༢༠༡༠ ཕྱི་ཟླ་ ༦ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༢༦ ཉིན་ཉི་ཧོང་བོད་གཞུང་སྐུ་ཚབ་དོན་གཅོད་ཁང་ནས་གོ་སྒྲིག་ཞུས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡོ་ཀོ་ཧ་མ་གྲོང་ཁྱེར་ནང་རྟེན་གཞི་བྱས་པའི་པེ་སི་ཕི་ཁོ་ཡོ་ཀོ་ཧ་མ་འགྲེམས་སྟོན་ཁང་གི་ཚོགས་ཁང་ནང་ (Pacifico Yokohama Exhibition Hall) དུ་སྔ་དྲོ་ཆུ་ཚོད་ ༡༠ ཐོག་༸ཞབས་སོར་འཁོད་དེ་ཀོ་རི་ཡ་ནས་བཅར་བའི་ཆོས་ཞུ་བ་སེར་སྐྱ་མི་གྲངས་ ༤༠༠ དང་། ཐེ་ཝན་ནས་བཅར་བའི་ཆོས་ཞུ་བ་སེར་སྐྱ་གྲངས་ ༥༠ སོག་པོ་ནས་བཅར་བའི་ཆོས་ཞུ་བ་གྲངས་ ༡༠༠༠ དང་། དེ་མིན་གཞུང་ཚབ་ཁག་ནས་བོད་པའི་རིག་གནས་ལ་དོ་སྣང་ཡོད་མཁན་གྱི་མི་སྣ་ཁག་གཅིག་དང་། ཚན་རིག་པ་ཁག་གཅིག མཐོ་སློབ་ཁག་གི་སློབ་དཔོན་ཁག་གཅིག རྒྱ་ནག་ནས་ཕེབས་པའི་ཆོས་ཞུ་བ་ཁག་གཅིག
དེ་བཞིན་གྲོང་ཁྱེར་དེའི་མི་མང་གཙོ་བོར་གྱུར་བ་བཅས་ཁྱོན་མི་གྲངས་ ༡༢༠༠༠ བརྒལ་བར་རྗེ་རིན་པོ་ཆེས་མཛད་པའི་རྟེན་འབྲེལ་བསྟོད་པ་དང་སེམས་བསྐྱེད་ཀྱི་ཆོས་འབྲེལ་བཀའ་དྲིན་ཆེ་བ་སྩལ་ཡོད། དེ་ཡང་༸གོང་ས་མཆོག་གིས་བཀའ་སློབ་ཕེབས་དོན། དེ་རིང་འདིར་ཉི་ཧོང་གི་ཆོས་གྲོགས་ཚོ་གཙོ་བོར་གྱུར་བའི་ཀོ་རི་ཡའི་ཆོས་གྲོགས་ཚོ་དང་། ཐེ་ཝན། དེ་བཞིན་རྒྱ་ནག་ནས་ཕེབས་པའི་ཆོས་གྲོགས་ཚང་མར་འཚམས་འདྲི་ཞུ་གི་ཡིན། དེ་རིང་འདིར་ཆོས་གྲོགས་ཚོར་ནང་ཆོས་ཀྱི་སྙིང་པོ་ངོ་སྤྲོད་བྱེད་རྒྱུའི་གོ་སྐབས་བྱུང་བར་ཞེ་དྲག་སྐལ་པ་བཟང་པོ་དང་དགའ་པོ་བྱུང་། ངོས་རང་ཉི་ཧོང་ནང་ཐེངས་མང་བསླེབས་ཡོད། ཁྱེད་རྣམས་ཉི་ཧོང་གི་ཆོས་པ་དང་སློབ་ཕྲུག མི་མང་བཅས་ནས་སངས་རྒྱས་པའི་ཆོས་ལ་དོ་སྣང་ཆེ་རུ་འགྲོ་གི་ཡོད་པ་མཐོང་བྱུང་བས་ཧ་ཅང་དགའ་པོ་བྱུང་། ང་ཚོ་དུས་རབས་ཉེར་གཅིག་པའི་ནང་བསླེབས་ཡོད།
