ཟླ་བ་ ༡༠ ཚེས ༨ ༢༠༡༨
Published By ngawang thokmey

ཕྱི་ལོ་ ༢༠༡༨ ཟླ་ ༡༠ ཚེས་ ༨ རེས་གཟའ་ཟླ་བ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༨ ལོའི་ནོ་བེལ་ཞི་བདེའི་གཟེངས་རྟགས་ཐོབ་མཁན་གཉིས་ལ་འཚམས་འདྲི་མཛད་འདུག
དེ་ཡང་ནོ་བེལ་གཟེངས་རྟགས་ཚོགས་ཆུང་གིས་འདི་ལོའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་མཚན་གཞུང་གསལ་བསྒྲགས་སྤེལ་མཚམས་བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་ ༡༠ ཚེས་ ༦ རེས་གཟའ་སྤེན་པ་ཉིན་ཨི་རག་ Iraq ཡུལ་ནང་ཡ་ཛི་དི་ Yazidi གྲངས་ཉུང་མི་རིགས་ཀྱི་བུད་མེད་ལས་འགུལ་བ་ལྕམ་ནཱ་ཌི་ཡ་མུ་རཏ་ Nadia Murad མཆོག་དང་།  ཨབ་ཕི་རི་ཀ་གླིང་ཆེན་གྱི་ཀོང་གོ་ Congo ཡུལ་ནས་དམག་འཁྲུག་སོགས་ནང་སྡུག་སྦྱོང་མནར་གཅོད་ཕོག་པའི་བུད་མེད་རྣམས་ལ་རོགས་རམ་གནང་མཁན་སྨན་པ་སྐུ་ཞབས་དེ་ནིས་མུཀ་ཝེགེ་ Dr. Denis Mukwege མཆོག་རྣམ་གཉིས་ལ་དགའ་བསུའི་འཚམས་འདྲི་མཛད་པའི་ནང་འཁོད་དོན།  

” གཟེངས་རྟགས་འདིས་དཀའ་སྡུག་ཧ་ཅང་མྱོང་བཞིན་པ་རྣམས་ལ་ཁྱེད་རྣམ་གཉིས་ནས་འཇིགས་ཞུམ་མེད་པར་ཕན་ཐོགས་རྒྱ་ཆེ་གནང་བཞིན་པ་དེར་ངོས་འཛིན་ཐོབ་པ་ཞིག་རེད། བྱམས་བརྩེ་ཁ་ནས་བཤད་པ་ཙམ་མིན་པར་ལག་བསྟར་གནང་བཞིན་པ་དེར་ངོས་ཀྱིས་ཡི་རངས་བསྔགས་བརྗོད་ཞུ་རྒྱུ་དང་། ཁྱེད་རྣམ་གཉིས་ལྟར་དཔའ་མཛངས་ལྡན་པའི་ཐོག་ནས་སྡུག་བསྔལ་གྱིས་མནར་བཞིན་པའི་མི་གཞན་ལ་ཕན་ཐོགས་གནང་མཁན་ཕོ་མོ་ཚང་མར་ངོས་ཀྱིས་ཡི་རངས་བསྔགས་བརྗོད་རྒྱ་ཆེ་ཞུ་བཞིན་ཡོད། འབྱུང་འགྱུར་འགྲོ་བ་མི་ཀུན་བདེ་སྐྱིད་ཀྱི་དཔལ་ལ་རོལ་ཐུབ་པའི་འཛམ་གླིང་ཞིག་བསྐྲུན་རྒྱུར་ཁྱེད་རྣམ་གཉིས་ལ་ཕྱར་གྲུ་མཉམ་འདེགས་ཞུ་ཐུབ་རྒྱུའི་རེ་བ་ཞུ་བཞིན་ཡོད།  ” ཅེས་འཁོད། 

Share with your friends










Submit