༢༠༡༠ ཕྱི་ཟླ་ ༣ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༢༣ ཉིན་གྱི་སྔ་དྲོ་དཔལ་ལྡན་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་བཞུགས་སྒར་རྡ་རམ་ས་ལར་ཉིན་གསུམ་རིང་བོད་རྒྱ་འབྲེལ་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༡ པ་དེ་དབུ་འཛུགས་གནང་ཡོད། བོད་རྒྱ་འབྲེལ་མོལ་ལས་དོན་ཚོགས་ཆུང་གི་ཚོགས་འདུ་དེ་ཕྱི་ཟླ་ ༣ ཚེས་ ༢༣ ནས་ ༢༥ བར་ཚོགས་གནང་རྒྱུ་ཡིན་འདུག ལྷན་ཚོགས་དེ་བོད་མི་མང་སྤྱི་འཐུས་ལྷན་ཚོགས་སྐབས་ ༡༤ པའི་གྲོས་ཚོགས་ཚོགས་དུས་དགུ་པའི་སྐབས་གྲོས་ཚོགས་ནང་སྤྱི་མོས་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་ཀྱི་གནད་དོན་སེལ་རྒྱུར་གཉིས་སྨན་དབུ་མའི་ལམ་དེར་རྒྱབ་སྐྱོར་གྱི་གྲོས་ཆོས་བཞག་པའི་རྗེས་སུ་ཚོགས་པ་ཞིག་རེད། བོད་རྒྱ་འབྲེལ་མོལ་གྱི་ལས་དོན་ཚོགས་ཆུང་དེ་ཐོག་མར་ཕྱི་ལོ་ ༡༩༩༩ ལོར་བཀའ་ཤག་གིས་གཟིགས་སྐྱོང་འོག་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམ་པས་རྒྱ་ནག་གཞུང་དང་ལྷན་བོད་ཀྱི་གནད་དོན་དེ་བོད་རྒྱ་ཕྱོགས་གཉིས་ཀྱི་དབར་གྲོས་མོལ་གྱི་ལམ་ནས་སེལ་རྒྱུར་གསར་འཛུགས་གནང་ཡོད། བོད་རྒྱ་འབྲེལ་མོལ་ལས་དོན་ཚོགས་ཆུང་གི་ཚོགས་འདུ་མཐའ་མ་དེ་བོད་རྒྱ་འབྲེལ་མོལ་གྱི་ཚོགས་འདུ་ཐེངས་དགུ་པ་ཕྱི་ལོ་ ༢༠༡༠ ཟླ་ ༡ ཚེས་ ༢༦ ནས་ ༣༡ བར་ཚོགས་ཡོད་པ་དེའི་སྔོན་ཙམ་དུ་ཚོགས་ཡོད་བཅས།