དུས་རབས་ཉི་ཤུ་པ་དེ་མིའི་ལོ་རྒྱུས་ནང་ཧ་ལམ་དུས་རབས་གལ་ཆེ་ཤོས་ཤིག་ཆགས་ཡོད་སྙམ་གྱི་འདུག དུས་རབས་འདིའི་ནང་འཕྲུལ་ཆས་དང་ཚན་རིག་གི་ཤེས་ཚད་ཡར་རྒྱས་འགྲོ་རྒྱུ། དེ་དང་འབྲེལ་བའི་དཔལ་འབྱོར་ཡར་རྒྱས་འགྲོ་རྒྱུ་སོགས་ཧ་ཅང་ཡར་རྒྱས་ཕྱིན་ཡོད། དུས་རབས་ཉི་ཤུ་པ་དེའི་ནང་མི་གསོད་ཁྲག་སྦྱོར་བྱེད་རྒྱུ་མངཤོས་ཤིག་ཆགས་ཡོད། རྒྱལ་རབས་མང་པོ་ཞིག་གི་ནང་ཧ་ལམ་མི་གྲངས་ས་ཡ་ཉིས་བརྒྱ་ལྷག་ཙམ་འཚེ་བའི་འོག་འདས་གྲོངས་སུ་གྱུར་ཡོད་པ་བརྗོད་ཀྱི་འདུག འཚེ་བའི་འོག་མི་གསོད་རྒྱུ་མང་ཤོས་དེ་དུས་རབས་ཉི་ཤུ་པ་ཆགས་ཡོད། དུས་རབས་ཉི་ཤུ་པ་དེའི་ནང་མི་གསོད་ཁྲག་སྦྱོར་འོག་མིས་སྡུག་བསྔལ་མང་པོ་མྱངས་ཡོད། དེ་ལྟ་བུའི་དཀའ་ངལ་གྱི་ཉམས་མྱོང་ཐོག་ནས་དུས་རབས་ཉི་ཤུ་པའི་སྨད་ཆར་ཞི་བདེ་དང་འཚེ་བ་མེད་པ་ཞེས་པར་དོ་སྣང་གསར་པ་ཞིག་བསླེབས་ཡོད། དེ་དང་ཆབས་ཅིག་དུས་རབས་བཅུ་དགུ་དང་ཉི་ཤུའི་ནང་ཚན་རིག་ཡར་རྒྱས་སོང་རྐྱེན་སྔོན་མའི་དུས་རབས་མང་པོ་ཞིག་གི་ནང་མི་ཚོས་སྨོན་ལམ་བརྒྱབ་སྟེ་མ་སྒྲུབ་པ་མང་པོ་ཞིག་ཚན་རིག་དང་འཕྲུལ་ཆས་ཡར་རྒྱས་ཕྱིན་པར་བརྟེན་ནས་བསྒྲུབས་ཡོད་སྟབས། མི་མང་པོ་ཞིག་གིས་ཚན་རིག་དང་འཕྲུལ་ཆས་ནི་འཇིག་རྟེན་ཁམས་འདིའི་མིའི་འདོད་དོན་སྒྲུབ་མཁན་ཡག་ཤོས་ཤིག་རེད་བསམ་པའི་ཐོག་ནས་བློ་ལྟོས་ས་དེ་ཚན་རིག་དང་འཕྲུལ་ཆས་སྟེང་ཕྱིན་པ་རེད། དུས་རབས་ཉི་ཤུ་པའི་སྨད་ཆ་ནས་བཟུང་དུས་རབས་ཉི་ཤུ་རྩ་གཅིག་གི་ད་ལྟ་འགོ་སྟོད་སྐབས་འདིར་གཞི་ནས་དངོས་པོ་ཡར་རྒྱས་གཅིག་པུས་མིའི་སེམས་ནང་གི་བདེ་སྐྱིད་བསྐྲུན་ཐུབ་ཀྱི་མེད་པ་ཞིག་དང་། དེང་སྐབས་དངོས་པོ་ཡར་རྒྱས་ཆེན་པོ་ཕྱིན་པའི་ལུང་པ་དེ་ཚོའི་ནང་དུའང་སེམས་ཀྱི་དཀའ་ངལ་མུ་མཐུད་ནས་ཡོང་བཞིན་ཡོད་པར་བརྟེན།
དེ་སྔ་དུས་རབས་གཅིག་གཉིས་ཤིག་གི་ནང་དངོས་པོ་ཡར་རྒྱས་ཁོ་ནར་བློ་རྩེ་བལྟས་ནས་བསྡད་པ་དེར་ཕྲན་བུ་གྱུར་བ་ཕྱིན་ཏེ་ནང་བསམ་བློ་ཡར་རྒྱས་གཏོང་ཕྱོགས་ཐད་དོ་སྣང་གསར་པ་ཞིག་སླེབ་ཀྱི་འདུག ནང་བསམ་བློར་ཞི་བདེ་ཡོང་རྒྱུར་དོ་སྣང་སླེབ་སྐབས་དེ་སྔ་ནས་ཡོད་པའི་ཆོས་བརྒྱུད་ཁག་དེ་དག་གལ་ཆེན་པོ་ཆགས་ཡོད། དམིགས་བསལ་ཆོས་ལ་དད་པ་མེད་མཁན་ཚོས་ཀྱང་བསམ་བློ་ཡར་རྒྱས་ཐོག་ལ་དོ་སྣང་གསར་པ་ཞིག་བསླེབས་ཡོད། ཅེས་སོགས་ཀྱི་ནང་ཆོས་ངོ་སྤྲོད་ཀྱི་བཀའ་སློབ་ཟབ་རྒྱས་ཕེབས་རྗེས་རྟེན་འབྲེལ་བསྟོད་པའི་གསུང་ཆོས་དང་དེ་བཞིན་སེམས་བསྐྱེད་ཀྱི་བཀའ་ཆོས་བཀའ་དྲིན་ཆེ་བ་སྩལ་ཡོད།།
