༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལྡུམ་ར་བསམ་གཏན་གླིང་གི་མཛད་འཁྲིན་ཁག་ལེགས་པར་གྲུབ་སྟེ་ཡར་མ་མགོན་པོའི་དགོན་པར་ཆིབས་༸ཞལ་སྒྱུར། དེ་ཉིན་སྔ་དྲོ་ཕོ་བྲང་མདུན་དུ་ཕེབས་སྐྱེལ་ལ་བཅར་བའི་བསམ་གཏན་གླིང་དགོན་པའི་དགེ་འདུན་པ་་ཡོངས་དང་ཆིབས་སྒྱུར་དང་བླངས་ཞབས་ཞུ་བ་བཅས་ལ་༸གོང་ས་མཆོག་གིས་བཀའ་སློབ་སྩལ་དོན། ཚང་མར་ཐུགས་རྗེ་ཆེ་ཞུ་རྒྱུ་ཡིན། ཉིན་གསུམ་རིང་འདི་གར་སྡོད་རིང་གཙོ་ཆེ་ཤོས་མི་མང་ཚོ་ཐུག་འཕྲད་དང་ཆོས་འབྲེལ་བྱེད་རྒྱུ་ཡིན་པ་རེད། ཉིན་གཉིས་ཀྱི་ཆོས་འབྲེལ་སྐབས་ངོས་རང་བློ་ཚིམས་པོ་ཞིག་བྱུང་།
༸གོང་ས་མཆོག་གིས་བཞུགས་གནས་ཕོ་བྲང་གསར་པ་དབུ་འབྱེད་རབ་གནས་མཛད་བཞིན་པ།
དེ་བཞིན་རྩོད་རྒྱུགས་དང་བགྲོ་གླེང་དེ་ཚོ་དགེ་འདུན་པ་ཚོས་དབུ་ཁྲིད་དེ་མི་མང་ཚང་མས་ཆོས་ཕྱོགས་ཐོག་ཐུགས་ཁུར་དང་དོ་སྣང་ཞེ་དྲག་ཡག་པོ་བྱས་འདུག་པས་ངོས་རང་ཧ་ཅང་དགའ་པོ་བྱུང་།
སླད་ནས་ཀྱང་ཆོས་ལ་སློབ་གཉེར་དང་ཉམས་ལེན་བྱེད་རྒྱུར་མཐའ་མེད་སྟབས་མུ་མཐུད་ཡར་རྒྱས་གཏོང་རྒྱུའི་བསམ་བློ་གཏོང་དགོས་ཞེས་བཀའ་སློབ་ཕེབས་རྗེས་ལྡུམ་ར་ཡར་མ་མགོན་པོའི་དགོན་པས་ལོ་མང་སྔོན་ནས་ཇི་ལྟར་གསོལ་དེབས་ཞུས་དོན་བཞིན་ཆིབས་སྒྱུར་བཀྲིན་ཆེ་བ་བསྐྱངས་ཡོད།
དེར་ས་གནས་མི་མང་ཚོས་
༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་ཕོ་བྲང་གསར་བཞེངས་གནང་བར་མགོན་པོ་གང་ཉིད་མཆོག་གིས་དབུ་འབྱེད་རབ་གནས་དང་ཆོས་ཞུ་བ་བདུན་སྟོང་ལྷག་ཙམ་ལ་ཤེས་རབ་སྙིང་པོའི་ལྗགས་ལུང་དང་བླང་དོར་བཀའ་སློབ་སྩལ། ཡར་མ་མགོན་པོའི་དགོན་པ་ནི་བསམ་གཏན་གླིང་ནས་རྒྱང་ཐག་ཀི་ལོ་མི་ཊར་ ༦༥ ཙམ་གྱི་སར་ཡོད། སྔོན་རྒྱལ་བ་རྒོད་ཚང་པའི་བུ་སློབ་སོགས་ཀྱིས་དད་ཅན་མཇལ་མི་རྣམས་ལ་གནས་མལ་སོགས་ཀྱིས་ཕན་ཐོགས་དང་རྒྱུན་དུ་མཆོད་གཏོར་བྱེད་རྒྱུ་སོགས་ཆེད་དུ་ཕྱག་བཏབ་པ་ཞིག་དང་ཡུལ་དེར་མགོན་པོ་ཕྱག་བཞི་པའི་ཡབ་ཡུམ་རང་བྱོན་མཇལ་རྒྱུ་ཡོད་པ་དང་ལ་དྭགས་ཀྱི་རྒྱལ་རབས་ཆོས་བྱུང་ནང་གནས་གལ་ཆེ་བ་ཞིག་ཀྱང་ཡིན་འདུག ༸གོང་ས་༸སྐྱབས་མགོན་ཆེན་པོ་མཆོག་གནས་དེར་ཆིབས་སྒྱུར་བསྐྱངས་ཐེངས་དང་པོ་ཡིན་འདུག་པ་བཅས།།
