༢༠༡༠ ཕྱི་ཟླ་ ༥ ཚེས་ ༡༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཨིན་ཌི་ཡཱ་ནའི་མངའ་སྡེའི་རྒྱལ་ས་ཨིན་ཌི་ཡཱ་ན་པོ་ལི་སིའི་ནང་ (Indianapolis) རྟེན་གཞི་བྱས་པའི་དགེ་བཤེས་སྦྱིན་པ་བསོད་ནམས་ལགས་ཀྱི་ཆོས་ཚོགས་དང་གྲོང་ཁྱེར་བུ་ལུ་མིན་ཊོན་ནང་རྟེན་གཞི་བྱས་པའི་ཨཀྱཱ་རིན་པོ་ཆེ་མཆོག་གིས་འཛིན་སྐྱོང་གནང་བའི་བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་། གཞན་ཡང་རྒྱལ་ས་ཨིན་ཌི་ཡཱ་ན་པོ་ལི་སིའི་ནང་རྟེན་གཞི་བྱས་པའི་བཀྲེས་ལྟོགས་ངལ་སེལ་གྱི་རོགས་སྐྱོར་ཚོགས་པ་ (Interfaith Hunger Initiative) བཅས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཆིབས་སྒྱུར་བཀའ་དྲིན་བསྐྱངས།
སྐབས་དེར་ཨིན་ཌི་ཡཱ་ན་པོ་ལི་སིར་མང་ཚོགས་ཁྲི་གཅིག་ ༡༠༠༠༠ ཉེ་བར་བཅར་ཡོད་པ་རྣམས་ལ་ལམ་སྟོན་བཀའ་སློབ་སྩལ་དོན། དངུལ་དང་དཔལ་འབྱོར་གྱི་དགོས་མཁོ་དེ་གལ་ཆེན་པོ་ཡིན་རུང་དེ་ནི་མི་ཚེའི་དགོས་དོན་མཐའ་མ་མིན། མི་ཚེའི་ནང་དངུལ་དང་དཔལ་འབྱོར་གྱི་དགོས་མཁོ་གལ་ཆེན་ཞིག་ཡིནའང་། མི་ཚེའི་ནང་དགོས་མཁོ་དེ་ལས་གལ་ཆེ་བ་མང་པོ་ཡོད། གལ་ཆེ་ཤོས་ཤིག་ནི་མི་ཚེ་དྲང་ལྡན་བྱེད་རྒྱུ་དེ་ཡིན། མི་ཚེ་དྲང་ཚུགས་ལྡན་པའི་ཐོག་བསྐྱལ་ཐུབ་ན། རང་གི་ཀུན་སྤྱོད་དེ་དག་སྦས་གསང་གང་ཡང་བྱེད་མི་དགོས་པར་སྐད་ཆ་གང་བཤད་ཀྱང་དྲང་པོ་དྲང་བཞག་ཤོད་ཐུབ་མཁན་ཞིག་ཡོང་གི་རེད། དེ་ལྟ་བུའི་གཤིས་སྤྱོད་ལ་གཞན་གྱིས་གུས་བརྩི་དང་ཡིད་ཆེས། འཆམ་མཐུན། མཉམ་གནས་ཀྱི་འཚོ་བ་ཞིག་སྐྱེལ་ཐུབ་ཀྱི་རེད་ཅེས་བཀའ་སྩལ་བ་དང་། ཡང་༸གོང་ས་མཆོག་གིས་བཀའ་སློབ་སྩལ་དོན། གོ་མཚོན་ལ་བརྟེན་པའི་ནུས་ཤུགས་ཀྱིས་འཇིགས་སྣང་དང་ཡིད་ཆེས་མེད་པའི་ཚོར་སྣང་ཞིག་བསྐྲུན་རྒྱུ་ལས་མཐུན་སྒྲིལ་གྱི་ཁོར་ཡུག་གཅིག་གཏན་ནས་བསྐྲུན་མི་ཐུབ། མིའི་མི་ཚེའི་གཞི་བརྟེན་གཙོ་བོ་ནི་ཕན་ཚུན་ཡིད་ཆེས་དང་གུས་བརྩི་སོགས་ཡིན་སྟབས་དེ་ལ་བརྟེན་པའི་སྤྱི་ཚོགས་ཤིག་བསྐྲུན་དགོས། དེང་སྐབས་འཛམ་གླིང་ནང་རྡུལ་ཕྲན་གྱི་གོ་མཚོན་མེད་པ་བཟོ་རྒྱུའི་སྐད་ཆ་ཤོད་འགོ་ཚུགས་པ་ནི་བཟང་ཕྱོགས་ཀྱི་འགྱུར་བ་ཆེན་པོ་ཞིག་ཡིན། འོན་ཀྱང་ཕྱིའི་གོ་མཚོན་གྱི་དངོས་པོ་དེ་དག་མེད་པ་བཟོ་རྒྱུར། དང་ཐོག་ང་ཚོས་སོ་སོའི་སེམས་ནང་གི་དྲག་ཟིང་གི་ཚོར་བ་དེ་དག་མེད་པ་བཟོ་ཐབས་བྱེད་དགོས། ཞེས་བཀའ་སློབ་སྩལ་ཡོད། མཐའ་དོན་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཨ་རིའི་རྒྱལ་ཁབ་འདི་འཛམ་གླིང་འདིའི་ནང་ཆེས་གནད་འགག་ཅན་གྱི་རྒྱལ་ཁབ་གཅིག་ཡིན་པས། ཨ་རིའི་གཞུང་དམངས་གཉིས་ནས་རྒྱལ་སྤྱིའི་གནད་དོན་ཐད་འགན་ཁུར་ཆེ་ཙམ་ཁུར་དགོས་ཀྱི་རེད་ཅེས་རེ་འདུན་མཛད་ཡོད།
དེ་རྗེས་བཀའ་སློབ་གོ་སྒྲིག་གནང་མཁན་གྱི་གྲས་བོད་རང་དབང་ལས་འགུལ་ཚོགས་པའི་ཚོགས་མི་ལ་རི་གྷ་སི་ནས་༸གོང་ས་མཆོག་གི་བཀའ་སློབ་ཞུ་བར་ཡོང་མཁན་རྣམས་ལ་བཀའ་ཆོས་ཀྱི་ཕྱག་འཁྱེར་བཙོང་བའི་རྩིས་ཁྲ་ཁ་གསལ་སྙན་སྒྲོན་ཞུས་ཡོད་པ་མ་ཟད། མགོན་པོ་གང་ཉིད་མཆོག་སླར་ཨིན་ཌི་ཡཱ་ནའི་ནང་ཆིབས་སྒྱུར་བསྐྱང་རྒྱུའི་གསོལ་འདེབས་ཀྱང་ཞུས་ཡོད། ༸གོང་ས་མཆོག་གི་བཀའ་སློབ་གོ་སྒྲིག་ཚོགས་ཆུང་ནས་བཀའ་ཆོས་ཀྱི་ཕྱག་འཁྱེར་བཙོང་བའི་ཨ་སྒོར་ཆིག་འབུམ་ཉིས་ཁྲི་སུམ་སྟོང་ཙམ་ཞིག་བྱུང་ཡོད་པ་དེ་དག་བཀྲེས་ལྟོགས་ངལ་སེལ་གྱི་རོགས་སྐྱོར་ཚོགས་པ་དང་། བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་གཉིས་དབར་ཆ་བགོས་གནང་རྒྱུ་ཡིན་འདུག བོད་སོག་ནང་པའི་རིག་གཞུང་གཅེས་སྐྱོང་བསྟི་གནས་ཁང་གི་འགན་འཛིན་ཨཀྱཱ་རིན་པོ་ཆེས་གསར་འགོད་པར་ངོ་སྤྲོད་གནང་བའི་ནང་། ༸གོང་ས་མཆོག་གི་བཀའ་ཆོས་ཞུ་རྒྱུའི་ཕྱག་འཁྱེར་བཙོང་བའི་ཡོང་འབབ་ཇི་ཙམ་བྱུང་བ་ཡོངས་རྫོགས་སྐྱེ་རྒུ་མདོར་ས་ཡོམ་གྱི་གོད་ཆག་ཕོག་པར་ངལ་སེལ་གྱི་ལས་དོན་ཆེད་ཞལ་འདེབས་སུ་འབུལ་རྒྱུ་ཡིན་ཞེས་གསུངས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ཨིན་ཌི་ཡཱ་ནའི་ནང་གི་མཛད་འཕྲིན་ཁག་ལེགས་པར་གྲུབ་མཚམས་ཨ་རིའི་ཝི་སེ་ཀོན་སི་མངའ་སྡེའི་རྒྱལ་ས་མ་ཌེ་སོན་ནང་མཛད་འཆར་བསྐྱང་ཆེད་ཆིབས་ཞལ་བསྒྱུར་ཡོད་པ་བཅས། །
