༢༠༡༠ ཕྱི་ཟླ་ ༤ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་བོད་མདོ་ཁམས་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་སྐྱེ་རྒུ་མདོ་ཁུལ་དུ་ས་ཡོམ་ཤུགས་ཆེ་བརྒྱབ་པར་བརྟེན་བོད་རིགས་གཙོས་པའི་མི་གྲངས་མང་པོར་སྲོག་སྐྱོན་དང་རྨས་སྐྱོན་ཕོག་པ་དེ་བཞིན་རྐྱེན་འདས་སུ་གྱུར་བ་རྣམས་ཀྱི་རྗེས་ཤུལ་ནང་མི་སྤུན་མཆེད་སོགས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་གསོའི་གསུང་འཕྲིན་སྩལ་ཡོད་པའི་ནང་འཁོད་དོན།
སྐྱེ་རྒུ་མདོའི་ཁུལ་དུ་ས་ཡོམ་བརྒྱབ་པར་བརྟེན་མི་མང་པོ་ཚེ་སྲོག་ཤོར་བ་དང་རྒྱུ་དངོས་འཐོར་ཞིག་ཕྱིན་པར་ངོས་རང་ཧ་ཅང་བློ་ཕམ་ཆེན་པོ་བྱུང་། ང་ཚོས་རང་བྱུང་གི་གོད་ཆག་དེའི་འོག་རྐྱེན་འདས་སུ་གྱུར་བ་རྣམས་དང་རྗེས་ཤུལ་ནང་མིའི་གཙོས་གོད་ཆག་ཕོག་པ་ཚང་མར་སྨོན་ལམ་རྒྱག་རྒྱུ་མ་ཟད། གོད་ཆག་ཕོག་པ་རྣམས་ལ་དམིགས་ནས་རྡ་སར་དམིགས་བསལ་གྱི་སྨོན་ལམ་མཆོད་འབུལ་ཞིག་ཐེག་ཆེན་ཆོས་གླིང་གཙུག་ལག་ཁང་དུ་འཚོགས་རྒྱུ་ཡིན་པ་རེད། ངོས་ཀྱི་རེ་བར་གོད་ཆག་ཕོག་པ་རྣམས་ལ་རོགས་རམ་དང་། ངལ་སེལ་རོགས་སྐྱོབ་ཀྱི་མཐུན་འགྱུར་ཇི་ཡོད་རྣམས་འཐོབ་ཐུབ་པ་མ་ཟད། ངོས་ནས་ཀྱང་རོགས་སྐྱོབ་ཀྱི་རྩོལ་བ་དེར་མཐུན་འགྱུར་རོགས་རམ་ཇི་ལྟར་ཐུབ་མིན་དཔྱད་ཞིབ་བྱེད་མུས་ཡིན། ཞེས་འཁོད་ཡོད།
དབྱིན་ཡིག་ནང་ཡོད་པའི་མ་ཡིག་ནས་ཕབ་སྒྱུར་ཞུས་པས་དེར་རྩ་འཛིན་ཡོད་པ་ཞུ།
