༢༠༠༩ ཕྱི་ཟླ་ ༦ ཚེས་ ༡ རེས་གཟའ་ཟླ་བ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོ་ནས་ ༢༠༠༩ ཕྱི་ཟླ་ ༥ ཚེས་ ༣༠ ཉིན་ཌན་མག་གི་རྒྱལ་ས་ཁོ་པན་ཧཱ་གྷན་ (Copenhagen) དུ་ཡོད་པའི་བྷི་ལ་འདུ་ཚོགས་བསྟི་གནས་ཁང་ (Bella Convention Center) དུ་སློབ་དཔོན་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པའི་ཆོས་འབྲེལ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་ཌན་མག་གི་སྲིད་བློན་སྐུ་ཞབས་ལར་སེ་ལོཀ་ཁི་ར་སེ་མུ་སིན་མཆོག་ནས་ཁོང་གི་བཞུགས་གནས་སུ་བསུ་བ་ཞུ་བཞིན་པ།
ཐེངས་འདིའི་ཆོས་འབྲེལ་སྐབས་ཌན་མག་དང་། ཡུ་རོབ་ཀྱི་ཡུལ་གྲུ་གཞན་ཁག་ནས་ཕེབས་པའི་མི་མང་དང་། ཌན་མག་ཏུ་གནས་སྡོད་བོད་མི་དང་རྒྱ་རིགས་བཅས་དད་ལྡན་ཆོས་ཞུ་བ་ ༣༦༠༠ ལྷག་ཙམ་བཅར་ཡོད་པ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་སྩལ་དོན། མགོན་པོ་གང་ཉིད་ནི་ཆོས་ལུགས་གཅིག་ནས་གཅིག་ལ་བསྒྱུར་རྒྱུར་ཐུགས་མོས་མེད་མཁན་ཞིག་ཡིན་སྐོར་དང་། དེར་བརྟེན་མི་སུ་ཡིན་རུང་ནང་པའི་ཆོས་ལུགས་ལ་འགྱུར་ཐབས་མ་གནང་རོགས། ནུབ་ཕྱོགས་རྒྱལ་ཁབ་ཀྱི་སྔ་མོའི་ཆོས་བརྒྱུད་ནི་ཡེ་ཤུའི་ཆོས་བརྒྱུད་ཡིན་སྟབས་ཡེ་ཤུའི་ཆོས་ལུགས་མུ་མཐུད་རྒྱུན་འཁྱོངས་བྱ་རྒྱུ་ལེགས་ཤོས་ཡིན། འོན་ཀྱང་མི་སྒེར་གྱིས་དང་བླངས་ཀྱི་ཐོག་ནས་ནང་ཆོས་ཉམས་ལེན་བྱས་ཏེ་སོ་སོར་ཕན་ཐོགས་ཡོང་གི་ཡོད་ཚེ་དེ་ནི་འགྲིག་གི་ཡོད་པ་རེད། ཅེས་དང་ལྷག་པར་དུ་༸གོང་ས་མཆོག་གིས། གནའ་སྔ་མོ་མི་ཚང་མ་ཁེར་རྐྱང་དུ་གནས་སྡོད་བྱ་རྒྱུར་འདོད་མོས་བྱེད་ཀྱི་ཡོད། བོད་ནང་ཡོད་པའི་བོད་མིར་ཆ་བཞག་ནའང་ཕྱིའི་འཛམ་གླིང་དང་དེ་དག་གི་ཆོས་ལུགས་འདྲ་མིན་ཁག་དང་འབྲེལ་མཐུད་མེད་སྟབས་དེ་ཙམ་ཁྱད་པར་བཟོ་གི་མེད། ཡིན་ནའང་འཛམ་གླིང་འདིར་འགྱུར་ལྡོག་བྱུང་སྟེ་དེའི་ནང་གནས་པའི་མི་མང་རྣམས་ཕན་ཚུན་གཅིག་ལ་གཅིག་རྟེན་གྱི་འབྲེལ་ལམ་ཟབ་ཏུ་ཕྱིན་ཏེ་ཆོས་ལུགས་གཞན་ལ་གུས་བརྩི་དང་རྗེས་སུ་ཡི་རང་ཞུ་དགོས་པ་ནི་གལ་ཆེ་ཆགས་ཡོད། འདི་གར་བཅར་བའི་ཆོས་ཞུ་བའི་ཁྲོད་དུའང་ཧིན་དྷུ་དང་། ཁ་ཆེ། ཡེ་ཤུ་བཅས་ཀྱི་ཆོས་བྱེད་མཁན་ཕེབས་ཡོད་ངེས་རེད། ཅེས་བཀའ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་དང་ཌན་མག་གི་ཕྱི་སྲིད་བློན་ཆེན་སྐུ་ཞབས་མོ་གྷན་སེ་ལཀ་ཀི་ཊོཕ་ཊེ་དབུས་གྲོས་ཚོགས་ཀྱི་འཐུས་མི་བཅས་མཇལ་མོལ་གནང་བཞིན་པ།
