཌོ་བཅས་སུ་འཚམས་གཟིགས་དང་། ཕྱི་ཚེས་ ༢༤ ཉིན་མན་ཌི་ནས་ཅོན་ཏ་རར་ཕེབས་འབྱོར་གནང་བསྟུན་དེ་ཉིན་གྱི་ལས་དོན་རྣམས་གནང་རྗེས་ཕྱི་ཚེས་ ༢༥ ཉིན་འབིར་སྡེ་དགེ་དང་བོད་ཚོགས་བཅས་སུ་ཕེབས་ཐོན་གནང་རྒྱུ། ཕྱི་ཚེས་ ༢༦ ཉིན་སུ་ཇ་བོད་ཁྱིམ་སློབ་གྲྭར་གསུང་བཤད་དང་། དེ་ནས་ཆུ་ཚོད་ ༡༠།༡༥ ཐོག་བཀྲ་ཤིས་ལྗོངས་སུ་ཕེབས་ཐོན་གྱིས་ལས་འཆར་ཁག་གྲུབ་རྗེས་གོ་པུར་བོད་ཁྱིམ་སློབ་གྲྭར་གསུང་བཤད་གནང་སྟེ་ཕྱི་དྲོ་རྡ་སར་ཕེབས་འབྱོར་གནང་རྒྱུ་ཡིན་པ་བཅས།།