ཉིན་རྒྱབ་ཆུ་ཚོད་ ༢ ནས་ ༥ མ་ཟིན་ཙམ་གྱི་བར་གོང་གསལ་མི་མང་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བདེ་སྐྱིད་ཀྱི་སྙིང་པོ་དང་ཕན་ཚུན་འཆམ་མཐུན། ཞེས་པའི་བརྗོད་གཞིའི་ཐོག་བཀའ་སློབ་ཟབ་རྒྱས་སྩལ་ཡོད། དེ་ཡང་མགོན་པོ་གང་ཉིད་མཆོག་གིས་བཀའ་སློབ་མ་སྩལ་གོང་ཆོས་ལུགས་ཁག་གིས་རང་རང་གི་སྐད་ཡིག་ཐོག་ཤེས་རབ་སྙིང་པོ་གསུངས་རྗེས་སོག་རིགས་ཚོས་གླུ་དབྱངས་ཀྱི་མཆོད་པ་འབུལ་ལམ་ཞུས། དེ་རྗེས་བཀྲ་ཤིས་ལྷུན་པོའི་དགེ་འདུན་པ་བཅུས་བོད་སྐད་ཐོག་ཤེས་རབ་སྙིང་པོ་གསུངས་། མཐར་ཉི་ཧོང་གི་དགེ་འདུན་པ་ཚོས་ཉི་ཧོང་སྐད་ཐོག་ཤེས་རབ་སྙིང་པོ་གསུང་འདོན་གནང་། དེ་རྗེས་བོད་དོན་རྒྱབ་སྐྱོར་བ་སྐུ་ཞབས་ས་ཌོ་ཝ་ཊ་ན་བི་ (Sadao Watanabe) ལགས་ནས་རོལ་དབྱངས་ཀྱི་མཆོད་སྤྲིན་འབུལ་ལམ་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་དེའི་མི་མང་རྣམས་ལ་སྩལ་རྒྱུའི་བཀའ་སློབ་ཀྱི་བརྗོད་གཞིའི་ཐོག་འགྲོ་བ་མི་ཞིག་ཡིན་པའི་ཆ་ནས་བྱམས་བརྩེ་དགོས་མཁོ་ཡོད་པ་དང་བྱམས་བརྩེའི་ཕན་ཡོན་དང་དགོས་དམིགས། ཆོས་ལུགས་རིས་མེད། གོ་ལ་གཅིག་གྱུར་སོགས་ཀྱི་སྐོར་ལ་བཀའ་སློབ་ཟབ་རྒྱས་སྩལ་ཡོད། དེ་རྗེས་མི་གྲངས་ ༡༥ ཙམ་ལ་དྲི་བ་འབུལ་རྒྱུའི་གོ་སྐབས་སྩལ་ནས་ཁོང་ཚོའི་དྲི་བར་བཀའ་ལན་ཕེབས་ཏེ་འགྲོ་རྣམས་བྱམས་བརྩེས་སྐྱོང་གནང་མཛད་པར་བརྟེན་དེར་བཅར་བའི་ཆོས་ཞུ་བ་ཡོངས་རྫོགས་དགའ་དད་སྤྲོ་གསུམ་གྱི་རྣམ་པས་ཁེངས། དེ་རྗེས་ཉི་ཧོང་སྐུ་ཚབ་དོན་གཅོད་ལྷག་པ་འཚོ་སྒོ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཉིན་དེའི་ཆོས་འབྲེལ་དང་བཀའ་སློབ་ཀྱི་མཛད་འཕྲིན་ཡོངས་སུ་གྲུབ་ཡོད།།