ཕྱི་ཚེས་ ༣༠ ཉིན་གསུང་ཆོས་མ་གནང་སྔོན་༸གོང་ས་༸སྐྱབས་མགོན་ཆེན་པོ་མཆོག་ནས་མགོན་པོ་གང་ཉིད་ཀྱི་བཞུགས་གནས་མགྲོན་ཁང་དུ་ཌན་མག་གི་ཕྱི་སྲིད་བློན་ཆེན་སྐུ་ཞབས་མོ་གྷན་སེ་ལཀ་ཀི་ཊོཕ་ཊེ་ (Mogens Lykketoft) དབུས་པའི་ཌན་མག་གྲོས་ཚོགས་ཀྱི་སྲིད་དོན་ཚོགས་པ་ཚང་མའི་སྐུ་ཚབ་གྲོས་ཚོགས་འཐུས་མི་རྣམས་དང་མཇལ་མོལ་གནང་རྗེས་གསར་འགོད་ལྷན་ཚོགས་ཤིང་བསྐྱངས་གནང་ཡོད། སྐབས་དེར་གསར་འགོད་པ་ཞིག་གིས་བོད་རྒྱ་འབྲེལ་མོལ་གྱི་གནས་སྟངས་ཐོག་ལ་དྲི་བ་ཕུལ་བར་མགོན་པོ་གང་ཉིད་ནས་བཀའ་ལན་སྩལ་དོན། ང་ཚོའི་ངོས་ནས་འབད་བརྩོན་ག་ཚོད་བྱས་ཀྱང་གནས་སྟངས་ལ་ཡར་རྒྱས་འགྲོ་གི་མི་འདུག རྒྱ་ནག་གཞུང་གིས་ང་ཚོས་སྤྲད་པའི་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་ཤོག་དེར་ཁས་ལེན་བྱས་མེད། འོན་ཀྱང་ང་ཚོས་རྒྱ་ནག་མི་མང་ལ་བཅངས་པའི་ཡིད་ཆེས་ལ་འགྱུར་བ་མེད། ང་ཚོས་བོད་དོན་ཐོག་རྒྱུས་མངའ་ཡོད་པ་དང་། བོད་མིར་གདུང་སེམས་མཉམ་སྐྱེ་གནང་མཁན། བོད་དོན་ལ་རྒྱབ་སྐྱོར་ཡོད་མཁན་གྱི་རྒྱ་ནག་མི་མང་རྣམས་དང་འབྲེལ་གཏུགས་ཞུ་རྒྱུར་འབད་བརྩོན་མུ་མཐུད་བྱེད་བཞིན་ཡོད། ཅེས་བཀའ་ལན་ཕེབས་པ་མ་ཟད། མགོན་པོ་གང་ཉིད་ནས་རྒྱལ་སྤྱིའི་སྤྱི་ཚོགས་ལ་རྒྱ་ནག་གཞུང་ཕྱོགས་ནས་གནོན་ཤུགས་གང་ཡང་མེད་པའི་ཐོག་ནས་བོད་ནང་ཕེབས་ཏེ་བོད་ནང་གི་དངོས་ཡོད་ཀྱི་གནས་སྟངས་གང་ཡིན་ཉམས་ཞིབ་གནང་དགོས་པའི་འབོད་སྐུལ་ཡང་གནང་བ་དང་སྦྲགས་བཀའ་སྩལ་དོན། གལ་ཏེ་བོད་ནང་གི་བོད་མི་ཚོ་རྒྱ་གཞུང་གིས་གསལ་བསྒྲགས་བྱས་པ་བཞིན་བདེ་སྐྱིད་དང་ལྡན་པ་ཞིག་ཡོད་ཚེ་བཙན་བྱོལ་བོད་མི་ཚོས་བོད་ཀྱི་གནད་དོན་མེད་ཅེས་ཁས་ལེན་བྱ་རྒྱུ་མ་ཟད། རྒྱ་ནག་གཞུང་ལའང་དགོངས་སེལ་ཞུ་རྒྱུ་ཡིན། ཡིན་ནའང་བོད་ནང་ཡོད་པའི་བོད་མི་ཚོ་རྒྱ་ནག་གཞུང་གི་སྲིད་བྱུས་ལ་འདོད་བློ་མི་ཁེངས་པ་དང་། འཇིགས་སྣང་དང་དངངས་སྐྲག་འོག་འཚོ་བཞིན་ཡོད་ཚེ་རྒྱ་ནག་གཞུང་གིས་དེར་དགོངས་སེལ་ཞུས་ཏེ་བོད་ཀྱི་གནད་དོན་དེ་བཞིན་ངེས་པར་དུ་སེལ་དགོས་ཀྱི་རེད། རྒྱལ་སྤྱིའི་སྤྱི་ཚོགས་ཀྱིས་བོད་ནང་དཀའ་རྙོག་ཡོད་མེད་ཀྱི་དཔྱད་ཞིབ་བྱེད་དགོས་ཀྱི་རེད། ཅེས་བཀའ་ལན་སྩལ་ཡོད།
གསར་འགོད་པ་གཞན་ཞིག་གི་དྲི་བར་༸གོང་ས་མཆོག་ནས་བཀའ་ལན་སྩལ་དོན། མགོན་པོ་གང་ཉིད་ནས་ཌན་མག་གི་ཆབ་སྲིད་ཀྱི་མི་སྣ་དང་། གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་དང་གསུང་མོལ་གནང་དགོས་དོན་ནི་གཅིག་ནས་ཁོང་རྣམ་པས་མགོན་པོ་གང་ཉིད་དང་མཇལ་འདོད་གནང་གི་ཡོད་པ་དང་། གཉིས་ནས་བོད་མི་ཚོས་མགོན་པོ་གང་ཉིད་ལ་ཡིད་ཆེས་བློས་ཁེལ་དང་གུས་བརྩི་ཤུགས་ཆེ་ཞུ་གི་ཡོད་སྟབས་བོད་དོན་ཐད་མགོན་པོ་གང་ཉིད་ལ་ཐུགས་འགན་ཡོད། ཅེས་བཀའ་ལན་ཕེབས་ཡོད་པའི་གནས་ཚུལ་དུ།།
