༢༠༡༠ ཕྱི་ཟླ་ ༤ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༢ ནས་ཉིན་གསུམ་རིང་ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་ཉིན་སློབ་ཚོགས་ཁང་དུ་བོད་གཞུང་འོས་བསྡུ་ལྷན་ཁང་དང་། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་ཐུན་མོང་གིས་གོ་སྒྲིག་ཐོག་རྒྱ་བལ་འབྲུག་གསུམ་གྱི་ས་གནས་འགན་འཛིན་རྣམས་ལ་འོས་བསྡུའི་སྒྲིག་གཞི་དང་འབྲེལ་བའི་ཟབ་སྦྱོང་ཞིག་ཚོགས་ཡོད། ཟབ་སྦྱོང་སློབ་ཁྲིད་པ་ནི་དབུས་འོས་བསྡུའི་འགན་འཛིན་འཇམ་དཔལ་ཆོས་བཟང་མཆོག་དང་། རྒྱ་གར་གྲོས་ཚོགས་འོག་མའི་ཚོགས་དྲུང་ཟུར་པ་མཁས་དབང་སུ་བྷཱཤ་ཀེ་ཤཔ་ (Subash Kashyap) ལགས་དང་། འོས་བསྡུའི་འགན་འཛིན་ཟུར་པ་བཀྲས་ཁང་རྣམ་རྒྱལ་རྡོ་རྗེ་ལགས། འོས་བསྡུའི་འགན་འཛིན་ཟུར་པ་བཀྲིས་ཕུན་ཚོགས་ལགས་བཅས་ཀྱིས་ཟབ་སྦྱོང་དང་འབྲེལ་བའི་ངོ་སྤྲོད་དང་། བཅའ་སྒྲིག་གཙོ་བཟུང་ཐོག་བཀའ་བློན་ཁྲི་པའི་འོས་འདེམས་ཞུ་ཕྱོགས་སྐོར་དང་། སྤྱི་འཐུས་རྣམ་པའི་འོས་བསྡུ་ཐོག་བཅའ་སྒྲིག་ལམ་ནས་སློབ་ཁྲིད་དང་།
ཕྱི་ལོ་ ༢༠༡༡ ལོའི་འོས་བསྡུ་ཆེན་མོ་དང་འབྲེལ་བའི་གལ་ཆེའི་འོས་བསྡུའི་ལས་རིམ་ཁ་ཤས་ཐོག་གསུང་བཤད་གནང་ཡོད་པ་མ་ཟད། འོས་བསྡུའི་ལས་དོན་དང་འབྲེལ་བའི་ཐོག་ཞུགས་མོལ་ཚོགས་འདུ་ཚོགས་ཏེ་གོང་གི་བརྗོད་བྱ་རིམ་པའི་ཐད་དྲི་བ་དྲིས་ལན་གནང་ཡོད།ཉིན་མཐའ་མར་དབུས་འོས་བསྡུའི་འགན་འཛིན་དང་གཞུང་ཞབས་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་འཇམ་དཔལ་ཆོས་བཟང་མཆོག་གིས་ལས་བྱེད་གསར་བསྐོ་དང་གནས་སྤར། གནས་སྤོ་བཅས་ཀྱི་ཐོག་འགྲེལ་བཤད་གྲུབ་མཚམས་ཟབ་སྦྱོང་མཇུག་སྡོམ་གནང་ཡོད། ད་ཐེངས་ཟབ་སྦྱོང་དེར་རྒྱ་བལ་འབྲུག་གསུམ་ནས་འོས་བསྡུའི་འགན་འཛིན་གྲངས་ ༤༦ ཚོགས་བཅར་གྱིས་མཉམ་ཞུགས་གནང་ཡོད་པ་བཅས།
